11 பேர் + ஸ்டைலிஷ் ஸ்பை + போர்... துருவ நட்சத்திரம் சீக்ரெட்ஸ்

‘‘இது ஜானுடைய சீக்ரெட் பேஸ்மென்ட் டீம். அவங்களுக்கு ஒரு முக்கியமான வேலை. அது என்ன வேலை... எதுக்காக அந்த டீம் உருவாகுது... இந்த டீமுக்கு பின்னணி என்ன... இதெல்லாம் சேர்ந்துதான் ‘துருவ நட்சத்திரம்: சாப்டர் 1’ படம்...’’ ஸ்டைலிஷ் டிரெய்லருடன் நம்மை வரவேற்கிறார் இயக்குநர் கௌதம் வாசுதேவ் மேனன்.

கடந்த ஐந்தாறு வருடங்களாகவே காதில் கேட்டுக் கொண்டிருந்த இந்தத் தலைப்பின் காரணம் என்ன?

நல்லவேளை நீங்களாவது அஞ்சாறு வருடங்கள் அப்படின்னு சரியா சொல்றீங்க! கிட்டத்தட்ட என்னுடைய ஸ்கூல் நாட்களில் நான் இந்தப் படத்தை ஆரம்பித்தது மாதிரி ஒரு பிம்பம் உருவாகியிருக்கு! படத்தின் ஹீரோ விக்ரம் பெயர்தான் துருவா. அவருடைய பெயர் ஒரு ஸ்பெஷலான நட்சத்திரத்தின் பெயர். ‘துருவ நட்சத்திரம்’. அந்த நட்சத்திரம் மாதிரி விக்ரமும் ஸ்பெஷலான நபர். அதனால் இந்தப் படத்துக்கு அந்தப் பெயர். அப்ப ஜான் யார் என்கிற கேள்வி வரும். அதைப் படத்தில் பார்த்து தெரிஞ்சிக்கோங்க.

யார் இந்த பேஸ்மெண்ட் டீம்?

சர்வதேச அளவில் ஒரு சீக்ரெட் குழு. அவங்களுக்கு மிஷன் கொடுக்கற வரையிலும் நம்மை மாதிரியே சாதாரண மக்களா ஏதோ ஒரு வேலையில் இருப்பாங்க. ஆனா, யாருக்கும் தெரியாது அவங்க எல்லாம் ஒரு சீக்ரெட் ஏஜெண்ட்னு. இந்த பேஸ்மெண்ட் குழுவை ஒரு முக்கியமான பதவியில் இருக்கும் ஒரு சீனியர் ஆபீசர் உருவாக்கி நடத்தறார். ஏன் எதுக்கு... இதுதான் கதை.

விக்ரமுடன் வேலை செய்த அனுபவம்?

‘நீங்களே இல்லை என்றாலும் இன்னொரு ஹீரோ வருவான், அதேபோல் ஒரு வில்லன் போனால் இன்னொரு வில்லனும் வருவான்...’ இதுதான் இந்த சாப்டர்களின் அடிப்படை.
இதைத்தான் கதையின் துவக்கத்திலேயே சொன்னேன். விக்ரமைப் பொருத்தவரை இதுதான் கேரக்டர்னு சொல்லிட்டா போதும். அதற்கு தன்னால் எவ்வளவு மெனக்கெட்டு உழைக்க முடியுமோ உழைத்து ஒரு கெட்டப் கொடுப்பார்.

அதற்கு மேல் நாம் அவர்கிட்ட எதுவும் கேட்கவே முடியாத அளவுக்கு நாம எதிர்பார்த்ததை விடவும் சிறப்பா அமைஞ்சிடும். இந்தக் கதையை நான் சூர்யாவுக்கு சொன்னேன். இன்னும் சில நடிகர்கள் கூட இந்தக் கதையை கேட்டிருக்காங்க. இதையெல்லாம் விக்ரம்கிட்ட சொல்லிட்டுதான் அவருக்கும் கதை சொன்னேன். மும்பை அட்டாக் முடிந்த 15வது வருடத்தில் நடப்பதாக கதை இருக்கும்.

கிரிக்கெட் வர்ணனையாளராக திடீர் அவதாரம் எப்படி நடந்தது?

மேட்ச் துவங்கறதுக்கு ஒரு மணி நேரம் முன்புதான் கூப்பிட்டாங்க. எனக்கும் சர்ப்ரைஸ்தான். இந்தப் படம் கிரிக்கெட் பத்தின படம் கிடையாது. ஆனால், இந்தப் படத்துல ஒரு டீம் இருக்காங்க. அந்த டீம் மொத்தம் 11 பேர் கொண்ட குழு. அந்த ஒரு சின்ன கனெக்‌ஷன் மட்டும்தான் இந்தப் படத்துக்கும் கிரிக்கெட்டுக்கும் உள்ள தொடர்பு.  எனக்கு என்னமோ இன்னொரு புரொஃபஷனுக்கான வாய்ப்பு உருவாகி இருக்கறேதானு தோணுது!

