ஒரு காலத்தில் பருவநிலை மாற்றம், உலக வெப்பமயமாதல் குறித்து விவாதித்துக்கொண்டு மட்டுமே இருந்தோம். 

இப்போது பருவநிலை மாற்றத்தால் உண்டாகும் பாதிப்புகளை நேரடியாக சந்தித்து வருகிறோம். ஆம்; இன்று நாம் நுகரும் பல பொருட்களின் விலையேற்றத்துக்குப் பின்னணியில் பருவநிலை மாற்றம்தான் இருக்கிறது. இன்றைய உலகத்தை பருவநிலை மாற்றமடைந்த உலகம் என்றே சூழலியலாளர்கள் சொல்கின்றனர்.

இதன் காரணமாக ஸ்பெயினில் ஆலிவ் உற்பத்தி பெரியளவில் பாதித்தது. உலகிலேயே அதிகளவு ஆலிவ்வை உற்பத்தி செய்யும் நாடு ஸ்பெயின்தான் என்பது குறிப்பிடத்தக்கது. வறட்சி காரணமாக ஸ்பெயினில் மற்ற வருடங்களுடன் ஒப்பிடும்போது 2023-ம் வருடத்தில் ஆலிவ் உற்பத்தி 40 சதவீதம் சரிவடைந்தது. 

இதன் காரணமாக கடந்த ஜூனில் அமெரிக்காவில் ஆலிவ் எண்ணெயின் விலை 27 சதவீதம் அதிகரித்துள்ளது. இந்த விலையேற்றம் உலகமெங்கும் எதிரொலிக்க ஆரம்பித்துள்ளது. ஆம்; நம்ம ஊரில் உள்ள கடைகளில் கிடைக்கும் ஆலிவ் எண்ணெயின் விலைகூட முன்பைவிட  அதிகம்.

ஆலிவ் எண்ணெயைப் போலவே சில சாக்லேட்டுகளின் விலையும் எகிறியுள்ளது. உதாரணத்துக்கு கேட்பரி’ஸின் ‘ஃபிரெட்டோ’ என்ற சாக்லேட்டின் விலை அமெரிக்கா மற்றும் ஆஸ்திரேலியாவின் சந்தைகளில் 200 சதவீதம் அதிகரித்துள்ளது. 

பருவநிலை மாற்றத்தின் காரணமாக கானா மற்றும் ஐவரி கோஸ்ட்டில் கோகோ விவசாயம் வீழ்ச்சியைச் சந்தித்ததே இந்த விலையேற்றத்துக்குக் காரணம். கானா மற்றும் ஐவரி கோஸ்ட்டிலிருந்துதான் உலகின் முக்கியமான சாக்லேட் நிறுவனங்களுக்குத் தேவையான கோகோ செல்கிறது.

பருவநிலை மாற்றத்தின் விளைவாக உண்டான இயற்கைப் பேரிடர்கள் காரணமாக உலகமெங்கும் கோதுமை விளைச்சலும் பெரியளவில் பாதிக்கப்பட்டுள்ளது. குறிப்பாக உலகின் முன்னணி கோதுமை உற்பத்தியாளரான அர்ஜெண்டினாவில் கோதுமை விளைச்சல் 30 சதவீதம் சரிந்துள்ளது. தவிர, ரஷ்யா- உக்ரேனுக்கு இடையில் நடக்கும் போரினால் கோதுமை விளைச்சலும், விநியோகமும் பாதிக்கப்பட்டுள்ளது. 

 உலகம் முழுவதும் குறைவான கோதுமை விளைச்சல் மற்றும் குறைவான விநியோகம் காரணமாக, 2021-ம் வருடத்தில் இருந்தே கோதுமை மற்றும் கோதுமை சார்ந்த பொருட்களின் விலை ஏறிக்கொண்டே செல்கிறது. இதன் காரணமாக பெரும்பாலான நாடுகளில் ரொட்டியின் விலை இரண்டு மடங்கு அதிகரித்துள்ளது.

பருவநிலை மாற்றத்தால் ஏற்படும் கடுங்குளிர், அதிக வெப்பம், தண்ணீர் பற்றாக்குறை ஆகிய மூன்றும் சேர்ந்து பயிர்களின் விளைச்சலில் பெரும் பாதிப்பை உண்டாக்குகிறது. இது உலகம் முழுமைக்கான உணவுப் பாதுகாப்பை கேள்விக்குறியாக்குகிறது. 

இதனால் நடுத்தரக்குடும்பத்தினர் மற்றும் கீழ் நடுத்தரக் குடும்பத்தினர்தான் அதிகமாக பாதிக்கப்பட்டுள்ளனர். குறிப்பாக ஒரு காலத்தில் பெரிய அளவில் விளைச்சலைக் கொடுத்து, தங்களுக்குத் தேவையானது போக, மீதத்தை மற்றவர்களுக்கு விநியோகம் செய்த விவசாயிகள் கூட அதிக விலை கொடுத்து உணவுப் பொருட்களை நுகர வேண்டிய நிலைக்குத் தள்ளப்பட்டுள்ளனர்.

‘‘கொரோனா வந்தபோது உலக நாடுகள் எல்லாம் ஒன்றிணைந்து வைரஸிலிருந்து பாதுகாப்பதற்காக, 18 மாதங்களில் 500 கோடி தடுப்பூசிகளைத் தயாரித்தன. இதே முறையைத்தான் விலைவாசி உயர்வு மற்றும் உணவுப் பற்றாக்குறை பிரச்னையிலும் கையாள வேண்டும். 

அதாவது பருவநிலை மாற்றத்தால் உருவாகும் உணவுப் பிர்சனையைத் தீர்ப்பதற்கு உலக நாடுகள் எல்லாம் ஒன்றிணைந்து, விளைச்சல் மற்றும் உணவு விநியோகம் குறித்து தீர்க்கமான ஒரு முடிவை எடுக்க வேண்டும்...’’ என்று அழுத்தமாகச் சொல்கிறார் ஜேம்ஸ் ஹேன்ஸன்.