காலையில் நீலமாகவும் இரவில் கருமையாகவும் மாறும் இந்த வானம், தன்னகத்தே எண்ணிலடங்கா மர்மங்களை மறைத்து வைத்துள்ளது. குழந்தைப் பருவத்தில் இருந்தே மனிதனுக்கு வானத்தின் மீது ஒரு ஈர்ப்பு இருக்கிறது. அதனால் தானே, சாப்பிடாத குழந்தையும் கூட, நிலாவை காட்டி தாயார் சோறு ஊட்டும்போது, தன்னை மறந்து உணவு உண்கிறது? 

கி.மு. நான்காம் நூற்றாண்டில் வாழ்ந்த அரிஸ்டாட்டில் என்ற தத்துவ ஞானியும் அவரது குருவான பிளாட்டோவும் ”புவி மையக் கோட்பாட்டை” முதல் முதலில் உலகிற்கு தந்தார்கள். அந்தக் கோட்பாடு, பூமிதான் பிரபஞ்சத்தின் மையம் என்று கூறியது. மேலும் பூமியை முறையே சந்திரன், சூரியன் ஏனைய மற்ற கிரகங்கள் எல்லாம், சுற்றி வருவதாகவும் அந்த கோட்பாடு உரைத்தது.

ஆனால், இப்படி பல ஆண்டு கால ஆராய்ச்சிக்குப் பின் கண்டு பிடிக்கப்பட்டதை நமது வேதங்கள் அன்றே சொல்லி இருக்கிறது என்றால் உங்களால் நம்ப முடிகிறதா?. ஆம் நீங்கள் சரியாகத் தான் வாசித்தீர்கள்.

நியூட்டனுக்கு பலப் பல ஆண்டுகள் முன்பே,” தைத்ரீய சம்ஹிதை” என்ற வேத நூல், சூரியனின் ஈர்ப்பு விசையால் தான் பூமியும் மற்றக் கிரகங்களும் தாங்கப் படுகிறது என்று ஆணித்தரமாக உரைத்தது. தைத்ரீய சம்ஹிதை என்பது யஜூர் வேத மந்திரங்களின் தொகுப்பாக விளங்கும் ஒரு நூலாகும். சம்ஹிதை என்ற வார்த்தைக்கு தொகுப்பு என்று பொருள்.