‘‘இந்தியன் அதிலும் தமிழன் என்கிற அடையாளத்தை தொலைக்காமல், அதே நேரம் நாம் தொழில் செய்யும் நாட்டவரின் உணர்வுகளையும் மதிக்கணும்’’ என்கிற விஜயலட்சுமி கருப்பசாமி, தமிழ்நாட்டில் தூத்துக்குடி மாவட்டம், மணக்காடு பகுதியை சேர்ந்தவர். 

தற்போது ஜப்பானில் ஃபாக்ஸ் அகாடமி  பிரைவேட் லிமிட்டெட் (FOX Academy) என்கிற பெயரில் தொழில் அதிபராக வலம் வருகிறார்.தனியொரு பெண்ணாய் ஜப்பான் நாட்டில் தொழில் செய்வது... அதற்கான வாய்ப்பு... ஜப்பானியர்கள் குறித்தெல்லாம் விளக்கமாகப் பேசியதில்...

அப்பா அந்தக்கால ஏட்டுக் கல்வி. அம்மா அங்கன்வாடி பள்ளி ஆசிரியர். என்னுடன் பிறந்த ஒரு அக்கா, ஒரு அண்ணன் மற்றும் நான், மூவருமே +2 வரை தமிழ் வழியில் படித்தவர்கள். கல்வியை ஆயுதமாக இறுகப் பற்றி, சிறந்த பொறியியல் கல்லூரிகளில் மூவரும் இடம்பிடித்ததோடு, படிப்பை எங்கள் அடையாளமாக  மாற்றிய முதல் தலைமுறை பட்டதாரிகள் நாங்கள்.

லிங்டின் பக்கத்தில் பதிவேற்றியிருந்த என் புரொஃபஷனல் புரொஃபைலை  ஜப்பானில் உள்ள பல்கலைக்கழகம் மாணவர்களை பயிற்சிக்காக ஃபாக்ஸ் அகாடமிக்கு அனுப்ப என்னைத் தொடர்பு கொண்டனர். 

அந்த வாய்ப்பை நான் சரியாக பயன்படுத்த, இந்த வொர்க் ஷாப்பில் பங்கேற்க ஜப்பானில் இருந்து மாணவர்கள் தொடர்ந்து வர ஆரம்பித்தனர். கிட்டதட்ட 253 ஜப்பானிய மாணவர்களுக்கு நான் பயிற்சி வழங்கியிருந்தேன். இப்படித்தான் ஜப்பானுக்கும் எனக்குமான தொடர்பு தொடங்கியது.

அந்த நாட்டில் தொழில் செய்வதற்கு இரண்டு விதமான விசா நடைமுறைகள் இருக்கிறது. ஒன்று பிசினஸ் மேனேஜர் விசா. இன்னொன்று, ஸ்டார்ட்அப் விசா. ஜப்பான் அரசாங்கம் மூலமாகவே ஸ்பெஷல் இன்விடேஷனாக உள்ளே நுழைகிற நடைமுறை இது. முதல் விசா பெறுவதைவிட ஸ்டார்ட்அப் விசா நடைமுறை சுலபமாக இருந்தது. 

ஆனால், ஒரு  வருடம் மட்டுமே இதற்கு அனுமதி. இதில் அரசு மானியமும் உண்டு. பிசினஸ் செட் செய்கிறவரை இதை பயன்படுத்தலாம். ஆனால் இந்த விசா பெறுவது சுலபமில்லை. நிறைய டாக்குமென்டேஷன் வேலைகள் இருந்தது.

ஜப்பானிய மொழியில் மட்டுமே பேசுகிற ஜப்பானியர்கள், சரளமாக ஆங்கிலம் பேசினால் நம் அருகில் வரவேமாட்டார்கள். எளிமையான ஆங்கிலத்தில் அவர்களிடம் உரையாட வேண்டும். அவர்களின் மொழிப் பிரச்னையை என்னால் புரிந்துகொள்ள முடிந்தது. காரணம், நான் தமிழ் வழியில் படித்த மாணவி. 

