கடைக்குட்டி சிங்கம்

எகிறி அடிக்கிறான் இந்த துரைசிங்கம்!

உழவுக்கும் தொழிலுக்கும் வந்தனம் செய்ய சொன்னார் பாரதி. இயக்குநர் பாண்டிராஜோ உழவுக்கும் தொழிலுக்கும் மட்டுமின்றி கூடுதலாக உறவுக்கும் வந்தனம் செய்து படமெடுத்திருக்கிறார்.கவுரவமான விவசாயக் குடும்பத்தைச் சேர்ந்த சத்யராஜ், ஆண் வாரிசுக்கு ஆசைப்பட்டு இரண்டு பெண்களை மணக்கிறார். அடுத்தடுத்து பிறந்த ஐந்து பெண் குழந்தைகளுக்குப் பிறகு, ‘கடைக்குட்டி சிங்கம்’ கார்த்தி பிறக்கிறார்.

படிப்பில் கொஞ்சம் மந்தமாக இருந்தாலும் பத்திரிகைகளில் கவர் ஸ்டோரி எழுதுமளவுக்கு விவசாயத்தில் கொடி கட்டிப் பறக்கிறார் கார்த்தி. அக்காள் மகள்களான பிரியா பவானி சங்கர், அர்த்தனா பினு இருவரும் இவருக்குத் திருமண ஆசையில் போட்டி போட்டு நூல் விடுகிறார்கள். கார்த்தியின் மனமோ நாயகி சாயிஷா மீது மையல் கொள்கிறது.

சாயிஷாவைத் திருமணம் செய்தால் குடும்பம் இரண்டாக உடையும் என்ற சூழலில் குடும்பமும் பாதிப்பு அடையாமல் காதலிலும் வெற்றி பெற வேண்டிய கட்டாயத்தில் இருக்கிறார் கார்த்தி. அச்சமயத்தில் சமுதாயப் பிரச்சினையில் கார்த்தியைக் கொலை செய்து அந்தக் குடும்பத்தையும் உடைக்க நினைக்கிறது வில்லன் கோஷ்டி.