பார்த்திபன், விநாயக், ராதிகா, சிம்ரன்... முக்கியமாக பேஸ்மெண்ட் குழுவின் லீடரான இவர்களைப் பற்றி சொல்லுங்க?

பார்த்திபன் சார் நடிப்புக்கு தீனி போட்டுக்கிட்டே இருக்கணும். ‘ஏதாவது கொடுங்க’னு கேட்டுக்கிட்டே இருப்பார். ஆர்வம் உள்ள ஒரு கலைஞன் அவர். படத்துக்கு ஒரு பவர்ஃபுல் வில்லன் தேவைப்பட்டார். அதிலும் இதுவரை மக்கள் பார்க்காத ஒரு வில்லனாக இருக்கணும்னு யோசித்துதான் முதலில் இந்தக் கதைக்கு அருண் விஜய்யை வில்லனாக தேர்வு செய்தேன்.

அதற்கிடையில்தான் ‘என்னை அறிந்தால்’ முடித்தோம். தொடர்ந்து டிடி மலையாளத்தில் ஒரு படம் பார்த்துட்டு விநாயக் பெயரை சொன்னாங்க. அவர் முதலில் இந்தப் பட வில்லன், அப்பறம்தான் ‘ஜெயிலர்’ படம். அந்தப் படத்தில் அவர் வந்ததுக்கும் இப்போது ‘துருவ நட்சத்திரம்’ படத்தில் நீங்க அவரைப் பார்ப்பதுக்கும் மொத்தமா வேறு ஒரு விநாயக் தெரிவார்.
ராதிகா மேம், சிம்ரன்... என ஒவ்வொருவருக்கும் ஒவ்வொரு பின்னணி சோகம் இருக்கும். ஆனா, அந்தக் கதை எல்லாம் சொல்லி நான் கதையின் பரபரப்பைக் கெடுக்க விரும்பலை.

ஹீரோ விக்ரமுக்கும் ஒரு சின்ன பிளாஷ்பேக் உண்டு. அதையும் எடுத்தாச்சு. முழுமையான ஒரு ஸ்பை த்ரில்லர் படமா கொடுக்கணும்னு நினைச்சு இந்தப் படத்தை உருவாக்கி இருக்கேன்.
பத்மஸ்ரீ விருது பெற்ற பரதக் கலைஞர் தனஞ்செயன் சார்தான் இந்த பேஸ்மெண்ட் குழுவின் தலைவர். சாதாரணமா அவரை பார்ப்பதற்கு ஒரு சின்ன இன்ஸ்டிடியூட்டில் தமிழ், இங்கிலீஷ் சொல்லிக் கொடுக்கும் வாத்தியாராக இருப்பார். ஆனால், அவருக்குப் பின்னாடி இப்படி ஒரு குழு இருக்கு என்கிற எந்த தகவலும் யாருக்கும் தெரியாது. நடிகர் கௌதம் மேனனுக்கும் ஒரு பெரிய ரசிகர் பட்டாளம் உருவாகி இருக்கே!

கேட்க சந்தோஷமாதான் இருக்கு. ஆனா, ஒவ்வொரு முறையும் ஒரு நடிகனாக வீட்டை விட்டு கிளம்பும்போது வீட்டில் இருக்கிறவங்களுக்கு அது அவ்வளவா பிடிக்கலை. ‘நீ இதுக்காக வந்தவன் கிடையாது’னு ஒவ்வொரு முறையும் எனக்கு உணர்த்திட்டே இருக்காங்க. இப்பவும் கூட ஒரு பெரிய படத்துக்கான பேச்சுவார்த்தைகள் வந்திருக்கு. நிறைய வாய்ப்புகள் வருது. அதேநேரம் என்னுடைய டிராக் இது கிடையாதுன்னு ஒரு குரல் கேட்டுகிட்டே இருக்கு.

ஆனா, நடிக்க ஆரம்பிச்சதுக்கு அப்புறம் நடிகர்கள் மேலே ஒரு பெரிய மரியாதை வந்திருக்கு. வெற்றிமாறன் சார், லோகேஷ் கனகராஜ் மாதிரி இயக்குநர்கள் கூட வேலை செய்யும் பொழுது நிறைய கத்துக்கவும் முடிஞ்சது.  ஏதோ ஒரு காரணத்தால் நடிக்க வேண்டிய கட்டாயம் உண்டாச்சு. நடிச்சோம். ஒரு சில கேரக்டர்கள் ஒர்க் அவுட் ஆச்சு, ஒருசில கேரக்டர்கள் ‘இதையெல்லாம் நான் ஏன் நடிச்சேன்’னு ஓர் உணர்வைக் கூட கொடுத்துச்சு.