வாசலில் கார் கழுவிக் கொண்டிருந்த கார்த்திக் இதைக் கவனித்தான். 

‘பாவம் யாரோ வழி தெரியாமல் சுற்றுகிறார்கள். யார் வீட்டைத் தேடுகிறார்கள் என்று கேட்டால்தானே பதில் சொல்ல முடியும்? திமிராகச் சுற்றினால் சுற்றட்டுமே! இவர்களோடு பேச வேண்டுமென்றால் ஓடும் எஃப்.எம்.ஐ ஆஃப் செய்ய வேண்டும். நல்ல பாட்டு ஓடுகிறது. ஓடட்டும்’ என்று கூடவே பாடிக்கொண்டு கார் கழுவினான் கார்த்திக்.

கார்த்திக் செய்த வாட்டர் சர்வீஸில் கார் பளபளவென மின்னியது. காலையிலிருந்து செய்த அதிகப்படியான வேலையால் நன்றாகப் பசித்தது. அவனுக்காகக் கட்டி வைத்த சாப்பாட்டைத் திறந்தான். வெண்டைக்காய் மோர் குழம்பும், சேனைக்கிழங்கு வறுவலும் வைத்திருந்தாள். 

இரண்டு முட்டையை உடைத்து ஊற்றி ஆம்லெட் போட்டுக்கொண்டு வந்து சாப்பிட்டான்.

அது என்ன தொழில் தர்மமோ? சின்ன சுவரை எளிதாகத் தாண்டாமல் பெரிய ரிஸ்க் எடுத்து இந்த பெரிய சுவரில்ஏறி க் குதித்து பக்கத்து வீட்டிற்குச் சென்றான். 

அதுதான் ஆளில்லாத வீடு. பின் கதவை உடைத்தான். கதவிற்கு முன் இரும்பு கேட்டும் போடப்பட்டிருந்ததால் அவ்வளவு எளிதாக உடைக்க முடியாது எனப் புரிந்தது. ஒரே ஜம்ப்பில் சுவரைத் தாண்டி மீண்டும் கார்த்திக் வீட்டிற்கே வந்தான்.

பரக்க மீண்டும் தோட்டத்திற்கு வந்தான். மர பேட்டை எடுத்து பூட்டை உடைத்தான். அந்த பேட்டால்தான் மிதியடிகளை துவைப்பாள் சுதா. 

அகமதாபாத்திலிருந்து சொந்த ஊருக்கு வாழ திரும்பியவர்கள் சுதாவிற்கு பேட்டிங் செய்து துணி துவைக்கும் பழக்கத்தைக் கற்றுக்கொடுத்துவிட்டனர். அது திருடனுக்கு பூட்டை அடித்து உடைக்கப் பயன்படும் என்று தெரிந்திருந்தால் பழகாமல் இருந்திருப்பாள்.

அவுட் ஆகாமல் எத்தனை ஓவர் அடித்தானோ? கட்டை தனியாகவும் பிடி தனியாகவும் கழண்டு விழுந்த போது பூட்டும் பறந்துகொண்டு பௌண்டரி ஓடியது.கேட்டைத் திறந்துகொண்டு உள்ளே சென்றவனுக்கு வாஷிங் மெஷின், கிரைண்டர் போன்ற பொருட்களை எடுத்துக் கொண்டு ரன் எடுக்கத் தோன்றவில்லை. வேறு எதையோ தேடினான்.

வெற்றிகரமாக கதவைத் திறந்தவனுக்கு முதலில் கண்ணில் பட்டது அண்டாதான். சுதாவிற்கு 14 கிலோவில் கட்டிய பலகார அண்டா அது. வீட்டிற்குள் இடத்தை அடைத்த தேவையில்லாத பொருட்களை அண்டாவில் நிரப்பி அந்த அறையில் வைத்திருந்தாள். 

அண்டாவைப் பார்த்த குஷியில் அதற்குள் இருந்த பொருட்களை அறை முழுவதும் விசிறி அடித்துவிட்டு அதை மட்டும் தூக்கிக் கொண்டான். சில திருடர்கள் எவ்வளவு விலை உயர்ந்த பொருள் கண்ணில் பட்டாலும் திருடமாட்டார்கள். பாத்திரங்களைத் திருடி அன்றாட குடி தேவையை நிறைவு செய்துகொள்வார்கள்.

மீண்டும் மதில் ஏறிக் குதித்தான். அடுத்த வீட்டில் எதைத் திருட வந்தானோ! விதவிதமான திருப்புளிகளைப் பயன்படுத்தி இரும்பு கேட்டைத் திறந்துவிட்டான். 

அதற்கு பின்னால் இருந்த கதவைத் திறக்க முடியவில்லை. உபகரணப்பை கைவிடவே கடப்பாரையைக் கையிலெடுத்தான். இரண்டு குத்து குத்தினான். மூன்றாவது குத்தில் கடப்பாரை பக்கவாட்டில் திறந்திருந்த இரும்பு கேட்டில் மோதி டணால் என சத்தமிட்டது.

எத்தனை காம்பௌண்ட் எகிறிக் குதித்தானோ? தயாராக தெருமுனையில் ஸ்டார்ட் செய்து வைத்திருந்த வண்டியில் ஏறிப் பறந்துவிட்டான்.கத்திக் கத்திப் பார்த்த அந்தப் பெண், சுற்றி வந்து இந்தத் தெருவிற்கு செய்தி சொல்வற்குள் ஐந்து நிமிடமாகிவிட்டது. தெருகூடி உடைந்த வீட்டை பார்த்தது. உரியவருக்கு தகவல் சொன்னது. 

அதன் பிறகு கார்த்திக் வீட்டின் அழைப்பு மணியை அடித்தனர்.பொருள் எதுவும் களவு போகவில்லை என்றாலும் காவல்துறைக்கு செய்தி சென்றது. இரண்டு போலீஸ்காரர்கள் வந்தார்கள். தெருக்காரர்களும் கார்த்திக் வீட்டில் கூடிவிட்டார்கள்.