இரு குடும்பங்களுக்கு இடையிலான பகையில் அடியாளாக நுழைந்த நக்சல்பாரிகள்!

போஸ்ட் மார்ட்டம்-7

அனந்தப்பூர் மாவட்டத்தின் பெனுகொண்டா சட்டமன்றத் தொகுதிக்குட்பட்ட வெங்கடபுரம் என்னும் கிராமத்தில் 28-05-1957-ல் பிறந்தவர்தான் பரிதலா ரவி. இவருடைய அப்பா ஸ்ரீராமுலு, அப்போதே 300 ஏக்கர் நிலங்களுக்குச் சொந்தக்காரர். ஆனாலும் மார்க்சிய சித்தாந்தத்தின் மீது நம்பிக்கை கொண்டவர். பரிவு கொண்டவர்.  இதனாலேயே தனது நிலங்களின் பெரும் பகுதியை ஏழை, எளிய மக்களுக்குப் பிரித்துக் கொடுத்திருக்கிறார். அத்தோடு அந்தப் பகுதி ஏழை மக்களுக்குத் தலைவராகவும் இருந்திருக்கிறார்.

இந்த மாவட்டத்தின் பெரும்பாலான நிலங்கள் கனகன்பள்ளி பண்ணையாரான கங்குல நாராயண ரெட்டி என்பவரிடமும், சென்னகொத்தபள்ளி பண்ணையார் சேனா சென்னா ரெட்டி என்பவரிடமும்தான் இருந்திருக்கின்றன. இவர்களிடம் இருந்த 600 ஏக்கர் நிலங்களை பராமரித்ததும் அவற்றை ஏழை, எளிய உழைக்கும் மக்களிடம் கொடுத்து பாடுபட வைப்பதும் வேறு யாருமல்ல... பரிதலா ரவியின் அப்பா ஸ்ரீராமுலுதான்!

மார்க்சிய சித்தாந்தத்தில் நம்பிக்கை கொண்ட ஸ்ரீராமுலு, 1971ம் ஆண்டு மார்க்சிஸ்ட் லெனினிஸ்ட் கட்சி எனப்படும் நக்சல்பாரி இயக்கத்தில் சேர்ந்தார்.
ஏற்கனவே உழைக்கும் மக்களிடம் அவருக்கு நல்ல பெயர் உண்டு. இப்பொழுது அதற்கேற்ற சித்தாந்தமும் சேர்ந்து கொள்ள... மடமடவென நக்சல்பாரி இயக்கத்தின் முக்கிய தலைவர்களில் ஒருவராக உருவெடுத்தார்.

என்றாலும், நக்சல்பாரி இயக்கத்தின் கொள்கைகளில் ஒன்றான அழித்தொழிப்பு நடவடிக்கைகளில் ஸ்ரீராமுலு இறங்கியதில்லை என இந்த நிமிடம் வரை மார்க்சிய லெனினிய இயக்கம் சொல்லி வருகிறது! ரைட். விஷயத்துக்கு வருவோம்.அனந்தப்பூர் மாவட்டத்தின் பெரும்பாலான நிலங்கள் இருவர் கைகளில் மட்டுமே இருந்தன என்று பார்த்தோம் இல்லையா!இதில் கங்குல நாராயண ரெட்டியின் நிலங்களை ஸ்ரீராமுலு ஏழைகளுக்கு வாரிக் கொடுத்ததையும் அதன் வழியாகக் கிடைத்த புகழை, தானே அனுபவித்ததையும் கண்ட இன்னொரு பண்ணையாரான சென்னா ரெட்டி ஆத்திரமடைந்தார்.

மெல்ல மெல்ல கங்குல ரெட்டியின் மனதை மாற்றி ஸ்ரீராமுலுவுக்கு எதிராகத் திருப்பிவிட்டார்!இதனால் கங்குல ரெட்டி, சென்னா ரெட்டி ஆகிய இருவரும் ஒரே நேரத்தில் ஸ்ரீராமுலுவுக்கு பகைவர்களானார்கள்! தங்கள் நிலங்களை பராமரிக்கும் பொறுப்பை ஸ்ரீராமுலுவிடம் தருவதையும் நிறுத்தினார்கள்.இந்த விஷயத்தை, தான் சார்ந்த நக்ஸல் இயக்கத்தினரிடம் எடுத்துச் சொல்லி மக்களை போராட்டத்துக்கு தயார்படுத்தத் தொடங்கினார் ஸ்ரீராமுலு.

சென்னா ரெட்டிக்கு பயமும் கோபமும் ஒருசேர எழுந்தது. இனியும் ஸ்ரீராமுலுவை விட்டுவைத்தால் தங்கள் கதி அதோகதிதான் என்ற முடிவுக்கு வந்தவர், ஸ்கெட்ச் போடத் தொடங்கினார். ஸ்ரீராமுலுவின் உதவியாளர்களில் ஒருவர், வகையாக சிக்கினார். இவரை வைத்தே ஸ்ரீராமுலுவை போட்டுத் தள்ள சென்னா ரெட்டி முடிவு செய்தார்.

1975ம் ஆண்டு மே 29ம் தேதி.பக்ஸம்பள்ளி என்னும் ஊரில் நடந்த ஒரு கல்யாணத்துக்குச் செல்ல ஸ்ரீராமுலு பேருந்தில் புறப்பட்டார்.அசைன்மென்ட் கொடுக்கப்பட்ட உதவியாளர் அவரைப் பின்தொடர்ந்தார்.சரியாக பஸ் ஸ்டாண்ட் அருகில் யாரும் எதிர்பார்க்காத நேரத்தில் ஸ்ரீராமுலுவை வெட்டிச் சாய்த்தார். அலறிய மக்கள் உதவியாளரைப் பிடிப்பதற்குள் அவர் தப்பி ஓடிவிட்டார்.

இந்தப் படுகொலைதான் 50 ஆண்டுகளாகத் தொடரும் இரத்த சரித்திரத்தின் தொடக்கப் புள்ளி! ஸ்ரீராமுலு படுகொலை செய்யப்பட்டபோது பரிதலா ரவிக்கு வயது 18. தன் அப்பாவைப் போல் இவர் எந்த நக்ஸல் இயக்கத்திலும் இல்லை; எந்தப் போராட்டத்திலும் பங்கேற்கவில்லை.
ஆனால், பரிதலா ரவியின் அண்ணன் ஹரி, தன் தந்தையைப் போலவே பண்ணையார்களுக்கு எதிரான போராட்டங்களில் ஈடுபட்டு வந்தார்.

ஸ்ரீராமுலுவின் படுகொலைக்குப் பின், அந்தத் தீவிரம் அதிகமானது. முறைப்படி நக்ஸல் இயக்கத்தில் இணைந்தார் ஹரி.மார்க்சிய லெனினிய இயக்கத்தில் ஹரி இருந்த காலத்தில் பல படுகொலைகளுக்கு சாட்சியாகவும், சில கொலைகளுடன் நேரடித் தொடர்பிலும் அவர் இருந்ததாக காவல்துறை ரெக்கார்ட் தெரிவிக்கிறது.

இதனால் அப்பொழுது தேடப்படும் குற்றவாளிகளில் ஒருவராக ஹரியும் இருந்திருக்கிறார்!