நாடக நடிகைகளின் துயர வாழ்க்கையைப் படித்தபோது நெஞ்சம் ஈரமானது. அதிலும் அம்பிகாவின் வார்த்தைகளில் வாழ்க்கையின் துயரம் சம்மணமிட்டு உட்கார்ந்திருக்கிறது.

'ஏழாம் அறிவு' பற்றிய கட்டுரையில், காஞ்சியின் போதிதர்மர் சீனம் சென்று நமது பாரம்பரியப் புகழை நிலைநிறுத்தி இருப்பது அறிந்து உள்ளம் சிலிர்க்கிறது!

தமிழகத்தில் படம் வெளியாகி ஓரிரு மாதங்கள் கழித்து வெளிநாட்டு உரிமை வழங்கினால் 'ஆன்லைன் பைரசி'யைத் தடுக்கலாம்! தயாரிப்பாளர்கள், தியேட்டர் உரிமையாளர்கள், வினியோகஸ்தர்கள் திறந்த மனதோடு ஒருங்கிணைந்தால் வெற்றி பெறலாம்.

- ஆர்.தனபால், சென்னை-63.

திருப்பதி சென்று வேண்டுதல் நிறைவேற்றிய சூப்பர் ஸ்டார் விரைவிலேயே 'ராணா' படப்பிடிப்பில் கலந்து கொள்வார் என்ற செய்தி ரசிகர்களுக்கு தீபாவளி ஸ்வீட்!

Q&A பகுதியில் காவல்துறை நினைத்தால் ஆபாச நடனத்தினை தடுத்து நிறுத்த முடியும் என்ற உரிய பதிலை ஐ.ஜி.சைலேந்திரபாபு தந்துள்ளார். சரியான நடவடிக்கை எடுத்தால் மகிழ்ச்சியே!

'நாங்க நண்பேன்டா!' பகுதியில் 'சினிமாவில் உங்க பெஸ்ட் ஃப்ரெண்ட் யார்?' என்ற கேள்விக்கு புகழ்பெற்ற நட்சத்திரங்களிடம் பதில் வாங்கியது வித்தியாசமாக இருந்தது.

'பவர் ஸ்டார்' டாக்டர் சீனிவாசனின் ஜாலி பேட்டியைப் படித்து சிரிப்பு தாங்கவில்லை. 'பவர் ஸ்டாராவே இருந்துடாதே... நீயும் ஒருநாள் சூப்பர் ஸ்டாராகணும்' என்று டாக்டர் தன் முகத்தை காலையில் கண்ணாடியில் பார்க்கும்போது நினைத்துக்கொள்வது அதில் உச்சகட்ட ஹைலைட்!

'மாந்தோப்புக் கிளியே' படத்தின்போது 'பிரேக்' என்ற ஒரே ஒரு வார்த்தையை தவறான இடத்தில் பயன்படுத்தியதால் அவதிப்பட்ட நேஷனல் செல்லையா மீது எங்களுக்குப் பரிதாபம்தான் வந்தது.

தீபாவளி ஜோக்ஸ் அனைத்தும் சரவெடி!

- டி. கவிதா ராஜன், விழுப்புரம்.

பாக்கியம் ராமசாமி எழுதும் 'சிரிப்பும் சிந்தனையும்' படிக்கும்போதே வாய் 'விட்டு' சிரிக்கும்படி இருக்கிறது!

'உங்ககூட முதல் படத்தில் நடித்த சமந்தா இன்னைக்கு தெலுங்கில் உச்சத்தில் இருக்காங்க' என்ற கேள்விக்கு அதர்வா தன்னடக்கத்துடன் சொன்ன பதில் பாராட்டுக்குரியது.

- நெ.விமலநாதன், புதுச்சேரி.