சமய வழிபாட்டில் நிறைகுடம் எனப்படும் பூர்ண கலசம் தலையாய இடத்தைப் பெற்றுள்ளது. தமிழில் நிறைகுடம் என்பது முக்காலத்தையும் உணர்த்துவதாகும். இது நிறைந்திருந்த குடம், நிறைந்திருக்கும் குடம் , நிறையப் போகிற குடம் என்னும் முன்று காலத்தையும் குறிப்பதாகும்.

அனைத்து தெய்வங்களையும் பூர்ண கும்பத்தில் எழுந்தருளிவைத்து வழிபடுகிறோம். நமது வேண்டுதலை ஏற்று தெய்வங்கள் கும்பத்தில் எழுந்தருளி இருந்து நமது பூஜைகளை ஏற்றுக்கொண்டு நாம் வேண்டும் வரங்களை அளிக்கின்றன.

கும்பங்களில் நிலைப்படுத்தும் தெய்வங்களின் சக்தி கும்ப நீரில் நிறைந்திருக்கும் என்பதால் நம்மைத் தூய்மைப்படுத்திக் கொள்ள அந்நீரால் நீராடுவது, அதை தலையில் தெளித்துக் கொள்வது, உள்ளங்கையில் ஏற்று அருந்துவது, அந்திய நீரை கவசமாக பாவித்து கண்கள் தலைதோள்கள் மீது தடவிக் கொள்ளுதல் ஆகியவற்றைச் செய்கிறோம்.

சுத்தம் செய்யப்பட்ட குடத்தின் மீது குறுக்கும் நெடுக்குமாக நெருக்கமாக நூல் சுற்றப்படும். இதில் திலப்பிரமாணம்,யவைப் பிரமாணம், கஜநேந்திரப் பிரமாணம்   என்று சுற்றும் நூல் இடைவெளியை ஒட்டி பெயர்களை அமைகின்றன. ஒரு எள் இருக்கும் வகையில் அதிநெருக்கமாக நூல் சுற்றுதல் திலப்பிரமாணம் எனப்படும்.

அதற்கும் மேலாக யவை எனும் தானியம் அளவு இடைவெளியிட்டு சுற்றுவது யவைப் பிரமாணம் எனப்படும். யானைக்கண் அளவு இடைவெளி இருக்கும்படி நூல் சுற்றுவது கஜநேந்திரப் பிரமாணம் எனப்படும் இதில் முதலில் சொன்ன எள்ளளவு இடைவெளி வைத்து நூலைச் சுற்றுவதே உத்தமம் அடுத்தது, மந்திமம் பெரிய இடைவெளிவிட்டு சுற்றுவது அதமம்.

நூலை சுற்றும்போது கழுத்துவரை சுற்றுகின்றனர். ஆனால் கலசத்தின் வாய், கண்டம், உடல் ஆகியவை முழுவதுமாகவே சுற்ற வேண்டும். அதுவே ஆகமவழிச் செயலாகும்.   நூல் நெகிழ்ந்து போகாமல் நல்ல இருக்கத்துடன் இருக்க வேண்டும். இதுவே குடத்தை அழகுபடுத்துவதாகும்.

அதன் பின்னர் குடத்தை நிமிர்த்தி வைத்து அதனுள் புனித நீரை நிறைப்பர். அதில் வீர்யம் உள்ள நவரத்தினம் பஞ்ச லோகம், மீன், ஆமை, தெய்வப் பிரதிமைகள் இடப்படும், மேலும் எலுமிச்சப்பழம் வாசனை மிகுந்த திரவியப் பொடியும் சேர்க்கப்படும். பின்னர் வாயில் மாவிலை கொத்தினை வைப்பர். மாவிலைகள் துளிராகவும், முற்றினதாகவும் இல்லாமல் வளமானதாக இருக்கவேண்டும்.

மேலும் நுனி சுருங்காமலும் பூச்சிகளால் அரிக்கப்படாததாகவும் இருக்க வேண்டும். நல்ல பச்சை வண்ணத்துடன் கவர்ச்சியான இலைக் கொத்தை வைக்க வேண்டும். இதுவே மந்திர ஒலிகளை கலச நீரில் செலுத்தி தெய்வ சக்தியை குடத்துள் நிறைப்பதாகும். அதனால் மாவிலைகளை நன்கு தேர்ந்தெடுத்து பயன்படுத்த வேண்டும்.