அட்டையில் கற்சிலைக்குப் பக்கத்தில் பொற்சிலையாய் சுனைனாவின் படம்... சூப்பர்! அதை விட கவர்ச்சி தூக்கலான படங்கள் உள்ளே அணிவகுத்தது சூப்பரோ... சூப்பர்!

‘வித்தியாச வில்லேஜ்கள்’ வாசித்தபோது மிகவும் பெருமையாக இருந்தது. நாற்றம் நிறைந்த பீடியுடன் போராடாமல், மகத்துவம் நிறைந்த ராட்டையுடன் வாழ்க்கை பின்னப்படுவது மகளிருக்கு மேலும் சிறப்புதான்!

டெங்கு காய்ச்சலால் பாதிக்கப்பட்டவர்களிடம் ரூ.20 ஆயிரம் முதல் 40 ஆயிரம் வரை கல்லா கட்டும் தனியார் மருத்துவமனைகளை என்னவென்று சொல்லுவது? அரசு மருத்துவர்களே அவர்களிடம் நோயாளிகளை அனுப்பி வைப்பது பேரதிர்ச்சி.

கிளாமர் குயின் மல்லிகா ஷெராவத்துக்கு பெரிய புளியங்கொம்பு தொழிலதிபர் யாரும் கிடைக்கவில்லையோ? ‘கல்யாணம் என்பது காலாவதியானது!’ என்று புலம்பவிட்டுட்டீங்களே பாஸ்!

னி-கி பகுதி மீண்டும் தொடங்கியுள்ளதைப் பார்த்ததும் ஏதோ பள்ளிக்கால தோழியை மீண்டும் சந்தித்தது போல அப்படியொரு சந்தோஷம்!

அடேயப்பா... தீபாவளி ஸ்பெஷலுக்காக நிறைய ஜோக்குகள் வயிறு குலுங்க சிரிக்க வைத்தன. வரும் வாரங்களிலும் இதேபோல் எங்களை சிரிப்புக் கடலில் மூழ்கடிப்பீர்கள் என நம்புகிறோம்.

‘நேற்றைய ஆபாசம் என்பது, இன்றைய சாதாரணம்... நாளைய இலக்கியம்!’ என்று நறுக்குத்தெறித்தாற் போன்று சொல்லிய ‘ச்சீய்’ பக்கங்கள்... ஆரோக்கியமான, அவசியமான டீன் ஏஜ் டீச்சிங்!

மலாலா யூசுப் என்ற 14 வயது சிறுமியின் துணிச்சல் குறித்த மனுஷ்யபுத்திரனின் எழுத்தைப் படித்தபோது, ஆணாதிக்கம் கொண்ட பாகிஸ்தானிலும் வீரப் பெண்கள் இருப்பதை உணர முடிந்தது. சிறுமி நலம் பெற இறைவனைப் பிரார்த்திப்போம்!

ஆல்தோட்ட பூபதியின் குட்டிச்சுவர் சிந்தனைகள் சாதாரண தமிழ்நாட்டு பாமரனின் உள்ளக் குமுறலை அழகாக வெளிப்படுத்தும் ஹைக்கூ கவிதைகளாகவே பரிமளிக்கின்றன.

‘ஆடு, மாடு மற்றும் மனிதர்கள்’ தலைப்பே கரம் பிடித்து கிராமத்துக்கு எங்களை அழைத்துப் போய்விட்டது. மண்ணின் மணத்தை மட்டுமல்லாது மண்ணின் மனத்தையும் உணர்ந்து கொண்டோம்!

கிச்சுகிச்சு மூட்டும் ‘க்ளிக் கமென்ட்ஸ்’ பகுதிக்கு வெல்கம். நாட்டு நடப்பை நக்கலடிக்கிறது நீங்க. மாட்டி விடுறது நடிகர்களையா? நடக்கட்டும் நடக்கட்டும்!