பகவான்-32

வேண்டாத விருந்தாளி!

எல்லாமே சரியாகத்தான் நடந்துகொண்டிருந்தது.ரஜனீஷ்புரத்திலும் சரி, ஐரோப்பா மற்றும் மற்ற நாடுகளில் அமைந்திருந்த ரஜனீஷ் மையங்களிலும் சரி,அன்றாட நிகழ்வுகள் சிறப்பாகவே நடந்தேறி வந்தன. ஓஷோவின் புதிய சமுதாயம் என்கிற கனவு நனவாகும் நாள் நெருங்கி விட்டதாகத்தான் அனைவரும் கருதிக் கொண்டிருந்தார்கள்.

ரஜனீஷ் அகாடமி மற்றும் நூலகங்கள் சிறப்பாக உருவாகிக் கொண்டிருந்தன. பகவானின் கருத்துகளும், சிறந்த உரைகளும் நூல் வடிவில் பல்வேறு மொழிகளில் பிரசுரமாகத் தொடங்கியிருந்தன. அவருக்காகவே சிறப்புப் பத்திரிகைகள் தொடங்கப்பட்டன. விழாக்கள் திட்டமிடப்பட்டு அவை வெகு கோலாகலமாக நடந்து கொண்டிருந்தன.

அதே நேரம் பகவானைக் குறித்த எதிர்மறையான செய்திகளும் ஊடகங்களில் பரவலாக வரத் தொடங்கின. ரஜனீஷ்புரம் குறித்த சர்ச்சைகள் கிசுகிசுக்களாக மக்கள் மத்தியில் பேசப்பட்டுக் கொண்டிருந்தன. நேர்மறையாகவோ, எதிர்மறையாகவோ உலகம் முழுக்க அறியப்படும் விவிஐபியாக ஓஷோ உருவெடுத்திருந்தார்.

ஆசிரமத்துக்கு நிதியுதவி செய்ய நிறைய தொழிலதிபர்கள் அடையாளம் காணப்பட்டுக் கொண்டே இருந்தார்கள். எல்லாமே பகவான் எதிர்பார்த்த மாதிரிதான் நடந்துகொண்டு இருந்தது. ஷீலா, இரவும் பகலுமாகக் கடுமையாக உழைத்துக் கொண்டிருந்தார்.ஆனால் -“ஏதோ சரியில்லை...” என்று அடிக்கடி சொல்ல ஆரம்பித்தார் ரஜனீஷ்.ஒரு நாள் திடீரென ஷீலாவை அழைத்தார்.

“ஷீலா, எனக்கு புதியதாக முப்பது ரோல்ஸ்ராய்ஸ் கார்கள் வேண்டும்!”பகவானை ஆச்சரியமாகப்பார்த்தார் ஷீலா.“பகவானே! ஏற்கனவே நம்மிடம் கிட்டத்தட்ட நூறு ரோல்ஸ்ராய்ஸ்கள் இருக்கின்றன...”“எனக்குத் தெரியாது என்று நினைத்தாயா? நான் கேட்டது வேண்டும். அதுவும் ஒரே மாதத்தில். முடியுமா முடியாதா என்று மட்டும் சொல்!”பகவானிடம் அதுநாள் வரை ‘முடியாது’ என்கிற வார்த்தையை ஷீலா சொன்னதே இல்லை. எப்போதுமே அவர் சொல்லி முடிப்பதற்கு முன்பாகவே ‘உடனே செய்துவிடுகிறேன்’ என்றுதான் சொல்வார்.

அன்று ஏனோ, எதுவுமே சொல்லாமல் நின்றார்.ஏனெனில் முப்பது கார்களுக்கு மூன்று முதல் நான்கு மில்லியன் அமெரிக்க டாலர்கள் செலவாகும். அன்றைய தேதியில் அது மிக மிகப்பெரிய தொகை.ரஜனீஷ்புரத்தின் பட்ஜெட்டில் மட்டுமின்றி, உலகம் முழுக்க பரவியிருந்த மற்ற மையங்களுக்கு செலவிடப்பட்டுக் கொண்டிருக்கும் நிதியிலும் கையை வைக்க வேண்டியிருக்கும்.பகவான் கேட்டதைச் செய்துகொடுத்தால், மற்ற பணிகள் மொத்தமாக பாதிக்கப்படும். ஏன் அவர் கார்களுக்காக குழந்தை மாதிரி அடம் பிடிக்கிறார் என்று குழம்பினார் ஷீலா.

