எவரெஸ்ட் சிகரத்தைத் தொட்ட முதல் பார்வைக் குறைபாடுள்ள மாற்றுத்திறனாளி இந்தியப் பெண் என்ற சாதனையைப் படைத்துள்ளார் சோன்சின் அங்மோ. எந்தக் குறைபாடும் இல்லாமல் நல்ல உடல் ஆரோக்கியத்துடன் இருப்பவர்களாலேயே எவரெஸ்ட்டில் ஏறுவது அவ்வளவு சுலபமல்ல. 

இந்தச் சூழ்நிலையில் அங்மோ ஏறியிருப்பது எல்லோரையும் பாராட்ட வைத்துள்ளது. மாற்றுத்திறனாளிகளாலும் சாதிக்க முடியும் என்ற நம்பிக்கையை ஏற்படுத்தியுள்ளது.

இமாச்சலப் பிரதேசத்தின் கின்னார் மாவட்டத்தில் உள்ள சாங்கோ என்ற தொலைதூர கிராமத்தைச் சேர்ந்த பழங்குடியின பெண் அங்மோ. இந்திய -திபெத்திய எல்லையில் உள்ள கிராமம் இது.

கடந்த 2024ம் ஆண்டு 5 ஆயிரத்து 364 மீட்டர் உயரமுடைய எவரெஸ்ட் சிகரத்தின் அடித்தள முகாம் பகுதிக்குச் சென்று வெற்றிகரமாக டிரக்கிங்கை முடித்தார். அப்போது இந்த அடித்தள முகாமிற்குச் சென்ற பார்வையற்ற முதல் இந்தியப் பெண்மணி என்ற பெயரைப் பெற்றார். இதுமட்டுமல்ல. 

அவர் ஏற்கனவே லடாக்கில் 6 ஆயிரத்து 250 மீட்டர் உயரமுள்ள மவுண்ட் காங் யாட்சே 2 சிகரத்தை ஏறியுள்ளார். மேலும் அதே பகுதியிலுள்ள சுமார் 6 ஆயிரம் மீட்டர் உயரத்தில் பெயரிடப்படாத சிகரத்தை ஏறிய திவ்யாங் பயணக் குழுவில் உறுப்பினராகவும் இருந்தார்.