‘வாழை’ படத்தின் இறுதிக் காட்சியில் எல்லோரையும் உலுக்கி எடுத்து அழவைத்து அனுப்பிய பாடல் ‘பாதவத்தி...’ இந்தப் பாடலில் தோன்றி, பாடி நடித்தவர் நாட்டுப்புற பாடல் நாயகர் முனைவர் கலைமாமணி சித்தன் ஜெயமூர்த்தி.

ஆளுமை நிறைந்த குரலுக்கு சொந்தக்காரரான சித்தன், பாண்டிச்சேரி பல்கலைக்கழகத்தில் இசை பயின்று, பாரதியார் பல்கலைக் கழகத்தில் முனைவர் பட்டம் பெற்று, தஞ்சைப் பல்கலைக்கழகத்திலும் இசை ஆராய்ச்சியில் இறங்கி, கெஸ்ட் புரொஃபசராக வலம் வந்தவர்.

பார்க்க ஒரு பாப் சிங்கர்போல இருக்கும் சித்தன், மேடைகளில் மைக் பிடித்து ஆக்ரோஷமாகப் பாடுபோது,  இவரின் நீண்ட சுருள் முடி காற்றில் அசைந்தாடும் காட்சி, சித்தன் ஜெயமூர்த்தியின் முக்கிய அடையாளமாகவே இருந்தது.மக்கள் இசை, நாட்டுப்புறப் பாடல்கள், வாழ்வியல் பாடல்களைப் மேடைகளில் பாடிவந்த நிலையில், அவ்வப்போது திரையிசைப் பாடல்களைப் பாடுகிற வாய்ப்பும் அமைந்தது என்றவர், ‘‘‘தவமாய் தவமிருந்து’ படத்தில் ‘ஆட்காட்டி... ஆட்காட்டி...’ பாடலைப் பாட இயக்குநர் சேரன் என்னை அழைத்து வந்தார். 

ஆனால், இரண்டாவதாக ‘கில்லி’ படத்தில் நான் பாடிய ‘கபடி கபடி...’ பாடலே திரையில் முதலாக வெளிவந்தது. தொடர்ந்து கவிஞர் யுகபாரதி, இசையமைப்பாளர் வித்யாசாகரிடம் அறிமுகப்படுத்த, ‘சிவப்பதிகாரம்’ படத்திலும் பாடினேன்...’’ புன்னகைக்கிறார் சித்தன் ஜெயமூர்த்தி.

‘இந்த பொண்ணுங்களே இப்படித்தான் புரிஞ்சுபோச்சுடா...’ பாடலை ‘வருத்தப்படாத வாலிபர் சங்கம்’ படத்தில் பாடியதையும், ‘நம்ம வீட்டு பிள்ளை’ படத்தில் பாடிய ‘ஜிகிரி தோஸ்து...’ பாடலையும் குறிப்பிடும் சித்தன், ‘‘200 படங்களுக்கு மேல் நான் பாடியிருந்தாலும் இதுவரை 100 பாடல்கள் மட்டுமே திரையில் இடம்பெற்றுள்ளது...’’ என்கிறார்.