ஆகஸ்டு 22 முதல் ஒருமாத காலத்துக்கு தனது 384வது பிறந்தநாளை கோலாகலமாகக் கொண்டாடும் சென்னைக்கு கூவம் ஒரு திருஷ்டி பூசணிக்காய் என்றால் அது மிகையாகாது.

‘‘திருவள்ளூர் மாவட்டத்தில் தொடங்கி கடற்கரையில் உள்ள சென்னைப் பல்கலைக் கழகம் வரைக்குமான சுமார் 72 கிலோ மீட்டர் தூரத்துக்கு கூவம் ஆறு இருக்கிறது. திருவள்ளூரில் இருக்கும் திருவேற்கோலம் எனும் சிவன் கோயில் இருக்கும் இடம்தான் கூவத்தின் பிறப்பிடம். திருவேற்கோலத்தில் இருக்கும் ஒரு கிராமத்தின் பெயரே கூவம் கிராமம். 

உண்மையில் கூவம் என்ற பெயரே அண்மைக் காலத்ததுதான். ஆங்கிலேயர் காலத்தில் இந்தக் கூவம் ஆற்றை சிந்தாதரிப்பேட்டை ஆறு, பூந்தமல்லி ஆறு, திருவல்லிக்கேணி ஆறு என அந்தந்த இடத்தில் ஓடும் ஆற்றை வைத்தே ஆங்கிலேயர்கள் அழைத்தார்கள்.

‘‘கூவம் ஆற்றின் நீர் எங்கிருந்து வருகிறது என்றால் பாலாறு பிரிந்து கொசஸ்தலையாக மாறும் புள்ளியில் இருந்து. ஆம். இந்த கொசஸ்தலை ஆறு பிரிந்து கூவம் ஆறாக மாறும் இடம்தான் திருவேற்கோலம் அல்லது இன்றைய கூவம் கிராமம். 

1879ல் ஆங்கிலேயர்கள் இந்த கூவம் ஆற்றில் ஒரு தடுப்பணையைக் கட்டி கூவம் நீரை செம்பரம்பாக்கம் ஏரிக்கு திருப்பி விட்டார்கள். அதுமாதிரி 1942ல் திருவள்ளூர் மாவட்டத்தில் கேசவரம் எனும் இடத்தில் ஒரு தடுப்பணையைக் கட்டி கூவம் நீரை பூண்டி ஏரிக்கு திருப்பி விட்டார்கள்.

‘‘திப்பு சுல்தான் ஆங்கிலேயருடன் போரிட்டு இரண்டு முறை அவர்களை வென்றது... பல்லவர்கள் - சாளுக்கிய மன்னரான இரண்டாம் புலிகேசியோடு சண்டை... பிற்காலச் சோழர்கள் - சாளுக்கியர் போர்... இப்படி எல்லாமே இந்த கூவத்தின் கரைகளில்தான் நடந்தன. 

நுங்கம்பாகத்தில் இருக்கும் காலேஜ் ரோடு ஆங்கிலேயர் கூவத்தை ஒட்டி கட்டிய முதல் காலேஜ். சென்னைப் பல்கலைக் கழகம், ஆற்காடு நவாப்புகள் கட்டிய திருவல்லிக்கேணி கலாஸ் மகால், திரையரங்குகள், மாட மாளிகைகள்... எல்லாமே கூவத்தின் கரையை ஒட்டியே ஆங்கிலேயர்கள் கட்டினார்கள்.

இன்றைய நிலையில் சென்னைக்குக் குடிநீர் கிருஷ்ணா நதி, வீராணம் ஏரி, கடல் நீரை குடிநீராக்கும் திட்டங்கள் மூலம் கிடைத்தாலும் அதுவும் போதாத நிலையில்தான் சென்னை இருக்கிறது.