பாஞ்சாலி எனும் திரௌபதியின் கல்யாணத்திற்கு முன்பாகவே பிறந்தவன் கடோத்கசன். அரக்கு மாளிகையில், பாண்டவர்களையும் குந்திதேவியையும் தங்க வைத்து, அவர்களை அழிக்கத் தீர்மானித்த துரியோதனன் எண்ணத்தைப் பொய்யாக்கிய பாண்டவர்கள், காட்டில் ஓர் ஆலமரத்தின் அடியில் தாயுடன் தங்கினார்கள்.அனைவரும் வழிநடந்த களைப்பினால் தூங்கிக் கொண்டிருந்த வேளையில், அவர்களுக்குக் காவலாக பீமன் மட்டும் விழித்திருந்தான்.

அப்போது பீமன் மனம் மிகவும் துயரத்தில் ஆழ்ந்தது; ‘‘அரண்மனையில் பலர் பணிவிடை செய்ய, மென்மையான பூப்போன்ற படுக்கையில் படுத்து உறங்க வேண்டியவர்கள், இப்படிக் காட்டில், மரத்தினடியில் தரையில் உறங்கும்படியான அவலம் நேரிட்டு விட்டதே!’’ என்று, அதுவரை துரியோதனன் - திருதராஷ்டிரன் முதலானோர் தங்களுக்குச்செய்த கொடுமைகளை எண்ணிப் பலவாறாகத் தனக்குத் தானே பேசிக் கொண்டிருந்தான்.

ஹிடும்பையும் உடனே புறப்பட்டாள்; பாண்டவர்களில் நால்வரும் குந்தியும் உறங்க, பீமன் காவல் காத்துக் கொண்டிருந்தான். பீமனைப் பார்த்ததும் ஹிடும்பையின் மனம், அவளை அறியாமலே பீமனிடம் சென்று விட்டது.

என்ன அழகு! என்ன அழகு! கருமைநிறம்; நீண்ட கைகள்; சிங்கம் போன்ற தோள்கள்; சங்கு போல் கழுத்து; தாமரைமலர் போன்ற கண்கள் ஆகியவை கொண்டு, பெரும் தேஜசுடன் விளங்கும் இவன்(பீமன்) எனக்குக் கணவனாக வேண்டியவன். ஆகையால் என் சகோதரனான ஹிடிம்பன் சொன்ன கொடிய செயலை, நான் ஒருபோதும் செய்ய மாட்டேன்.

 ‘‘அப்படி வந்த நான்,உங்களைப் பார்த்ததும் உங்களை மணம் செய்து கொள்ள விரும்பினேன். என்னை ஏற்றுக் கொள்ளுங்கள்! மனிதர்களைத் தின்னும் அந்த அரக்கனிடம் இருந்து, உங்களை நான் காப்பாற்றுவேன். விண்ணில் பறக்கும் சக்திகொண்ட என் விருப்பத்தைத் தள்ளாதீர்கள்!’’ என வேண்டினாள் ஹிடும்பை.

அதை மறுத்தான் பீமன்; ‘‘பெண்ணே! இதோ! இவர் என் மூத்த சகோதரர். இவர்தான் எனக்குத் தெய்வம்; குருநாதரும் இவர் தான். இவரே இன்னும் திருமணம் செய்து கொள்ள வில்லை. அப்படியிருக்க, மூத்தவரான இவருக்கு முன்னால் நான் திருமணம் செய்துகொள்ள விரும்பவில்லை. என்னை நம்பித் தூங்கிக் கொண்டிருக்கும் தாயாரையும் சகோதரர்களையும் ராட்சசர்களுக்கு இரையாகக் கொடுத்து விட்டு, காமுகனைப்போல உன் பின்னால் வர மாட்டேன் நான்’’ என்றான் பீமன்.

