சாமிதான் எங்களைக் காப்பாத்தணும்! கதறும் கோயில் வியாபாரிகள்

கொரோனா ஊரடங்கு எத்தனையோ வியாபாரங்களையும் அதை நம்பி வாழ்ந்த வியாபாரிகளையும் முடக்கியுள்ளது. இந்த நான்காவது கட்ட ஊரடங்கில் சில தளர்வுகளால் சில வியாபாரங்கள் கொஞ்சம் இயல்பு நிலையை நோக்கி திரும்பிக் கொண்டிருந்தாலும் கூட இன்னும்  பல தொழில் களால் எழ முடியவில்லை.

அதில், குறிப்பாக கோயில்களை நம்பியே வாழ்க்கையை நகர்த்தும் வியாபாரிகளும், அதைச் சார்ந்த தொழிலாளர்களின் நிலைமையும் படுமோசம்.
தமிழகத்தில் அறநிலையத் துறையின் கட்டுப்பாட்டில் 44 ஆயிரத்து 121 கோயில்கள் உள்ளன. இதில், 3 ஆயிரத்து 120 கோயில்கள் அதிக வருமானம் தரக் கூடியவை. அதில், பழனி முருகன் கோயில் முதலிடத்திலும், சமயபுரம் மாரியம்மன் கோயில் இரண்டாம் இடத்திலும் உள்ளன. இந்தக் கோயில்களைத் தவிர டாப் டென் லிஸ்ட்டில் திருச்செந்தூர், திருத்தணி, திருவண்ணாமலை, ஸ்ரீரங்கம், மதுரை, ராமேஸ்வரம், சுசீந்திரம், திருவேற்காடு ஆகிய கோயில்கள் உள்ளன.

இத்துடன் இன்னும் நிறைய கோயில்கள் லட்சங்களில் வருமானம் தரக்கூடியவையாக இருக்கின்றன. பக்தர்களின் வருகையே இதற்குக் காரணம்.
இந்தக் கொரோனா தொற்று ஒருபுறம் கோயில்களின் வருமானத்தை முடக்கியிருக்கிறது என்றால் மறுபுறம் கோயில்களைச் சுற்றி கடைகள் விரித்திருந்த வியாபாரிகளைக் கடனாளிகளாக ஆக்கியுள்ளது.

பூக்கடை முதல் தங்கும் விடுதியின் உரிமையாளர்கள் வரை பலரும் இன்று மனஅழுத்தத்தில் உள்ளனர். ‘‘எங்க வாழ்க்கையே இந்தப் பழனியாண்டவரை நம்பிதான் நகர்ந்திட்டு இருக்கு. நாங்க பரம்பரை பரம்பரையா இங்க வியாபாரம் பண்ணிட்டு இருக்கிறவங்க. ஆனா, கோயில்கள் இப்படி ரெண்டு மாசமா நடை சாத்தப்பட்டது வரலாற்றுல இதுவே முதல் தடவை...’’ என வேதனையாகப் பேசத் தொடங்கினார் பழனி நகர அனைத்து வணிகர் சங்கங்களின் கவுரவத் தலைவரும் ஸ்ரீகந்தவிலாஸ் கடை உரிமையாளருமான செல்வ
குமார்.