அடுத்த வீட்டில் யார் உள்ளார்கள் என்பது கூட தெரியாமல் நகர்ப்புற அடுக்ககங்களில் வாழ்பவர்கள், பூமியைத் தவிர வேறு கோள்களில் உயிரினங்கள் உள்ளனவா என்பதை அறிந்துகொள்ள ஆர்வம் காண்பிப்பார்கள். 

ஏலியன்ஸ் எனப்படும் அயலான்கள் குறித்து தெரிந்து கொள்வதில் அதீத ஆர்வமும் பரபரப்பும் எல்லோருக்கும் உள்ளது. இந்த ஆர்வம் உலகில் உள்ள விண்வெளி விஞ்ஞானிகளையும் விட்டு வைப்பதில்லை.

K2-18b என்பது பூமிக்கு சுமார் 124 ஒளி ஆண்டுகள் தொலைவிலுள்ள ஒரு சூப்பர் - பூமி போன்ற கோளாகும். இது, லியோ விண்மீன் (Leo constellation) கூட்டத்தில் உள்ளது. சிவப்பு நிறமுள்ள சிறு நட்சத்திரத்தை சுற்றி வருகிறது. 

இது பூமியின் அளவை விட சுமார் 2.6 மடங்கு பெரியது; 8.6 மடங்கு எடை கொண்டது. இந்த கோளில் திரவ நீர் அதன் மேற்பரப்பில் இருக்கக் கூடும் என்று தெரிகிறது. இந்த வெளிக்கோள் முதன்முறையாக 2015ம் ஆண்டில் கெப்ளர் விண்வெளித் தொலைநோக்கி மூலம் கண்டுபிடிக்கப்பட்டது.

டைமெத்தில் சல்பைடு (DMS) என்பது பூமியில் பெரும்பாலும் கடல்வாழ் நுண்ணுயிரிகளான பிளாங்க்டன் மூலம் உற்பத்தி செய்யப்படும் ஒரு மூலக்கூறு. இது பூமியின் பெரும்பாலான கடல்களில் பரவலாக உள்ளது. DMS மூலக்கூறு மேக - க்ளவுட்ஸ் - உருவாக்கத்திலும் பங்களிக்கிறது என்பது குறிப்பிடத்தக்கது. மட்டுமல்ல, பூமியின் காலநிலைமீதும் தாக்கத்தை ஏற்படுத்த முடியும்.

டைமெத்தில் சல்பைடு தவிர, ஜேம்ஸ் வெப் விண்வெளி தொலைநோக்கியானது நீராவி, கார்பன் டைஆக்சைடு மற்றும் மீத்தேன் ஆகியவற்றையும் 2019 மற்றும் 2023ம் ஆண்டுகளில் கண்டறிந்தது. 

இந்த கண்டுபிடிப்புகள், புவிக்கோளின் வளி மண்டலத்தை ஒட்டியுள்ளதாகக் கருதப்படுகிறது.பூமியில் உயிரோடு தொடர்புடைய DMS போன்ற மூலக்கூறு கண்டறியப்பட்டதால், K2-18bயில் உயிர் இருக்க வாய்ப்பு அல்லது அதற்கான அனுகூலமான சூழ்நிலைகள் இருக்கக்கூடும் என விஞ்ஞானிகள் கருதுகின்றனர்.