இருபத்தியோரு வயதில் ‘சின்னத்தாயி’ படத்தில் ஹீரோவாக அறிமுகம். அடுத்தடுத்து பாரதிராஜா, பாலுமகேந்திரா, வி.சேகர் என்று பெரிய இயக்குநர்களின் படங்களில் இடம்பெற்று, தொண்ணூறுகளில் முன்னணி இளம் ஹீரோவாகத் திகழ்ந்தவர் விக்னேஷ்.

இயக்குநர் பாலாவின் முதல் படமான ‘சேது’வுக்கு இவர்தான் முதலில் ஹீரோவாக நடிக்க பரிசீலிக்கப்பட்டார். விக்னேஷ் இழந்த அந்த வாய்ப்புதான் விக்ரமுக்கு திரையுலக வாழ்வில் திருப்புமுனையாக அமைந்தது.

“இருபது வருஷமா என்னிடம் எல்லாரும் ‘சேது’ பத்தி விசாரிப்பாங்க. ‘சேதுவை’ நான் மிஸ் செய்ததற்காக வருத்தப்படாத நாளே கிடையாதுன்னுதான் சொல்லணும். டைரக்டர் பாலாவும் நானும் ரூம் மேட்ஸ் என்பது ரொம்பப் பேருக்குத் தெரியாது.

என்னை வெச்சித்தான் அவர் ‘சேது’வை ஆரம்பிச்சார். அப்போ அந்தப் படத்துக்கு ‘அகிலன்’னு தலைப்பு. தாணு சாரோட மேனேஜர் செல்வம்தான் தயாரிப்பாளர். ஃபைனான்ஸ் பிரச்சினையால் ‘அகிலன்’ தொடங்கினதுமே முடங்கிடிச்சி.

‘சேது’ மட்டுமில்லை. அதுக்கு முன்னாடியே ‘வண்ண வண்ணப் பூக்கள்’ படத்துலே கூட ஏழு நாள் நடிச்சபிறகு மாற்றப்பட்டேன். இதுமாதிரி நிறைய நல்ல வாய்ப்புகள் கைக்கு எட்டியும் வாய்க்கு எட்டாமப் போயிருக்கு.

இப்போ அதையெல்லாம் திரும்ப நினைச்சாலே பெரும் துன்பமா இருக்கு. அம்மாதிரி சில சமயங்களில் தற்கொலை முயற்சிவரை கூட போயிருக்கேன். அப்போ நண்பன் பாலாதான், ‘உனக்கான நேரத்துக்காக காத்திரு’ன்னு தன்னம்பிக்கை கொடுத்து உற்சாகப்படுத்தினார்.”

“கொடூரமான வில்லன்களை சித்தரிப்பதில் உங்க நண்பர் பாலா ஸ்பெஷலிஸ்ட். அவர் அழைத்தால் அம்மாதிரி கேரக்டரை ஏற்பீர்களா?”

“வில்லன் ரோலும் நடிப்பேன்னுதான் சொன்னேனே தவிர, வில்லனா மட்டுமே நடிப்பேன்னு சொல்லலையே! நண்பர் விவேகபாரதி இயக்கத்தில் ‘பாசக்காரப் பய’ன்னு நல்ல சப்ஜெக்ட்டில் நடிக்கிறேன்.

‘முள்ளும் மலரும்’ மாதிரி யதார்த்தமான களம். அக்கா - தம்பி இடையே நடக்கும் பாசப்போராட்டம்தான் படத்தோட அடிநாதம். நேட்டிவிட்டி கதையா இதில் என்னோட கேரக்டர் வேற ஒரு பரிமாணத்தில் பேசப்படும்.இது தவிர சொந்தமாக படங்கள் தயாரிக்கும் திட்டமிருக்கு.

சினிமாத்துறையில் பணியாற்றியவர்களின் வாரிசுகள்தான் இப்போ சினிமாவில் சாதிக்க முடியும் என்கிற நிலைமை இருக்கு. இதனாலே நிறைய திறமையாளர்களுக்கு வாய்ப்பு கிடைக்க மாட்டேங்குது. வாரிசுகள் வரக்கூடாதுன்னு சொல்லலை. ஆனா, அவங்களுக்கும் திறமை இருக்கணும்.

என்னோட பையனாக இருந்தாலும் திறமைசாலியாக இருந்தால் மட்டுமே சினிமாவில் அவனுக்கு வாய்ப்பு கிடைக்கணும். அப்போதான் சினிமா ஆரோக்கியமாக இருக்கும்.”