எப்படியாயினும் ஆசிரம நிதியில் கை வைப்பதில்லை என்கிற முடிவுக்கு வந்துவிட்டார்.இரண்டு நாட்கள் கழித்து பகவானைச் சந்தித்தார் ஷீலா.“பகவான்! இப்போதைக்கு புதிய கார்கள் வாங்குமளவுக்கு நமக்கு நிதி வசதியில்லை. தயவுசெய்து மன்னிக்கவும்...” என்று கேட்டுக் கொண்டார்.
“பரவாயில்லை ஷீலா!” என்று புன்னகையோடு சொன்னார் பகவான்.

மறுநாளே ஷீலாவை அழைத்தார். அவரது கையில் ஒரு பேப்பரை நீட்டினார். சுமார் நாற்பது பெயர்கள் அதில் எழுதப்பட் டிருந்தன. அனைவருமே பெரிய பணக்காரர்கள். பகவானின் சீடர்கள்.“இவர்கள் அனைவரையும் நான் நேரடியாக சந்திக்க வேண்டும். ஒரே சந்திப்பில் அத்தனை பேரும் வரவேண்டும். ஏற்பாடு செய்...” என்றார்.

அப்போது வரை எதுவாக இருந்தாலும் ஷீலாவைக் கேட்டே செய்யும் பகவான், தானே தன்னிச்சையாக ஒரு முடிவெடுக்க முனைந்திருக்கிறார் என்பதைப் புரிந்துகொண்டார் ஷீலா.எதுவும் சொல்லாமல், அந்தப் பட்டியலில் இருந்த ஒவ்வொரு தொழிலதிபரையும் தொலைபேசியில் தொடர்பு கொண்டார்.“பகவான், உங்களைச் சந்திக்க விருப்பமாக இருக்கிறார். ஒரு சந்திப்புக்கு ஏற்பாடு செய்திருக்கிறார்...” என்று தகவல் தெரிவித்தார்.

அழைப்பு கிடைக்கப் பெற்றவர்கள் அத்தனை பேரும் ஆனந்தக் கூத்தாடினார்கள். இதுநாள் வரை கூட்டத்தில் பத்தோடு பதினொன்றாகவே பகவானைச்சந்தித்துப் பழக்கப்பட்டவர்கள். தங்கள் பெயரைக் குறிப்பிட்டு பகவான் அழைத்திருப்பதை தங்களுக்கு பெரிய கவுரவமாக எடுத்துக் கொண்டார்கள். அதிலும் இம்முறை பகவானை அவர் வசிக்கும் வீட்டிலேயே சந்திக்க ஏற்பாடு செய்யப்பட்டிருந்தது. பொதுவாக வீட்டில் அவர் வெகுசிலரைத் தவிர வேறு யாரையும் சந்திப்பதில்லை.

சந்திப்பு வெகு சிறப்பாக நடந்தது.“நான் உங்களுக்கு கொடுக்க முடிந்தது வாழ்க்கை வழிகாட்டுதல்களை மட்டுமே. பதிலுக்கு உங்களால் எவ்வளவோ கொடுக்க முடியும்” என்று நேரடியாகவே பகவான் பேசினார்.ஷீலாவுக்கு இந்தப் பேச்சு பிடிக்கவில்லை. எதுவாக இருந்தாலும் இதுநாள் வரை தன்னிடம் மட்டுமே கேட்டுக்கொண்டிருந்தவர், இப்போது நேரடியாக பக்தர்களிடம் அவராகவே கேட்கிறாரே என்று அதிருப்தி அடைந்தார்.