கோபுர தரிசனம் கோடி புண்ணியம் என்பார்கள். அப்படி எல்லோரும் கோயில்களுக்குச் செல்கிறார்கள். ஆனால், நடிகர், நடிகைகள் மற்றும் அரசியல் தலைவர்கள் கோயில்களுக்குச் செல்லும்போது அது பெரும் பேசுபொருளாக மாறும் நிகழ்வுகளும் நடக்கின்றன.

சினிமாவில் பணம், புகழ், செல்வாக்கு கிடைத்த பிறகு இவர்கள் மறக்காமல் செல்லும் இடம் ஆலயம். படத்தின் வெற்றிக்கான வேண்டுதல், நேர்த்திக்கடன் என ஆதாயத்துக்காக செல்கிறவர்களாக இல்லாமல் இறைவன் மீது பக்தி கொண்டவர்களாக பலமுறை தங்களை வெளிப்படுத்தியுள்ளார்கள்.

பொதுவெளியில் எது நடந்தாலும் அது டிரெண்ட்டாகி வரும் சூழ்நிலையில் நடிகர், நடிகைகளின் சாமி தரிசனம் எனும்போது அது உடனடியாக சமூக வலைத்தளங்களில் வைரலாகி கவனம் பெறுகிறது.

எப்படியிருந்தாலும் தமிழின் முன்னணி நாயகனாக விளங்கும் ரஜினிகாந்த்தும் ஆன்மீகமும் பின்னிப்பிணைந்தது என்பது அனைவரும் அறிந்ததே.ஆனால், உலகநாயகன் என்று போற்றப்படும் கமல்ஹாசனின் ஆன்மீகம் முற்றிலும் வேறானது. 

தன்னைப் பகுத்தறிவாளர் என்று அடையாளப்படுத்திக் கொள்ளும் அவர், செய்யும் தொழிலே தெய்வம் என்கிற கொள்கை கொண்டவர். மற்றவர்கள் கோயில்களுக்குப் போவார்கள். இவரோ திரைத்துறையில் அறிமுகமாகும் புதுமைகளைத் தேடி உலகம் முழுக்கப் பயணித்துக் கொண்டேயிருக்கிறார்.

இந்த வயதிலும் ஏஐ தொழில்நுட்பம் கற்கிறேன் என்று அமெரிக்கா போய் ஆறு மாதங்களுக்கும் மேலாகத் தங்கியிருந்ததை இதற்கு உதாரணமாகக் குறிப்பிடலாம்.தமிழின் முன்னணி நடிகரான விஜய், தன் படங்கள் வெளியாகும் நாளுக்கு முந்தைய நாள் வேளாங்கண்ணி சென்று பிரார்த்தனை செய்வதை வழக்கமாகக் கொண்டிருந்தவர். 

பெரும் புகழ்பெற்று ரசிகர்கள் கூட்டம் அதிகரித்த பிறகு அந்தப் பயணங்கள் ரகசியமாக்கப்பட்டன. பின்னாட்களில் அவர் சார்பாக அவர் தந்தை, தாய் உள்ளிட்ட யாராவது அந்த பிரார்த்தனைப் பயணத்தை மேற்கொண்டு வருகின்றனர்.

அவர் சாய்பாபாவின் தீவிர பக்தர் என்பதால் இந்த வியாழக்கிழமை சென்டிமென்ட் என்பது உலகத்துக்கே தெரிந்த ரகசியம்.நடிகர் சூர்யா, பக்தி என்பதும் ஆன்மீகம் என்பதும் அடுத்தவர்களுக்கு உதவுவது என்கிற எண்ணம் கொண்டவர். அதனால் அவருடைய அகரம் அமைப்பு அதன்மூலம் நடக்கும் நற்செயல்கள் ஆகியன உலகறிந்தவை.

அவருடைய ‘கங்குவா’ படத்தின் வெளியீட்டின்போது, அவர் மனைவி ஜோதிகா மதம் சார்ந்து கடும் விமர்சனத்துக்கு ஆளானார். அதற்கு முன்பாக ஒரு நிகழ்வில் அவர் கோயில் உண்டியல்களில் காசு போடுவதற்குப் பதிலாக மருத்துவமனைகளை மேம்படுத்த உதவுங்கள் என்று சொன்னதே இந்த சர்ச்சைக்குக் காரணம்.

அதன்விளைவு, அந்தப் பட வெளியீட்டுக்குப் பின் தமிழ்நாட்டின் புகழ்பெற்ற கோயில்களுக்கு சூர்யா-ஜோதிகா ஆகிய இருவரும் சென்று பயபக்தியுடன் சாமி கும்பிட்ட நிகழ்வுகள் பெரிதாகப் பேசப்பட்டன.

அண்மையில் மகாராஷ்டிரா மாநிலம் கோலாப்பூரில் புகழ்பெற்ற மகாலட்சுமி கோயில், அசாமில் புகழ்பெற்ற காமாக்யா கோயிலுக்குச் சென்றுள்ளனர். அங்கு ஜோதிகா தனது நெற்றியில் குங்குமப் பொட்டுடன், கழுத்தில் மாலை அணிந்து கோயிலின் கொடிக் கம்பத்தில் மணி ஒன்றைக் கட்டும் புகைப்படம் வெளியாகியுள்ளது.

ஆனால், ‘கங்குவா’ படத்துக்குப் பின்னர் அவருடைய பக்திப் பயணங்கள் பெரிய செய்திகளாகின்றன. அவை திட்டமிட்டு செய்திகளாக்கப் படுகின்றன என்று சொல்வோரும் உண்டு.