மாஸ்டர்

குற்றச் சிறுவர்களை அடைத்து வைத்திருக்கும் இல்லத்தை கைப்பற்றி அடாவடி செய்யும் ரௌடியை தட்டிக் கேட்பவரே ‘மாஸ்டர்’.கல்லூரிப் பேராசிரியராகப் பணியாற்றுகிறார் விஜய். மாணவர்களிடத்தில் பிரியமும் செல்வாக்கும் பெற்றிருந்தாலும் பாடம் நடத்தும் நேரம் போக மீதி எல்லாம் போதையில் கரைகிறது.

மாணவர் தேர்தலை நடத்த வேண்டாம் என கல்லூரி நிர்வாகம் முடிவெடுக்க, விஜய்யே பொறுப்பேற்று தேர்தலை நடத்த பிரச்னைகள் ஏற்படுகிறது. பிறகான சம்பவங்களின் தொடர்ச்சியாக அவர் அரசினர் கூர்நோக்கு இல்லத்தில் ஆசிரியராகப் பொறுப்பேற்க, அங்கே நடப்பவை கண்டு விஜய் ஆவேசம் கொண்டு அதற்கு காரணமானவர்களைப் பழிவாங்க புறப்படுவதே கிளைமாக்ஸ்.

புரொபஸர் விஜய் நேர்த்தியிலும் நடை உடை பாவனைகளிலும் கச்சிதம். பேராசிரியராகவும் சிறார் பள்ளியில் தன்னை முன்னிறுத்தும் விஜய்யுமாக இரண்டு வேறுபட்ட வடிவங்களை கொண்டு வந்ததில் கதையில் கவனம் சேர்கிறது. தனித்தனியாக அட்டகாசமாக உயிர் கொடுப்பதில் அள்ளுகிறது விஜய்யின் மேனரிசங்கள். நிஜமாகவே விஜய்யின் கேரியரில் ஒரு நல்ல படம். குடித்துவிட்டு எழுந்து ரெடியாகி கல்லூரிக்கு வருவதில் இருந்து இறுதியில் சிறுவர்களுக்காக பொங்கி எழுவது வரை அவர் டிஸ்டிங்ஷனில் தேர்வாகிறார்.