ஒரு வீட்டில் திருடினால் திருடன்... பல வீடுகளில் திருடினால் வியாபாரி..!

ஜூலியன் அசாஞ்சே Vs வாட்ஸ்அப்

உலக அளவில் 200 கோடி, இந்திய அளவில் 34 கோடி பயனாளர்களைக் கொண்டுள்ள வாட்ஸ்அப் சமீபத்தில் அறிவித்த தனியுரிமைக் கொள்கை (Terms and Privacy Policy) பரபரப்பை ஏற்படுத்தியது. அதாவது பயனாளிகளின் தகவல்கள் இனிமேல் ஃபேஸ்புக்குக்கு ஷேர் செய்யப்படுவதோடு, பிற சேவைகளும் புதிதாக கொண்டு வரப்படுகின்றன என்றது. இது தொடர்பான குழப்பங்களும், அச்சங்களும் மக்கள் மத்தியில் எழ, புதிய நிபந்தனை மாற்றம் வாட்ஸ்அப் வர்த்தக சேவை தொடர்பானது; பயனாளிகள் சேவையில் எந்த மாற்றமும் இருக்காது என்று வாட்ஸ்அப் தரப்பில் விளக்கம் அளிக்கப்பட்டது.

“தனி நபர் தகவல்களை மிஷின்கள்தான் படிக்கும். மனிதர்கள் யாரும் படிக்க மாட்டார்கள். அதேபோல் ஹேக்கர்ஸோ, அரசோ யாரும் உங்கள் அந்தரங்க தகவல்களை ஒட்டுக் கேட்க முடியாது...” என்று கூறும் சைபர் நிபுணர் வினோத்குமார் ஆறுமுகம், புதிதாக வாட்ஸ்அப்பில் கொண்டு வரக்கூடிய அப்டேட், அதன் விளைவுகள் பற்றி விளக்கினார்.

“வாட்ஸ்அப் நம் தகவல்களில் இருக்கக் கூடிய மெட்டா டீடெயில்ஸை எடுத்துக் கொள்கிறது. மெட்டா டீடெயில் என்பது ஒரு தகவலை நீங்கள் யாருக்கு அனுப்புகிறீர்கள், எந்த லொக்கேஷனிலிருந்து எந்த லொக்கேஷனிற்கு போகிறது… என்பதில் ஆரம்பித்து செல்போனில் இருக்கக் கூடிய ஓஎஸ், என்ன மாடல் போன், என்ன போன் நம்பர் பயன்படுத்துகிறோம், கான்டெக்ட் டீடெயில்ஸ், பேட்டரி எவ்வளவு இருக்கு… போன்ற
தகவல்கள்.

அதேபோல் ஒரு மீடியா ஃபைல் அனுப்பினால், அந்த ஃபைல் ஒருவேளை டெக்னிக்கல் இஷ்யூவினால் டெலிவரி ஆகவில்லை என்றால் குறிப்பிட்ட நேரத்திற்குள் அழிக்கப்படுகிறது. அவ்வாறு அனுப்பப்படுகிற மீடியா ஃபைல்களையும் மிஷின் படித்து புரிந்துகொள்கிறது...” என்ற வினோத்குமார் ஆறுமுகம் இதனால் ஏற்படும் பாதிப்புகளையும் விளக்கினார்.

“பொதுவாகவே ஒரு appஐ பயன்படுத்தும்போது கான்டெக்ட்ஸ் அலோனுதானே கொடுக்கிறோம். ஏற்கனவே ஃபேஸ்புக், இன்ஸ்டாகிராம் போன்ற appகளில் நமது பிரைவசி கொடுத்திருக்கிறோம். அதனால் வாட்ஸ்அப்பில் கொடுப்பதன் மூலம் பெரிய பாதிப்பு வரப் போவதில்லை. இன்னும் சொல்லப்போனால் கூகுளில் நமது எல்லா பிரைவசிகளையும் பயன்படுத்த உரிமை கொடுத்திருக்கிறோம்.

எல்லா appகளும் நம் பிரைவசியை அவர்கள் லாபத்திற்கு தவறாக பயன்படுத்தும்போதுதான் கவலைப்பட வேண்டி உள்ளது. நம் டேட்டாக்களை அவர்கள் அரசியல் கட்சிகளுக்கோ அல்லது மூன்றாம் நிறுவனங்களுக்கோ விற்கலாம். அதை வைத்து நம் எண்ண ஓட்டம் என்னவாக இருக்கிறது என்பதை அறிந்து நுணுக்கமாக விளம்பரங்கள் கொடுக்க வாய்ப்புகள் உண்டு. இதனோடு அந்த தகவல்களை வைத்து அச்சுறுத்தலும் நிகழ்கிறது.

ஒவ்வொரு தனி நபரின் மனநிலை, அவர்களது சமூக சூழலை வைத்துதான் பாதிப்புகளின் அளவீடும் உள்ளது. கட்டுப்பாடே இல்லாமல் போய்க் கொண்டிருக்கும் இதனால் பெரிய சமூக பாதிப்புகள் நடந்து கொண்டுதான் இருக்கிறது. எந்தெந்த தகவல்களை இந்த appகள் எடுக்கிறது... இதன் சர்வர் எங்கு இருக்கிறது... இந்த தகவல்களை வைத்து தவறாக ஏதும் நடக்கிறதா... என்பதை அறிந்து கொள்ள மக்கள் முயலவேண்டும். இதற்காக அரசை வற்புறுத்த வேண்டும். சொல்லப் போனால் இந்திய அரசிடம் இவைகளைக் கட்டுப்படுத்துவதற்கான பாலிசிகள் இல்லை...” அழுத்தம்திருத்தமாகச் சொல்கிறார் வினோத்குமார் ஆறுமுகம்.