பெட்ரோல், டீசல், சமையல் எரிவாயு விலை தொடர்ந்து உயர்ந்துகொண்டே வருகிறது. சர்வதேச சந்தையில் கச்சா எண்ணெயின் விலை நிலவரத்தை அனுசரித்தே இந்தியாவில் பெட்ரோல், டீசல், சமையல் எரிவாயு ஆகிய வற்றின் விலை நிர்ணயமாகிறது. இதில் பெட்ரோல், டீசல் விலை தினசரியும்; சமையல் எரிவாயு சிலிண்டரின் விலை மாதந்தோறும் நிர்ணயிக்கப்படுகிறது.

மாதந்தோறும் நிர்ணயிக்கப்படும் சமையல் எரிவாயு சிலிண்டரின் விலையும் உயர்ந்துகொண்டே வருகிறது. வீட்டு உபயோக சிலிண்டர் கடந்த ஆண்டு நவம்பர் மாதம் 610 ரூபாயாக இருந்தது. அடுத்த மாதமே ரூ. 710 என்பதாக அதிரடியாக உயர்ந்தது. பிறகு மீண்டும் இவ்வருட பிப்ரவரியில் 785 ரூபாய்க்கு எகிறியது.

மார்ச் மாதம் மேலும் ஐம்பது ரூபாய் உயர்ந்து 835 ரூபாய்க்குப் போனது. ஜூலையில் ரூ. 850.50 என்பதாக உயர்ந்தது. ஆகஸ்ட்டில் ரூ. 875.50 என்பதாக உயர்ந்த இது, கடந்த மாதம் மேலும் இருபத்தைந்து ரூபாய் உயர்த்தப்பட்டு ரூ. 900.50 என்பதாக ஆனது. தற்போது அக்டோபர் மாதம் மேலும் பதினைந்து ரூபாய் இதுவரை உயர்ந்துள்ளது. இனியும் என்னாகுமோ என்று திருவாளர் பொதுஜனம் கதிகலங்கி நிற்கிறார்.

கடந்த 2020ம் ஆண்டு மட்டும் - அதாவது ஒரு வருடத்தில் மட்டும் பதினைந்து ரூபாய் வரை பெட்ரோல் விலை உயர்ந்தது. இந்த ஆண்டு இதற்குள்ளாகவே பதினைந்து ரூபாய் கூடிவிட்டது. மொத்தமாக ஏற்றினால் மக்கள் கொதிப்படைவார்கள் என தினமும் கால் பைசா, அரை பைசா என ஏற்றிக் கொண்டிருக்கிறார்கள்.

உண்மையில் சர்வதேச கச்சா எண்ணெய் விலை உயர்வென்பது ஒரு காரணம் மட்டுமே. நமது அரசுகள் பெட்ரோல் மற்றும் பெட்ரோலியப் பொருட்கள் மீது விதிக்கும் கட்டுப்படியாகாத பெரும் வரியை ஏன் குறைக்கக் கூடாது அல்லது தள்ளுபடி செய்யக் கூடாது என்பதே மக்களின் கேள்வி.

டீசலும் அப்படி ஒன்றும் இதற்கு சளைத்ததல்ல. கிட்டத்தட்ட ஐம்பத்தைந்து சதவீதத் தொகை டீசலுக்கு அல்ல; அதற்கான வரியாக அரசுக்குத்தான் செல்கிறது.பெட்ரோல் விலை ஏன் ஒவ்வொரு மாநிலத்திலும் ஒவ்வொரு மாதிரியாக இருக்கிறது என்பது அடிக்கடி எல்லோரும் கேட்கும் கேள்வி. இதற்கான பதில் எளிது.

மாநில அரசுகளின் வரிவிதிப்பு முறை ஒவ்வொரு மாநிலத்திலும் ஒவ்வொன்றாக இருப்பதால்தான் பெட்ரோல் விலை மாநிலத்துக்கு மாநிலம் மாறுகிறது. உதாரணமாக, தில்லியில் ஒரு லிட்டர் பெட்ரோல் 89 ரூபாயாக இருந்தபோது, ஒருசில மாநிலங்களில் இது நூறு ரூபாயைத் தொட்டுவிட்டது. மத்தியப்பிரதேசமும் ராஜஸ்தானும் இப்படி பெட்ரோலுக்கு அதிக  வரி விதிக்கும் மாநிலங்களில் குறிப்பிடத்தக்கவை.

நாட்டின் பெரும்பகுதி மக்களை விவசாயம் சார்ந்த தொழில்களில் வைத்திருக்கும் ஒரு நாட்டுக்கு இது எப்படி நன்மை பயப்பதாக இருக்க முடியும்? மேலும், காய்கறிகள் சந்தைகளுக்கு வந்து சேர்வதற்கான வண்டிச்சத்தமும் அதிகரிக்கிறது. இந்த விலை உயர்வை நகரங்களில் வசிக்கும் அடித்தட்டு மக்கள் முதல் மேல்தட்டு மக்கள் வரை அனைவரும்தான் சுமக்க வேண்டி இருக்கிறது.