ஆன்லைன் கூலிப்படைகளை உருவாக்கிய ப. ஜா. க.!

Face B(JP)ook-மினி தொடர் 3

கடந்த 2018ம் ஆண்டு செப்டம்பர் 23ம் தேதி ராஜஸ்தானின் கோட்டா நகரில் பாஜக ஒரு பேரணிக்கு ஏற்பாடு செய்திருந்தது.
இந்தப் பேரணி சமூக வலைத்தளங்களில் இயங்கும் பாஜகவின் தன்னார்வலர்களுக்கானது என்பதுதான் விசேஷம். அப்போது பாஜகவின் தலைவராக இருந்த அமித்ஷா பேசும்போது, ‘‘நாம் மக்களிடம் எடுத்துச் செல்ல விரும்பும் எந்தத் தகவலையும் நம்மால் எளிதாக எடுத்துச் செல்ல இயலும்.

அது இனிப்போ, புளிப்போ, உண்மையோ பொய்யோ, நம்மால் அதை நாம் விரும்பிய வண்ணம் மக்களிடம் சேர்க்க இயலும்!’’ என்று முழங்கினார்.
அமித்ஷாவின் இந்தப் பேச்சை அதற்கு ஒரு வருடத்துக்கு முந்தைய இந்திய அரசியல் சூழலை வைத்து யோசித்தால் சில விஷயங்கள் பிடிபடும்.
அப்போது இந்தியாவின் மிக முக்கியத்துவம் வாய்ந்த அரசியல் கேந்திரமான உத்தரப்பிரதேசத்தின் தேர்தல் காலம்.

2017ம் ஆண்டின் பிப்ரவரி மற்றும் மார்ச் மாதத்தில் தன்னுடைய ஆன்லைன் ஆதரவாளர்கள் மற்றும் ஆன்லைன் கூலிப்படைகள் என மொத்தம் முப்பத்திரண்டு லட்சம் பேரை பாஜக திரட்டியது. பல்வேறு குழுக்களாகப் பிரிக்கப்பட்டிருந்த இந்தக் கூட்டத்துக்கு தினமும் காலை எட்டு மணிக்கு, ‘உண்மையை அறிவோம்’ என்ற பெயரில் ஒரு வாட்ஸ்அப் மெசேஜ் செல்லும்.

பெயர்தான் ‘உண்மையை அறிவோம்’; மற்றபடி அந்தத் தகவலில் மருந்துக்கும் உண்மை இருக்காது. முழுக்க முழுக்க ஜோடிக்கப்பட்ட பொய்கள், தவறான தகவல்கள், அரைகுறை தகவல்கள், மறைத்தும் குறைத்தும் எழுதப்பட்டவைதான் இருக்கும். விஞ்ஞானபூர்வமான ஆய்வு என்ற பாவனையில் சில இருக்கும். சில போட்டோஷாப்களாக இருக்கும். சில மார்ஃபிங், எடிட்டிங் செய்யப்பட்ட படங்களாக இருக்கும். புள்ளிவிவரங்கள் போல் சில ஜோடிக்கப்பட்டிருக்கும்.

இப்படியான வாட்ஸ்அப் மெசேஜ்கள் எப்போதும் பாஜகவின் தலைவர்களை உயர்வாகச் சொல்வது, எதிர்க்கட்சிகளை மோசமாகச் சித்தரிப்பது, அதாவது எந்த எல்லைக்கும் போய் ஆபாசமாக, அசிங்கமாக, அநாகரிகமாகச் சித்தரிப்பது வரை இருக்கும். இப்படி தனக்கு வரும் மெசேஜ்களை அவர்கள் மற்றவர்களுக்குப் பரப்பவேண்டும். குறிப்பாக, தனிநபர்களுக்கு அனுப்புவதைவிட கொத்துக் கொத்தாக இருக்கும் குரூப்களுக்கு அனுப்ப வேண்டும்.

இப்படி, ஒரு ஆன்லைன் கூலிப்படை ஜோடித்த பொய்தான், அப்போதைய உத்தரப்பிரதேச முதல்வரும் சமாஜ்வாடி கட்சித் தலைவர்களில் ஒருவருமான அகிலேஷ் யாதவ், தன் தந்தையான முலாயம் சிங் யாதவை அறைந்துவிட்டார் என்ற வாட்ஸ்அப் வதந்தி.
இந்த வதந்தி, தீ போலவே பரவி அமித்ஷா வரை சென்றது.

எதிர்க்கட்சித் தலைமை பெயர் நாறினால் தங்களுக்கு லாபம்தானே? ஆனால், அமித்ஷா இதைச் செய்ய வேண்டாமெனச் சொன்னார்.
அதிர்ச்சியடைய வேண்டாம். அவர் சொன்ன விதத்தைக் கவனியுங்கள். ‘‘இப்படி வதந்தி பரப்புவது உருப்படியான வேலைதான். ஆனால், இதைச் செய்யாதீர்கள் (கூட்டம் ஆரவாரம்). நான் சொல்வது புரிகிறதா? இதைச் செய்யாதீர்கள்...’’

அவர் தொடர்ந்தார்: ‘‘நம்மிடம் இதைச் செய்ய 32 லட்சம் பேர் இருக்கிறார்கள்...’’ என்றார். கூட்டம் மீண்டும் ஆரவாரம். தலைவர் தங்களுக்கு லாபம் தரும் விஷயத்தைச் செய்யாதே என்று சொன்னால், தொண்டர்கள் அதைச் செய்ய வேண்டும் என்பதைப் புரியாதவர்களா சங்பரிவார கும்பல்?! தலைவரின் ஆசீர்வாதத்தோடு முன்னிலும் வேகமாக, உற்சாகமாக செய்யத் தொடங்கினார்கள்.

வாட்ஸ்அப்பின் சர்வதேசத் தலைவரான கிரிஸ் டேனியல்ஸ் சமீபத்தில் ஓர் நேர்காணலில், வாட்ஸ்அப் ‘end-to-end encrypted’ வசதியை இரண்டு கோடிப் பேர் பயன்படுத்துவதாகத் தெரிவித் தார். வாட்ஸ்அப்பின் 90% மெசேஜ்கள் தனிநபரிடமிருந்து இன்னொரு தனிநபருக்குச் செல்வதுதான். மேலும் பல வாட்ஸ்அப் குரூப்களில் பத்து பேருக்கும் குறைவாகவே இருக்கிறார்கள்.

அப்படியானால், இத்தனை கோடிப் பேரைச் சென்று சேரும் ஒரு மெக்கானிசத்தை எவ்வளவு வெற்றிகரமாகச் செய்திருக்கிறார்கள் என்பதை வியக்காமல் இருக்க இயலவில்லை. உலகிலேயே சமூக வலைத்தளங்களை மிகச் சிறப்பாகப் பயன்படுத்தும் கட்சி பாஜகதான் என்பது அதன் அவப்புகழ்களில் ஒன்று.

சமூக வலைத்தளங்களைப் பயன்படுத்துவது அவப்புகழ் அல்ல. ஆனால், தங்களது ஆபாச - கெட்ட - முறைகேடான பிரசாரத்துக்கு அதை யார் பயன்படுத்தினாலும் அதனால் விளையும் புகழும் அங்கீகாரமும் அவமான கரமானதுதான். இஸ்லாமாபோபியா என்ற சொல்லுக்கு இஸ்லாமியர் மீதான அச்ச உணர்வு என்பது பொருள்.