கொடைக்கானல்ல மதிகெட்டான் சோலை இருக்கு இல்லையா... அதுமாதிரி இடத்துல நடக்கும் கதை இது...

‘‘ஹாலிவுட் படம் பார்த்த திருப்தி ‘பிளாக்’ படம் பார்க்கும் ரசிகர்களுக்கு கிடைக்கும். பரவாயில்லையே... நம்ம ஊர்ல இந்த மாதிரி படங்களை டிரை பண்றாங்களே... என்ற எண்ணம் தோன்றும். நல்ல முயற்சின்னு ஆடியன்ஸ் பாராட்டுமளவுக்கு வித்தியாசமான படமாகவும் வெகுஜன படமாகவும் இருக்கும்...’’ நிதானத்துடன் பேச ஆரம்பித்தார் அறிமுக இயக்குநர் கே.ஜி.பாலசுப்ரமணி. பொட்டன்ஷியல் ஸ்டூடியோ தயாரிக்கும் இதில் ஜீவா, பிரியா பவானி சங்கர் முதன்மை வேடத்தில் நடிக்கிறார்கள்.

போஸ்டரில் யாரை அடிக்க உருட்டுக்கட்டையோடு நிற்கிறார் ஜீவா?

இது சயின்ஸ் ஃபிக்‌ஷன் மிஸ்ட்ரி ஸ்டோரி. ஓர் இரவில் நடக்கும் கதை. இரவு, இருள் என்பதைக் குறிக்கும் விதம், மனிதர்களுக்குள் ஒளிந்திருக்கும் கருப்பு பக்கங்களை குறிக்கும் விதம் என இரண்டு அர்த்தங்கள் பொருள்படும்படி இந்த டைட்டிலை வைத்தோம்.ஒவ்வொருவருடைய வாழ்க்கையிலும் நம்ப முடியாத சில விஷயங்கள் இருக்கும். அதை சொல்லும்போது ஏதோ கற்பனையா சொல்றார், கதையளக்கிறார்னு நினைப்போம்.

அதே போன்ற நம்ப முடியாத சம்பவம் நம்முடைய வாழ்க்கையில் நடக்கும்போது நாமும் நம்ப முடியாத கதை சொல்பவராக மாறிவிடுவோம். அப்போது ஏதோ காதுல பூ சுத்துறார்னு நம்மையும் காமெடியாக பார்க்க ஆரம்பிச்சுடுவாங்க.அது மாதிரி இதில் ஹீரோ வாழ்க்கையில் நம்பமுடியாத சில விஷயம் நடக்கிறது. அது ‘டுவைலைட் சோன்’ என்ற காலகட்டத்தில் நடக்கிறது. அதாவது இருளும் இல்லாமல், வெளிச்சமும் இல்லாமல் இருக்கும் நேரத்தைத்தான்’ டுவைலைட் சோன்’ என்பார்கள்.