ஃபிரான்ஸ் தலைநகர் பாரிஸில் கோலாகலமாக தொடங்கியிருக்கிறது கோடைகால ஒலிம்பிக் போட்டிகள். ஒரு திருவிழாவாகக் களைகட்டும் இதில் மொத்தம் 45 விளையாட்டுகளுக்கான போட்டிகள் நடைபெறுகின்றன. இந்தமுறை பிரேக் டான்ஸும் ஒரு போட்டியாக ஒலிம்பிக்கில் அங்கீகரிக்கப்பட்டுள்ளது. 

இந்தியாவைப் பொறுத்தவரை வில்வித்தை, தடகளம், பேட்மின்டன், பாக்ஸிங், ஹாக்கி, குதிரையேற்றம், கோல்ஃப், ஜூடோ, படகோட்டுதல், பாய்மரப் போட்டி, துப்பாக்கி சுடுதல், நீச்சல், டேபிள் டென்னிஸ், பளுதூக்குதல், மல்யுத்தம், டென்னிஸ்... எனப் பதினாறு விளையாட்டுகளில் மொத்தம் 117 வீரர்களும், வீராங்கனைகளும் பங்கேற்கின்றனர். இதில் இந்தியாவிற்காக தமிழகத்திலிருந்து தகுதி பெற்றிருக்கும் வீரர்கள், வீராங்கனைகள் பற்றிக் கொஞ்சம் பார்க்கலாம்.

தூத்துக்குடி மாவட்டம் முதலூரைச் சேர்ந்தவர் ஜெஸ்வின் ஆல்ட்ரின். இவர் நீளம் தாண்டுதலில் ஒலிம்பிக்கிற்கு தகுதிபெற்றுள்ளார். கடந்த 2022 உலக தடகள சாம்பியன்ஷிப்பில் தகுதிச் சுற்றுடன் வெளியேறினார். பின்னர் 2023 ஆசிய உள்ளரங்கு தடகள சாம்பியன்ஷிப் போட்டியில் வெள்ளிப் பதக்கம் வென்றார். 

அடுத்து நடந்த உலக தடகள சாம்பியன்ஷிப்பின் இறுதிப் போட்டியில் 11வது இடம் பிடித்தார்.  அவரின் தேசிய சாதனை 8.42 மீட்டராக ஆகும். இதன்படி இவர் உலக முன்னணி வீரர்கள் வரிசையில் இருக்கிறார். அதனால், ஒலிம்பிக்கில் பதக்கம் வெல்லும் வீரராக அறியப்படுகிறார் ஜெஸ்வின் ஆல்ட்ரின்.

மதுரையைப் பூர்வீகமாகக் கொண்டவர் சந்தோஷ்குமார் தமிழரசன். இவர் கடந்த ஆண்டு பாங்காக்கில் நடந்த ஆசிய தடகள சாம்பியன்ஷிப்பில் 400 மீட்டர் தடை தாண்டும் ஓட்டத்தில் 49.09 நொடிகளில் வந்து வெண்கலப் பதக்கம் வென்று கவனம் ஈர்த்தார். 

தொடர்ந்து உலகத் தடகள சாம்பியன்ஷிப்பில் 400 மீட்டர் தடை தாண்டும் ஓட்டத்தில் முதல் சுற்றில் 50.46 நொடிகளில் வந்து 7வது இடமே பிடித்தார். இருந்தும் ஒலிம்பிக்கில் அவரின் செயல்பாடு சிறப்பாக இருக்கும் என்கிற நம்பிக்கையை ஏற்படுத்தியுள்ளார்.

கோவையைச் சேர்ந்த வித்யா ராம்ராஜ் பெண்களுக்கான 4X400 மீட்டர் தொடர் ஓட்டம் மற்றும் 400 மீட்டர் தடை தாண்டும் ஓட்டம் இரண்டிலும் ஜொலிப்பவர்.

பின்னர் சீனாவின் ஹாங்சோ நகரில் நடந்த ஆசிய விளையாட்டுப் போட்டியில் வெண்கலப்பதக்கம் வென்றார். இவையெல்லாம் ஒலிம்பிக் போட்டிக்கு அவரைத் தகுதிபெற வைத்தன. இந்த ஒலிம்பிக்கில் பதக்கம் வெல்லும் வாய்ப்புள்ள வீரராக வலம் வருகிறார் பிரவீன். 

திருச்சியைச் சேர்ந்தவர் சுபா வெங்கடேசன். கடந்த டோக்கியோ ஒலிம்பிக்கிற்கு தேர்வானபோதே நிறைய கவனம் பெற்றார். ஆனால், அந்த ஒலிம்பிக்கில் பெண்களுக்கான 4X400 மீட்டர் தொடர் ஓட்டத்தில் தகுதிச்சுற்றுடன் இந்தியக் குழு வெளியேறியது.

கடந்த ஆண்டு சீனாவின் ஹாங்சோவில் நடந்த ஆசிய விளையாட்டுப் போட்டியில் கலப்பு 4X400 மீட்டர் தொடர் ஓட்டத்திலும், பெண்களுக்கான 4X400 மீட்டர் தொடர் ஓட்டத்திலும் வெள்ளிப் பதக்கம் வென்றது இந்திய அணி. இதில் சுபா வெங்கடேசனும் ஒருவராக ஜொலித்தார். இந்நிலையில் இந்த ஒலிம்பிக்கில் நிறைய எதிர்பார்ப்பை ஏற்படுத்தியுள்ளார் சுபா வெங்கடேசன்.

கடலூர் மாவட்டத்தைச் சேர்ந்தவர் இளவேனில் வாலறிவன். துப்பாக்கி சுடுதல் 10 மீட்டர் ஏர் ரைஃபிள் பிரிவில் பாரிஸ் ஒலிம்பிக்கிற்குத் தகுதி பெற்றுள்ளார்.

பிரித்விராஜ் தொண்டைமான் ஷாட்கன் எனப்படும் டிராப் ஷூட்டிங் பிரிவில் பாரிஸ் ஒலிம்பிக்கிற்குத் தகுதிபெற்றுள்ளார். இவர் முன்னாள் திருச்சி மேயரான சாருபாலா தொண்டைமானின் மகன் ஆவார். 

இவரின் தந்தை ராஜகோபால தொண்டைமானும் ஷாட்கன் துப்பாக்கி சுடுதல் வீரர்தான். பிரித்விராஜ் தொண்டைமான் கடந்த ஆண்டு தோகாவில் சர்வதேச துப்பாக்கி சுடுதல் விளையாட்டு கூட்டமைப்பு நடத்திய உலகக் கோப்பையில் ஆண்கள் ஷாட்கன் டிராப் பிரிவில் வெண்கலப் பதக்கம் வென்று அசத்தினார். பின்னர் அதே ஆண்டு இத்தாலியில் நடந்த ஷாட்கன் உலகக் கோப்பையிலும் வெண்கலம் வென்றார். இந்தப் பிரிவில் பதக்கம் வெல்லும் வாய்ப்புள்ள வீரராக மின்னுகிறார் பிரித்விராஜ் தொண்டைமான்.