 ஹிடும்பை தொடர்ந்தாள். ‘‘கவலைப்படாதீர்கள்! உங்களையும் உங்கள் தாயாரையும் நான் தப்பிக்கச் செய்கிறேன். உங்கள் சகோதரர்களை விட்டு விடுங்கள்! என்னுடன் வாருங்கள்!’’ என்றாள்.

‘‘பெண்ணே! பயப்படாதே! நீ பார்த்துக் கொண்டிருக்கும் போதே, இவனை நான் கொல்வேன். அந்த ராட்சசப் பதரால், என் முன்னால் நிற்க முடியாது. வலுவான என் கண்களையும் பரந்து விரிந்த மார்பையும் உறுதியான என் கால்களையும் பார்! சாதாரண மனிதனாக என்னை எண்ணாதே!’’ என்றான்.அவர்கள் இருவரும் அவ்வாறு பேசிக் கொண்டிருக்கும் போதே, ஹிடிம்பன் அங்கு வந்து விட்டான். வந்தவன், தன் சகோதரியான ஹிடும்பை அழகான மானிடப் பெண் வடிவில் இருப்பதைக் கண்டு, மேலும் கோபம் கொண்டான். நடந்ததைப் புரிந்து கொண்டான்.

அதைக்கேட்ட ஹிடிம்பன், ‘‘அற்பனே! வீணாகத் தற்புகழ்ச்சி செய்து கொள்ளாதே! இப்போது என்னுடன் சண்டை போடும் போது, என் பலத்தைத் தெரிந்து கொள்வாய் நீ! தூங்கிக் கொண்டிருக்கும் இவர்களை, இப்போது கொல்லப் போவதில்லை. முதலில் உன்னைக்கொன்று உன் ரத்தத்தைக் குடிப்பேன்.

அதன்பின் இவர்களைக் கொல்வேன். கடைசியாக, எனக்கு எதிராகச் செயல்பட்ட, ஹிடும்பையையும் கொல்வேன்’’ என்று கூவினான்.கூவிய ஹிடிம்பன் பீமனை நோக்கி ஓட, பீமன் ஓடிவந்து ஹிடிம்பனின் கைகளைப் பிடித்து, தூரமாக இழுத்துப் போனான். அது, பெரும்பாம்பைக் கவ்விய கருடன் அதை இழுத்துக் கொண்டு போவதைப்போல இருந்தது.

உறங்கிக் கொண்டிருக்கும் சகோதரர்கள் - தாய் ஆகியோரின் உறக்கம் கெடக்கூடாது என்ற எண்ணத்தில், தூரமாக இழுத்துப் போன பீமனை, ஹிடிம்பனும் பலம்கொண்ட மட்டும் தாக்கினான்.

நீங்கள் அந்தக் குளத்தில் நீராடிவிட்டு, மரத்தின் கீழ் படுத்திருப்பீர்கள். வியாச பகவான் வந்து, உங்கள் துயரத்தை நீக்குவார். துரியோதனனால் நீங்கள் ஊரைவிட்டுப் போனதும், காசியில் மாளிகையில் கொளுத்தப்பட்டதும், விதுரரால் நீங்கள் காப்பாற்றப்பட்டதும் வியாச பகவானுக்கு ஞான திருஷ்டியால் தெரிந்திருக்கிறது. அவர் வந்து உங்களுக்கு அருள் புரியப் போகிறார்.

ஆகவே, நான் உங்கள் பிள்ளையைத் திருமணம் செய்து கொள்ள அனுமதி கொடுங்கள்!’’ என்றாள் ஹிடும்பை.குந்தியும் தர்மரும் ஆலோசித்து அனுமதி தந்தார்கள். ஹிடும்பையும் பீமனை மணந்தாள். அவர்களுக்குப் பிறந்தவன்தான், தலைசிறந்த வீரனான கடோத்கஜன். அதாவது குந்தியின் முதல் பேரன் என்றால், அது கடோத்கஜன் தான். கடோத்கஜன் வரலாறை அடுத்த இதழிலும் பார்க்கலாம்.