கலைக்கும் நட்புக்கும் தலைவணங்கத் தவறுவதே இல்லை ‘சூப்பர் ஸ்டார்’ ரஜினிகாந்த். கவியரசரிடம் அவர் ஆசீர்வாதம் வாங்கும் படம் அற்புதம். கலைமகளின் ‘விசேஷ’ பிறப்பல்லவா கண்ணதாசன்!

‘உதயம் என்.ஹெச் 4’ படத்தில் புது ஹீரோயின் என்றதும், ‘சித்தார்த்துக்கு இப்படி புதுசு புதுசா அமையுதே’ என்ற உங்கள் கேள்வியில் வயித்தெரிச்சல் தெரியுதே தலைவா!

நயன்தாரா சென்னையில் தங்கினால், ஆர்யா வீட்டிலிருந்துதான் மூணு வேளை சாப்பாடு செல்கிறதா? நெருப்பில்லாம புகையாதுன்னு சொல்வாங்க. நெருப்பில்லாமலா பிரியாணியெல்லாம் ரெடியாகும்?

‘தங்கம் வாங்கியே தீர வேண்டும்’ என்று மக்களை வசியம் செய்துகொண்டிருக்கும் விளம்பரங்களுக்கு மத்தியில், தங்கம் ஒரு மாயை, போதை வஸ்து என்று நெற்றிப்பொட்டில் அறைந்து சொன்னது அபாரம்!

‘கண்களில் துடிக்கும் பேரழகு’ கட்டுரையின் ஓவியமே கிறங்கடித்தது. படிக்கும்போது ‘சிலுக்கு’ நினைவு வந்து ஒரு உலுக்கு உலுக்கிவிட்டது!

‘ரூபே கார்டின்’ நன்மைகளை அலசியிருந்தது அருமை. எனினும் சில்லறை வணிகத்தில் அந்நிய முதலீடு சமாச்சாரங்களில் ரூபே கார்டு மூலம் நம் பணம் வெளிநாட்டுக்குப் போகாதா? என்பது மில்லியன் டாலர் கேள்வி!

தெய்வீக மங்கை ஆண்டாளின் பெருமையைப் போற்றும் ஆஸ்திரேலியத் தம்பதிகளின் பக்தி, எங்களை ஆச்சரியம் கலந்த சிலிர்ப்பில் ஆழ்த்தி விட்டது!

‘என் தனிப்பட்ட வாழ்க்கையை மீடியாக்கள் டமாரம் அடிக்க வேண்டாம்’ என்று சொல்லாமல் சொல்லி பிரபுதேவா ஒரு கொட்டு வைத்திருக்கிறார். உண்மையும் அதுதானே!

மேக்கப்தான் ஒரு மனிதனை... ஸாரி, மனுஷியை எப்படி மாற்றிக் காட்டியிருக்கிறது. அழகுப் புயலாய் இருக்கும் தன்ஷிகா ‘பரதேசி’யில் அழுக்காச்சியாக எப்படி மாறி இருக்கிறார். அதர்வாவிடம் கெமிஸ்ட்ரி எப்படியோ... ஆனா, பாலாவிடம் பாஸ் பண்ணிட்டாங்க அம்மணி!

‘வட இந்தியர்களை நாம் வாழ விடுகிறோமா?‘ என்ற கட்டுரை படித்து மனம் கனத்தது. கரணம் தப்பினால் மரணம் என்ற நிலையில் வாழும் அவர்கள் மேல் அரசு தன் கவனத்தை திருப்புதல் அவசர அவசியம்!