தூங்கா நகரம் என்றாலே அது மதுரைதான். ஆனால், இப்போது அந்தப் பெயர் சென்னை அண்ணா நகருக்கும் பொருந்தும். ஏனெனில் மிட் நைட் டீ, மிட் நைட் பிரியாணி, மிட் நைட் ஸ்நாக்ஸ், மிட் நைட் பரோட்டா, மிட் நைட் தோசை, மிட் நைட் ஐஸ்கிரீம் என இரவு பத்து மணிக்கு மேல் நூற்றுக்கணக்கான உணவகங்களுடனும் ஆயிரக்கணக்கான வாடிக்கையாளர்களுடனும் பகல் போல் பரபரத்துக் கிடக்கிறது சென்னை அண்ணா நகர்.

அந்த இரவு நேரத்து உணவகங்களில் ஒன்றாக இருக்கிறது, ‘ஆலங்குடி ஆச்சி பிரியாணி’. அண்ணா நகர் சாந்தி காலனியின் 5வது அவின்யூவில் இருக்கும் இந்த உணவகத்தை, ஒரு கடையென நினைத்து நீங்கள் தேடினால் ஏமாற்றமே மிஞ்சும்.

ஏனெனில், ட்ரை சைக்கிளே பிரியாணி கடையாக ஜொலிப்பதுதான் இதற்குக் காரணம். பிரியாணி காலியானதும் இந்த ட்ரைசைக்கிள் உணவகம் அங்கிருந்து மறைந்துவிடும். ஆனால், மணக்கும் ஆச்சி பிரியாணியின் சுவையோ மனதிலிருந்து என்றும் மறையாது. அந்தளவுக்கு இதன் சுவை வாடிக்கையாளர்களை மயக்கிவிட்டது.  

இந்த இரவு உணவகத்தை நான்கு ஐடி இளைஞர்கள் இணைந்து நடத்தி வருகின்றனர். பதினைந்து ஆண்டுகால நண்பர்களான இவர்கள், ஒன்றாகவே படித்து, ஒன்றாகவே தங்கி, ஒன்றாகவே சாப்பிட்டு, தற்போது ஒன்றாகவே ஒரு ஐடி கம்பெனியில் பணிபுரிந்து கொண்டு, இந்தப் பிரியாணி கடையை உற்சாகமாக நடத்துகின்றனர்.

அங்கிருந்து எங்கள் நட்பு தொடங்கியது. கல்லூரி ஹாஸ்டலில்கூட நாங்கள் ஒன்றாகவே தங்கியிருந்தோம். படிக்க, விளையாட, தூங்க, ஊர் சுற்ற என அனைத்தையும் ஒன்றாகவே செய்தோம்.

வீட்டில் இருந்து அலுவலக வேலையை முடிப்பதால் நிறைய நேரம் சும்மாவே இருக்கும்படி ஆனது. வேலை இல்லாத நேரங்களை பயனுள்ளதாக மாற்ற வேண்டும் என யோசித்தேன். அப்போதுதான் என் சின்ன வயசு ஆசையான பிரியாணி கடை வைப்பது பற்றிய யோசனை வந்தது. 

பகலில் அலுவலக வேலை; இரவில் பிரியாணி கடை என யோசித்து நண்பர்களிடம் சொன்னேன். அவர்களும் மகிழ்ச்சியோடு சம்மதித்தார்கள். அப்படி உருவானதுதான் இந்த ஆலங்குடி ஆச்சி பிரியாணிக் கடை...’’ என்கிற மணிகண்டன், கூட்டாளிகளைப் பார்த்து புன்னகைத்தபடி தொடர்ந்தார்.

‘‘ இதற்காக குறைந்த செலவில் ட்ரை சைக்கிள் ஒன்றை வாங்கி அதை கடைபோல் தனித்துவமாக வடிவமைத்து அதிலிருந்தபடியே பிரியாணியை விற்பனை செய்யலாம் என முடிவெடுத்தோம்.

தவிர, சுத்தமான நெய்யை நேரடியாக தயாரிக்கும் இடத்தில் இருந்தே வாங்குகிறோம். காய்கறிகளையும் நேரடியாக கொள்முதல் செய்கிறோம். மட்டன் பிரியாணிக்கு, 8 முதல் 9 கிலோ எடையிலான ஆடுகளைத்தான் பயன்படுத்துகிறோம். அப்போதே இளங்கறியாக சாப்பிடுவதற்கு சுவையாக இருக்கும். 

பிரியாணி செய்யத் தொடங்கும்போதுதான் மட்டனும் வெட்டப்படும். சரியாக வெங்காயம், தக்காளி வதங்குவதற்குள் மட்டன் வெட்டப்பட்டு எங்கள் இடத்திற்கு வந்துவிடும். அதாவது, மட்டனை வெட்டி அடுத்த அரை மணி நேரத்திற்குள் பிரியாணிக்குத் தயாராகிவிடும்.