தனுஷ் 50!

இது ரசிகர்களுக்கான மாஸ் ட்ரீட்!

தனுஷ், சந்தீப் கிஷான், ஜெயராம் காளிதாஸ் மூவருடன் துஷாரா விஜயன் நால்வரும் ஒன்றிணைந்து நிற்கும் போஸ்டர் வெளியாகி சமீபத்தில் இணையத்தைக் கலக்கி வருகிறது.
‘சன் பிக்சர்ஸ்’ தயாரிப்பில் தனுஷ் இயக்கத்தில் ‘ராயன்’ பெரும் எதிர்பார்ப்பை ஏற்படுத்தியிருக்கிறது. உடன் ஏ.ஆர்.ரஹ்மான் இசையில் வெளியான பாடல்களும் பட்டிதொட்டி எங்கும் பிரபலமாகி வரும் நிலையில் படம் குறித்த பல கேள்விகள் மனதில் எழ முகம் நிறைய சிரிப்புடன் வந்தமர்ந்தார் ஜெயராம் காளிதாஸ்.

‘ராயன்’... எப்படி வந்திருக்கு? நீங்கள் ‘ராயன்’ படத்திற்குள் வந்தது எப்படி?

‘போர்’ படம் முடிஞ்ச பிறகு தனுஷ் சார் கிட்டருந்து ஒரு கால். அவர் அழைப்பு வந்த உடனேயே செம ஹேப்பி. அவர் படம்னாலே நான் ஓகே சொல்லியிருப்பேன். ஆனாலும் அவர் சும்மா ‘என் இயக்கம், என் கதை, நடிக்கிறியா’ன்னு எல்லாம் கேட்கலை. கதை முழுக்கச் சொல்லி, என்னுடைய கேரக்டரை விளக்கிச் சொல்லி கடைசியா ‘நடிக்க சம்மதமா’ன்னு கேட்டார். அந்த தொழில் பக்திதான் அவருடைய இந்த வளர்ச்சிக்கு காரணம்.

‘என் படம் நடிக்கறியா’ன்னு கேட்டாலே நான் ஓகே சொல்லியிருப்பேன். ஆனால், அவருடய ப்ரொஃபஷனல் கொள்கை சர்ப்ரைஸா இருந்துச்சு. சாருடைய 50வது படம், அவரே இயக்கம்... டபுள் டிரீட். மாஸ் கிளாசா வந்திருக்கு. இயக்குநர் தனுஷ் சார் கூட வேலை செய்கிற வாய்ப்புகிடைச்சிருக்கு.

இயக்குநர் தனுஷ், நடிகர் தனுஷ்... யாரிடம் அதிக சவால்களை சந்தித்தீர்கள்?

இயக்குநர் தனுஷ் சாரை பயங்கரமா ரசிச்சேன். அவருடைய கிரியேட்டிவ், வேலையிலே இருக்கும் பக்தி, சின்சியாரிட்டி... இதெல்லாம் ரொம்ப ஆச்சர்யமா இருந்துச்சு.
எனக்கு ஷாட் முடிஞ்சா கூட நான் கேரவனுக்குப் போகாம கூடவே இருந்து அவர் வேலை செய்வதைப் பார்ப்பேன். காசே வாங்காம அசிஸ்டெண்ட் டைரக்டரா வேலை செய்து, ஃபீஸே இல்லாம தொழில் கத்துக்கிட்டேன்னு சொன்னாலும் மிகையாகாது.

மனுஷன் பம்பரமா சுத்துவார். மேக்கப் போட்டு நேரத்துக்கு சரியா வந்திடுவார். ஒரு பக்கம் ஷாட்டையும் கவனிக்கணும், தானும் முன்னாடியே ரெடியாகி நிற்கணும். உடன் மானிட்டர் பார்க்கறது, ஆங்கிள் செட் பண்றது, மத்தவங்க மேக்கப், காஸ்டியூம் துவங்கி எதிலே கரெக்‌ஷன்னாலும் அவரே முன்வந்து சொல்லி மாத்த சொல்வது இதெல்லாம் பெரிய விஷயம். இன்னும் அவர் கிட்ட கத்துக்க அவ்ளோ பாடம் இருக்கு.

படத்தின் கதை என்ன?