‘‘இந்தப் படம் முழுக்க முழுக்க 18 +’’ என ஆரம்பத்திலேயே சொல்லிவிட்டு நடுமுதுகில் சில்லென்ற உணர்வைக் கொடுக்கும் விதமான பிரத்தியேக டிரெய்லருடன் பேசத் தொடங்கினார் இயக்குநர் விவேக் கே. கண்ணன். 

ப்ரியா மணி, சாரா, ஜாக்கி ஷெராப், சன்னி லியோன் உள்ளிட்ட பலர் நடித்திருக்கும் ‘கொட்டேஷன் கேங்’ படத்தை காயத்ரி சுரேஷ், விவேக் கண்ணன் ஆகியோருடன் இணைந்து ஃபிலிமினாட்டி என்டர்டெயின்மென்ட் மற்றும் ஸ்ரீ குருஜோதி பிலிம்ஸ் தயாரித்திருக்கிறார்கள்.

‘கொட்டேஷன் கேங்’ என்ற வார்த்தை கேரளாவில் பிரபலமானது. அதாவது பணம் வாங்கிக்கொண்டு, அதுவும் கிடைக்கும் பணத்தைக் கொண்டு மிகப் பெரிய குற்றங்கள் செய்யும் கூலிப்படையைத்தான் ‘கொட்டேஷன் கேங்’ என கேரளாவில் சொல்வார்கள். ஆனால், இந்தப் படம் அவர்களைப் பற்றியது அல்ல.

அந்த வார்த்தை எனக்கு பிடித்திருந்ததால் அதை மட்டும் எடுத்துக்கொண்டேன். அந்த கும்பலைப் பற்றி கதையில் சொல்லப்பட்டாலும், அதை மட்டுமே முழுக் கதையாக எடுக்காமல், வேறு சில கதாபாத்திரங்கள் மற்றும் அவர்களுடைய கதையை ஒரே நேர்கோட்டில் சந்திக்கும்படி திரைக்கதையாக அமைச்சிருக்கேன்.

கூலிப்படை என்றாலே ஆண்கள்தான் இருக்கணுமா என்ற கேள்விதான் இந்தக் கதை உருவாகக் காரணம். ஒரு பெண் பத்து பேரை அடிப்பார் என்று சொன்னாலே காமெடியாகவும், சிரிப்புடனும்தான் பார்க்கிறோம். அந்த மொமென்டை மாற்றி ஆண்கள் மட்டுமல்ல பெண்களாலும் இது முடியும் என்பதுதான் கதை. கதை முழுக்கவே ப்ரியாமணி பார்வையில் நகரும். 

பேபி சாரா மற்றும் சன்னி லியோன் இரண்டு பேரையும் வேறு ஒரு களத்தில் வைத்து சிந்தித்தது ஏன்?

பேபி சாரா என்றால் மென்மையான குழந்தை... சன்னி லியோன் என்றால் கிளாமர்... என்ற டெம்பிளேட்டை பிரேக் செய்து வித்தியாசமான கேரக்டர்களிலும் அவர்கள் ஜொலிப்பார்கள் எனக் காட்ட நினைச்சேன். பேபி சாராவும் அவருடைய அப்பாவும் இந்த கேரக்டருக்கு முதலில் சம்மதிக்கவே இல்லை. 

பிறகு அவர்களைக் கன்வின்ஸ் செய்து நடிக்க வைத்திருக்கிறேன். போதைப் பழக்கத்துக்கு அடிமையான டீன் ஏஜ் கேர்ள் ஆக சாரா நடிச்சிருக்காங்க. அவங்களுக்கு தனியா பாடல் கூட இருக்கு. ஒரு பக்கம் பணத்திற்காக கொலை செய்யும் கேங்... அதில் இணையும் ஒரு டீன் ஏஜ் கேர்ள்... ஒவ்வொருவருக்கும் தனித்தனியாகக் கதை... அது அத்தனையும் சேரும் புள்ளிதான் படம்.  

‘அப்படியெல்லாம் எதுவும் இல்லை’னு நமக்கு நாமே ஆறுதல் எல்லாம் சொல்லிக்கொள்ள முடியாது. கண்கூடாக நானே பார்த்திருக்கேன். இதுதான் மாடர்ன் கல்ச்சர்... இதுதான் எதிர்காலம்னு நினைச்சுகிட்டு தன்னுடைய வாழ்க்கையை சீரழிச்சுக்கிற எதிர்காலத்தை நோக்கிதான் நாம பயணித்துக் கொண்டிருக்கோம். அதையும் இந்தப் படத்தில் சொல்ல முயற்சி செய்திருக்கேன்.

ஓடிடி தளங்கள் அதிகரித்ததால் 18 + மற்றும் வயலன்ஸ் படங்களைப் பார்க்கும் ரசிகர்கள் அதிகரிக்கத்துவங்கிட்டாங்க. அப்படியான ரசிகர்களை நோக்கிதான் இந்தப் படம். ஒருசில கதைகளை ஆழமா உள்ளதை உள்ளபடி சொல்லிதான் ஆக வேண்டி இருக்கு. சினிமா கிளிஷேக்கலா சொன்னாலும் வொர்க் அவுட் ஆகாது.