நான் படித்திருப்பது Doctor of Pharmacy

சின்ன வயதில் இருந்தே பெரிய பொசிஷனுக்குப் போகணும் என்கிற கனவு இருந்தது எனப் பேச ஆரம்பித்த டாக்டர் அம்பை, மருந்துகளை பரிந்துரைக்கும் PharmD (Doctor of Pharmacy) படிப்பை 6 ஆண்டுகள் படித்து முடித்து, மருந்து தயாரிப்பு நிறுவனம் ஒன்றில் Medical Scientific Liaison Officer பணியில் வெற்றிகரமாக வலம் வருகிறார். PharmD படிப்பு மற்றும் அதற்கான வேலை வாய்ப்பு குறித்தெல்லாம் விரிவாக அவரிடம் பேசியதில்...

‘‘பத்தாம் வகுப்பு வரை நான் விரும்பிப் படித்தது அறிவியல் பாடத்தைதான். அதையே இன்னும் ஆழமாகப் படிக்கலாம் என முடிவு செய்து, +2வில் முக்கியப் பாடமாக  எடுத்தது அறிவியல் பிரிவைத்தான். கூடவே மருத்துவக் கனவும் இருந்தது. நீட் தேர்வில் மதிப்பெண் குறையவே, எனது மருத்துவக் கனவை சிதைக்காமல், மருத்துவம் சார்ந்து வேறென்ன படிப்புகள் இருக்கெனத் தேடத் தொடங்கியதில் PharmD படிப்பு குறித்து தெரியவந்தது.

இது மருந்து தொடர்பாக 6 ஆண்டுகளும் செயல்முறை கல்வியோடு இணைந்தே படிக்கும் படிப்பு என்பதால், மருத்துவமனையோடு இணைந்த கல்லூரிகளை தேடியதில், கோவை ஸ்ரீஇராமகிருஷ்ணா கல்லூரியில் வாய்ப்புக் கிடைத்தது’’ என்கிற டாக்டர் அம்பையிடத்தில், PharmD படித்தவர்களும் தங்கள் பெயருக்கு முன்னால் டாக்டர் எனப் போட்டுக்கொள்ளலாமா என்ற கேள்வியை முன்வைத்ததில்..?

‘‘எம்.பி.பி.எஸ் படித்த ஒரு மருத்துவர் நோய் குறித்து முழுமையாகப் படித்தால், நாங்கள் நோய்க்கான மருந்து குறித்து 5 ஆண்டுகளும் முழுமையாகப் படிப்போம். 6வது ஆண்டில் இன்டன்ஷிப் எங்களுக்கும் உண்டு. எம்.பி.பி.எஸ் படித்தவர்களைப் போலவே, நோயாளிகளோடு இணைந்து செயல்படுகிற நாங்களும் டாக்டர்தான்’’ எனப் புன்னகைத்தவர் மேலும் தொடர்ந்தார்.