ஒரு திரில்லர் படம் எப்படியிருக்க வேண்டும் என்பதற்கு உதாரணம் ‘ஜோசப்’. திக்... திக்... நிமிடங்களுக்கு நடுவில் ரொமான்ஸிலும் பட்டையைக் கிளப்பியிருக்கிறது இந்த மலையாளப்படம். தவிர, சமகால பிரச்னை ஒன்றை கையில் எடுத்து அதில் சிக்ஸர் அடித்திருக்கிறது.

கொலைக் குற்றவாளிகளைக் கண்டுபிடிப்பதில் கைதேர்ந்த காவல்துறை அதிகாரி ஜோசப். அவருக்கு ஸ்டெல்லா என்ற மனைவியும் ஒரு மகளும் இருக்கிறார்கள். எந்தவித பிரச்னையும் இல்லாமல் அவரது வாழ்க்கை மகிழ்ச்சியாக போய்க்கொண்டிருக்கிறது.

ஒரு கொலைச் சம்பவத்தை விசாரிக்கச் செல்கிறார் ஜோசப். அங்கே கொலையுண்டு அழுகிய நிலையில் ஒரு பெண் பிணமாகக் கிடக்கிறாள். அது ஜோசப்பின் முன்னாள் காதலி. தனது அழகிய காதலியை அழுகிப்போன பிணமாகப் பார்த்ததில் ஜோசப் பேய் பிடித்தவர்போல ஆகிவிடுகிறார்.

அவரால் எந்த ஒன்றிலும் சரியாக ஈடுபடமுடியவில்லை. மனைவி காதலுடன் அணுகும்போது கூட முன்னாள் காதலியின் அழுகிய பிணம்தான் அவருக்கு ஞாபகம் வருகிறது. தன்னுடைய காதலியைப் பற்றி மனைவியிடம் சொல்ல ஜோசப்பிற்கு பயம்.

மகளுக்கும் மனைவிக்கும் ஒரே மாதிரியான நிலை ஏற்பட்டதால் விபத்து நடந்த இடத்துக்குச் சென்று விசாரணையில் இறங்குகிறார் ஜோசப். அந்த விசாரணை, மருத்துவ உலகில் நடந்துகொண்டிருக்கும் முக்கியமான ஊழலை வெளிச்சம் போட்டுக்காட்டுகிறது.