வாங்க பேசலாம்! இது Clubhouse கலாட்டா

இந்த டெக்னாலஜி உலகம் நம்மை சும்மாவே இருக்க விடாது போல! அந்தா வந்தாச்சு ‘Clubhouse’ ஆப்ளிகேஷன்!இதென்ன புது பூகம்பம் என்று டவுன்லோடு கொடுத்து உள்ளே போனால்... நுழைந்தவுடனேயே ‘எங்கே உன் போன் நம்பர்’ என்னும் ரீதியில் செக் வைக்கிறது. போன் நம்பர் கொடுத்து, யூசர் நேம், புரொஃபைல் எல்லாம் உருவாக்கியபிறகுகூட நமக்கான கணக்கு கிடைக்காது! நம் நண்பர்கள் யாரேனும் ஏற்கனவே உள்ளே பயனாளராக இருந்து நம்மை அவர்கள் அனுமதிக்க வேண்டும். அந்த நண்பரும் ஏற்கனவே இதேபோல் ஏதோ ஒரு நண்பரால் ‘ஓகே, வந்து தொலையட்டும்’ (Let them in) என அனுமதி கொடுத்து வந்தவர்களே.

அதென்ன ’கிளப்ஹவுஸ்’?
பொது இடத்துல கூட்டம் போடாதீங்கனு சொல்லிட்டாங்க இல்லையா..? ஸோ, மாற்றா இங்க கூட்டமா ரூம் போட்டு பேசிக்கலாம். அதாகப்பட்டது ஆடியோ சாட் ரூம். உள்ளே நுழையும்போதே உங்களின் விருப்பங்கள், மற்றும் ஆர்வங்கள் குறித்த ஆப்ஷன்கள் வரும். அதன் மூலம் உலக அளவிலான உரையாடல் ரூம்களும், பின் நம் மொபைலில் உள்ள நண்பர்கள் பட்டியல்படி யாரெல்லாம் உள்ளே இருக்கிறார்களோ அவர்கள் உள்ள ரூம்களும் நமக்குப் புலப்படும்.

ரூம்களுக்கு மேலே டாபிக்குகள் இருக்கும். உதாரணமாக ‘கதை பேசலாம் வாங்க’, ‘சினிமா லவ்வர்ஸ்’, ‘சென்னை பசங்க’ இப்படி அந்த நேரத்தில் உங்கள் நண்பர்கள் யார் எந்த ரூமில் இருந்தாலும் நீங்கள் அங்கே ஐக்கியமாகலாம்.பேசணும் ப்ரோ... மூச்ச புடிச்சு பேசணும். அவ்ளோதான் ரூல்ஸ். சரி... அப்படி நினைத்தவுடன் பேச முடியுமா?அங்கேதான் டுவிஸ்டு. ரூம் கிரியேட்டர் மற்றும் மாடரேட்டர் (அதாவது அட்மின்) இவர்கள் மட்டுமே அங்கே டான். யாரெல்லாம் பேசலாம் என அனுமதி கொடுக்கிறார்களோ அவர்கள் மைக் எல்லாம் ஆக்டிவ் மோடில் இருக்கும்.