எப்படிப் பார்த்தாலும் பல்லாவரத்திலிருந்து வந்த பொண்ணுதான் நான்!

‘‘ஹாய்... எப்படி இருக்கீங்க...?’’

கண்களால் சிரிக்கிறார் சமந்தா. பேசும்பொழுதெல்லாம் மனசைப் பிடிக்கிற மனுஷி. பரிவும் சந்தோஷமும் விளையாடும் மேஜிக் கண்கள், மர்மப் புன்னகை என பார்ப்பவரை அடிமைப்படுத்தும் அழகில் சமந்தா! பார்த்துப் பார்த்துதான் படம் செய்கிறார். நிறைய ஹீரோக்கள் புதுப்படங்களுக்கு ஆசைப்பட்டுக் கேட்டும் ‘‘ஸாரி, டேட்ஸ் இல்லை...’’ என மறுத்திருக்கிறார்.

‘‘நிஜமாகவே நான் கொஞ்சம் பிஸி...’’ என்கிறார் சாம்.‘‘தெலுங்கில் இரண்டு மூணு படங்கள் போயிட்டு இருக்கு. இப்ப பாருங்க, ‘யு டர்ன்’, ‘சீமராஜா’ இரண்டுமே அடுத்தடுத்து வருது. ‘யு டர்னி’ல் பத்திரிகையாளரா வரேன். மேக்கப்பில் கவனம் செலுத்தாமல், ஹேர்ஸ்டைல் மாத்திக்கிட்டு செய்திருக்கேன்.

இந்தப் படத்தை சாவகாசமா உட்கார்ந்து பார்க்க முடியாது. பரபரன்னு சீட் நுனிதான் உங்களுக்கு. கிட்டத்தட்ட இதில் என்னைப் பார்த்தா பாய்ஸ் லுக் இருக்கும். பத்திரிகை உலகம் அதிகமும் ஆண்களோட உலகம். நேரம் காலம் இல்லாமல் அவங்கதான் பல திசையிலும் ஆடி ஓடி செய்ய முடியும்னு நினைச்சுக்கிட்டு இருக்காங்க.

அப்படியிருக்கிற இடத்தில் என் இடம் இதில் கவனமாக செய்யப்பட்டு இருக்கு. பாடல்கள் இல்லை. த்ரில்லராக போய்க்கிட்டு இருக்கும்போது எமோஷன் வந்து நிக்கும். இந்த வகையான ஜானர்னு சட்னு சொல்லி விட முடியாது. புத்திசாலித்தனமான படம். இயக்குநர் பவன்குமார் தமிழில் நானே நடிக்கணும்னு கேட்டுக்கிட்டதோடு, எனக்காக அவர் வெயிட் பண்ணினார். நான் சந்தோஷமாக நடிச்சுக் கொடுத்த படம். இப்ப சினிமா மாறிக்கிட்டு இருக்கு இல்லையா, இந்த சமயத்திற்கு அருமையா பொருந்தி வருகிற படம்...’’ நம்பிக்கையுடன் பேசுகிறார் சமந்தா.

‘சீமராஜா’வில் கிராமத்துப் பெண்ணாக வந்திருக்கீங்க..!
‘சீமராஜா’ பக்கா ஃபேமிலி படம். தப்பே பண்ணாது. முழு குடும்பமாக இரண்டு தடவை பார்த்தால் கூட நல்லாயிருக்கும். இந்த பொன்ராம் - சிவா - சூரி கூட்டணியோட இருந்தாலே சிரிப்புதான். கையில் ஒரு டயலாக் சீட் வச்சிருப்பாங்க. ஸ்பாட்டில் பார்த்தா அதுவே காமெடி பட டைப்பில் வரும். அடுத்து என்ன டயலாக் அடிக்கப் போறாங்களோன்னு த்ரில்லா இருக்கும்.

கதையில் சில முக்கியமான திருப்பங்களுக்கு நான்தான் காரணமா இருக்கேன். இப்ப சினிமா எழுத்தாளர்களுக்கு பெண்களுக்கு ஒரு நல்ல இடம் ஸ்கிரிப்ட்டில் தரணும்னு எண்ணம் வந்திருக்கு.எப்பவும் சந்தோஷமாகவும், இயல்பாகவும் இருக்கீங்க...சாதாரணமான பொண்ணுதான் நான். வெளியில் ஒரு வெற்றிகரமான நடிகைன்னு பெயர் வந்திருக்கலாம். எப்படிப் பார்த்தாலும் பல்லாவரத்திலிருந்து வந்த பொண்ணுதான் நான். எவ்வளவு கஷ்டப்பட்டு இந்த இடத்திற்கு வந்திருக்கேன்னு மறக்கவே இல்லை.

மனசை கலகலன்னு வச்சுக்கிட்டால், எங்கேயும் எப்போதும் சந்தோஷம்தான். இந்த நடிப்புத் தொழிலை ரொம்பவும் ரசிக்கிறேன். சினிமாவிற்கு வருவேன்னு நினைச்சுக்கூட பார்த்தது கிடையாது. அதற்கான எந்தத் தொடர்பும் என் ஃபேமிலியில் கிடையாது. இன்னிக்கு முன்னணி நடிகர்கள் நிறைய பேரோட நடிச்சிட்டேன். அதெல்லாம் ஒரு பிளஸ்ஸிங்!

ஆரம்பத்தில் இருந்த விளையாட்டுத்தனம் போய் இப்ப தீவிரமா சினிமாவை பார்க்கிறீங்க...
எஸ். நம்பிக்கை வந்திருக்கு. எதாவது ரோல் கொடுத்தால் அதற்கு நியாயம் செய்யணும்னு ஒரு கண்டிப்பு வந்திருச்சு. அதற்கு இடம் தராத படங்களை நானே ஒதுக்கி விடுறேன். படத்திற்கு படம் இம்புரூவ் பண்ணணும்னு நினைக்கிறேன்.