கஞ்சா விற்கும் கேரக்டரில் நடிப்பதில் தப்பே இல்லை! ஆத்மிகா துணிச்சல்

ஹிப்ஹாப் ஆதி ஹீரோவாக நடித்த ‘மீசைய முறுக்கு’ படத்தில் ஹீரோயினாக நடித்து ரசிகர்களைக் கவர்ந்தவர் ஆத்மிகா. ‘நரகாசுரன்’, ‘காட்டேரி’ உட்பட கைவசம் கணிசமான படங்களை வைத்துள்ளார்.‘‘நான் சினிமாவில் நடிக்கிறேன் என்று என்னுடைய முதல் பட டிரைலர் வரும் வரை வீட்ல உள்ளவங்களுக்கு தெரியாது.

டிரைலர் ரெடியான பிறகுதான் வீட்ல உள்ளவர்களிடம் காண்பித்தேன். செம திட்டு கிடைக்கப் போகுது என்று நினைத்தேன். ஆனால் அப்பா, அம்மா டிரைலரைப் பார்த்துவிட்டு நல்லாயிருக்குன்னு சொன்னபோது நான் அடைந்த சந்தோஷத்துக்கு அளவேயில்லை’’ என்று பேசத் தொடங்கினார் ஆத்மிகா.

“உங்களைப்பற்றி சொல்லுங்களேன்.”“சொந்த ஊர் கோயமுத்தூர். ஸ்கூல் வரை அங்குதான் படித்தேன். சென்னையில் டிகிரி பண்ணினேன். அப்பா ரிட்டயர்டு அரசாங்க அலுவலர். அம்மா குடும்பத் தலைவி. சாதாரண குடும்பத்திலிருந்து வந்த நான் நடிகையாக மாறியது வீட்ல உள்ளவங்களுக்கு மட்டுமில்ல, எனக்கே கொஞ்சம் ஷாக்தான்.

ஆரம்பத்துல வீட்ல எதிர்ப்பு இருந்தது. கொஞ்சம் கொஞ்சமா வீட்டில் உள்ளவர்களை காம்ப்ரமைஸ் பண்ணிதான் சினிமாவுக்கு வந்தேன். என்னுடைய முதல் படமான ‘மீசைய முறுக்கு’ டிரைலர் அவர்களை இம்ப்ரஸ் பண்ணியது”“சினிமாவில் நடிக்கும் எண்ணம் எப்படி வந்தது?”