பொதுவாக சமையல்கட்டுகளில் பலரின் வீட்டில் இருக்கும் முக்கியமான சமையல் பாத்திரம் ‘நான்-ஸ்டிக்’ பேன். இந்த ‘நான்-ஸ்டிக்’ பேனில்தான் ஆபத்து இருப்பதாக அண்மைய ஆய்வுகள் சொல்கின்றன.தோசை சுடுவதற்கு, பதார்த்தங்களை வறுப்பதற்கு எல்லாம் இந்த ‘நான்-ஸ்டிக்’ பேன்கள் அதிகமான வீடுகளில் பயன்படுத்தப்படுகின்றன. 

அதிகம் எண்ணெய் தேவையில்லை, விரைவில் சூடாகும் தன்மை மற்றும் சமைத்த பிறகு இலகுவாக கழுவக்கூடிய பிசுபிசு இல்லாத் தன்மையால்தான் (non stick) இந்த பாத்திரமும் சந்தையில் இடம்பிடித்து சக்கைபோடு போட்டது; போடுகிறது.

இதுதான் மேற்குலக நாடுகளில் மட்டும் அல்லாது இந்தியாவிலும் உடல் கோளாறுகளைக் கொண்டு வரலாம் என்று எச்சரிக்கிறார்கள் மருத்துவ ஆய்வாளர்கள்.

ஒருவகை காய்ச்சலை உண்டாக்கும் என்றும் (Teflon flu) இத்தோடு தலைவலி, நடுக்கம், மூச்சுப் பிரச்னை, உடல் வலி, சோர்வு, நெஞ்சு இறுக்கம், இருமல், தீராத தாகம் மற்றும் அதிக வியர்வை உண்டாக்கும் என்றும் கண்டுபிடித்திருக்கிறார்கள்.கடந்த சில வருடங்களாக அமெரிக்காவில் இந்த நோயால் பாதிக்கப்பட்டவர்கள் மொத்தம் 2500 பேர். 

இது 2018ஐவிட மூன்று மடங்கு அதிகம் என்றும் கணித்திருக்கிறார்கள். என்ன பிரச்னை என்றால் இந்த டெஃப்லான் காய்ச்சலுக்கு எனத்  தனியான பரிசோதனைகள் இல்லை. இதனால் மருத்துவர்கள் மற்ற ஃப்ளூவுக்கும் இந்த ஃப்ளூவுக்கும் வித்தியாசத்தை கண்டுபிடிக்க முடியாத சிக்கலை ஏற்படுத்தியிருக்கிறது.