தமிழக முதல்வர் இதைப் பிடிப்பாரா?

சேலம் - சென்னை எட்டு வழிச்சாலை திட்டத்தை ரத்து செய்துள்ளது சென்னை உயர் நீதிமன்றம். ஆனாலும் தமிழக முதல்வர் எடப்பாடி பழனிச்சாமி, ‘‘இந்தத் திட்டத்தை நிறைவேற்றுவோம்...’’ என பல மேடைகளில் சூளுரைத்து வருகிறார். ‘‘எட்டு வழிச்சாலை வந்தால் கிழக்குத் தொடர்ச்சி மலையின் ஒரு பகுதியை இழக்க நேரிடும்.

அத்துடன் அங்கே வீற்றிருக்கும் இயற்கை வளங்கள் பாதிப்படைந்து இயற்கைக்கும் மக்களுக்கும் கேடு உண்டாகும்...’’ என தொடர்ந்து எச்சரித்து வருகிறது ‘பூவுலகின் நண்பர்கள்’ என்கிற சுற்றுச்சூழல் அமைப்பு. இதுகுறித்து அந்த அமைப்பின் இதழ்களில் தொடர்ச்சியாக கட்டுரைகளை எழுதிவரும் கப்பிக்குளம் ஜெ.பிரபாகரைச் சந்தித்து உரையாடினோம்.

‘‘இந்தியாவின் தென்பகுதியில் உள்ள மேற்குத் தொடர்ச்சி மலை மற்றும் கிழக்குத் தொடர்ச்சி மலை இரண்டும் தென்னகத்து இயற்கை அரண்கள். அதிலும் மேற்கைவிட கிழக்குத் தொடர்ச்சி மலை மிகவும் பழமையானது. இந்த மலையானது இந்தியாவின் கிழக்குக் கடற்கரையான வங்காள விரிகுடாவுக்கு இணையாக மேற்கு வங்காளத்தில் தொடங்கி ஒடிசா, ஆந்திரா, கர்நாடகா வழியாக தமிழ்நாட்டின் நீலகிரி மலையில் போய் முடிகிறது.