படிப்பு, விளையாட்டு, நடிப்பு என நம்பர் ஒன் மாணவியாக இருந்தவள், கல்லூரிக்குள் நுழைந்து காணாமல் போனேன். என்னைச் சுற்றியிருந்த உலகம் ஆங்கிலத்தை மட்டுமே பேசியதால், நினைத்ததைப் பேச முடியாமல் தவித்தேன். இதையே சவாலாக எடுத்து, ஆங்கிலத்தை சரளமாகப் பேசப் பழகினேன்.

ஆங்கிலம் மற்றும் ஜப்பானிய மொழியில் கற்பிக்கும் ஆன்லைன் ப்ளாட்ஃபார்ம் இது. ஜப்பானியர்களையும் தொழில்நுட்பத்தில் வல்லுநர்களாக மாற்றவே ஃபாக்ஸ் அகாடமியை இங்கு ஆரம்பித்தேன். ஜப்பானியர்கள் நம்மைவிட தொழில்நுட்பத்தில் பின்தங்கியவர்கள். பெரும்பாலும் இதில் இந்தியர்களை சார்ந்தே இருக்கிறார்கள். 

இங்கிருக்கும் 60 சதவிகிதம் இஞ்சினியர்களும் வெளிநாட்டவர்களே. குறிப்பாக இந்தியர்களும், வியட்நாமியர்களுமே இங்கு அதிகம். ஜப்பானில் ஐடி மற்றும் ஏஐ தொழில்நுட்பத்திற்கான வாய்ப்பு அதிகமாக உள்ளது. சர்வதேச அளவிலான பயிற்றுவிப்பாளர்கள் என் நிறுவனத்தில் பணி செய்கிறார்கள். ஜப்பான் மார்க்கெட்டோடு இந்திய மார்க்கெட்டையும் சேர்த்தே நாங்கள்  கொண்டு செல்கிறோம்.

ஒரு நிமிடம் கவனித்து பார்த்த பிறகே கார்டை வாலட்டிற்குள் திணிக்க வேண்டும் என அவர்களின் வணிகக் கலாச்சாரம் வித்தியாசமானது.  சுத்தம், சுகாதாரம், பாதுகாப்பு என எல்லாமும் அங்கு முறையாகவே இருக்கும். 

வாங்கும் பொருட்களின் தரமும் சிறப்பானதாய் இருக்கும். ஜப்பானியர்களின் சட்ட திட்டங்கள், விதிமுறைகளை கண்டிப்பாக நாமும் பின்பற்ற வேண்டும். அவர்களின் செயல்பாடுகள் அனைத்தும் பேப்பர் வொர்க்தான். போஸ்ட் பாக்ஸை திறந்தால் கட்டுக்கட்டாக கடிதங்கள் இருக்கும். ஜப்பானில் நான் கற்ற முக்கியமான விஷயம் பொறுமை.

திருமணத்திற்குப் பிறகு வேலைக்கு செல்வதை பெரும்பாலும் விரும்ப மாட்டார்கள் என்றாலும், இங்குள்ள பெண்கள் மென்மையான வேலைகளையே எதிர்பார்த்துச் செய்கிறார்கள். தலைமைப் பொறுப்பிலும், அரசியலிலும் பெண் தலைவர்கள் இங்கு குறைவுதான். 

ஐடி தொழிலில் பெண் தலைமைப் பொறுப்பில் இருப்பதை வியப்பாக பார்ப்பார்கள்.குறிப்பாக பெண்கள் தனியாக பாதுகாப்பாக இங்கு பயணிக்க முடிகிறது. காதலில் விழுந்தாலும் வீட்டில் சம்மதத்துடனே திருமணம் செய்கிறார்கள். பெண்கள் நெற்றி மறைக்கிற மாதிரி முடியினை மங்கி கிராப் செய்திருப்பார்கள்.