கொடூரமாகக் கொன்ற குற்றவாளியை இனங்காண நடக்கும் போராட்டமே ‘கொலைகாரன்’. ஒரு கொலை நடக்கிறது. முகம் தெரியாத அளவுக்கு அடித்து உடல் எரிக்கப்படுகிறது. யாரென அடையாளம் காணப்புகுந்தால் ஆயிரம் முடிச்சுகள்.

ஒவ்வொன்றாக ஆராயத் தொடங்குகிறார் துப்பறியும் அதிகாரி அர்ஜுன். அடிதடியில் இறங்காமல், இந்த வேலையில் ஈடுபடும் அவருக்கு ஹீரோயின் அஷிமா, அவர் அம்மா சீதா, இவர்களின் எதிர் வீட்டில் வசிக்கும் விஜய் ஆண்டனி ஆகியோர் மீது சந்தேகப்பார்வை விழுகிறது.

இவர்களில் இந்த கொலையை செய்தது யார், ஏன், எப்படி என ஆராயப்புகுவதே பின்கதை. புள்ளிகள் இணைத்து ஓவியம் தீட்டுவது எளிது. அதற்கு புள்ளிகள் சரியாக இருக்க வேண்டும். அப்படி தனக்கான புள்ளிகளைக் கொண்ட ஸ்க்ரிப்ட்டை கண்டறிந்ததுதான் விஜய் ஆண்டனியின் பலம்.

எல்லோருக்கும் இசைவான அண்டர் கரண்டில் அருமையான இணைப்பைக் கொண்ட திரைக்கதை அமைப்பு நச்! அர்ஜுன் புலன்விசாரணை செய்யும் காட்சிகளில் ‘பின்றான்டா’ என ரசிகர் ஒருவரின் கமெண்டுக்கு தியேட்டரே லைக்ஸ் போடுகிறது.

ஆரம்பத்தில் மகா அமைதிகொண்டும் பின் அதிரடியில் இறங்கும்போதும் விஜய் ஆண்டனி உச்சம் காட்டுகிறார். யார்தான் கொலை செய்தது என நமக்கான மூளை சுறுசுறுப்படையும் போது படத்திலும் அதற்கான வேலைகள் நடக்கிறது. நிஜமாகவே அவரது கேரியரில் நல்ல படம். எந்த சந்தேகம் வந்தாலும் பரபர திரைக்கதையில் அதை நினைவில் வைக்காமல் மறக்கடிக்கிறது இயக்கம்.