கொரோனா அம்மன்!

உலகம் முழுவதும் கொரோனா வைரஸ் பெருந்தொற்று மிக மோசமான பாதிப்பை ஏற்படுத்தி வரும் சூழலில், கோவையில் ‘கொரோனா தேவி’ என்ற பெயரில் அம்மன் சிலை வடிவமைக்கப்பட்டு, 48 நாட்கள் சிறப்பு பூஜைக்குப் பின், பிரதிஷ்டை செய்யப்பட உள்ளது.

கொரோனா நோயை கட்டுப்படுத்த, உலகம் முழுக்க தடுப்பூசிகள், மருந்துகள் தொடர்பான ஆய்வுகள் நடந்து வருகின்றன. இந்தியாவில் பரவியுள்ள உருமாறிய கொரோனா மிக மோசமான தாக்குதலை தொடுத்து வருகிறது. இதற்கு இளம் வயதைச் சேர்ந்த பலரும் பலியாகியுள்ளனர்.இந்நிலையில், கோவை இருகூரைச் சேர்ந்த காமாட்சிபுரி பகுதியிலுள்ள 51வது சக்தி பீடத்தில் இந்த சிலை வைக்கப்பட்டுள்ளது. ஏற்கனவே இதே இருகூர் பகுதியில்தான் முன்பு பிளேக் நோய் பரவியபோது, ‘பிளேக் மாரியம்மன்’ சிலை வழிபாட்டுக்கு வைக்கப்பட்டது குறிப்பிடத்தக்கது.இந்த கொரோனா தேவி தொடர்பாக காமாட்சிபுரி ஆதீனம் சிவலிங்கேஸ்வரா, அறிக்கை ஒன்றை வெளியிட்டுள்ளார்.

அதில், ‘கோவிட்19 என்ற வைரஸ், மக்களின் வாழ்க்கையை பெரிதும் பாதித்துள்ளது. இதை மனதில் வைத்து, கொரோனா தேவி சிலையை வடித்துள்ளோம். பிளேக் நோய் பரவியபோது, பிளேக் மாரியம்மன் சிலை வடிவமைக்கப்பட்டு வழிபடப்பட்டது. காலரா, பிளேக் போன்ற கொள்ளை நோய்களின்போது, தங்களைக் காப்பாற்ற அம்மனை வழிபட்டது வரலாறு.
கடவுள் மட்டுமே ஒரே நம்பிக்கை என்ற நிலையில், இதுபோல சிலைகள் வடிக்கப்பட்டு வழிபாடுகள் நடந்துள்ளன. அதே மாதிரிதான், கொரோனாவின் கோரத் தாண்டவத்தை நிறுத்த, கொரோனா தேவி சிலையை வடித்துள்ளோம்.

48 நாட்கள் மகாயக்ஞம் நடத்தி வழிபடுவோம். பக்தர்களுக்கு இந்தக் காலகட்டத்தில் பூஜையில் கலந்து கொள்ள அனுமதியில்லை. கோயில் பூசாரிகள் மட்டுமே பூஜைகள் நடத்துவார்கள். மாரியம்மன், மாகாளியம்மன் வழிபாட்டைப் போலவே, கொரோனா தேவி வழிபாடும் முக்கியமானது...’ என தன் அறிக்கையில் குறிப்பிட்டுள்ளார்.
இது தொடர்பாக கோவை யைச் சேர்ந்த எழுத்தாளரும், சினிமா விமர்சகரும், ‘தமிழினி’ இலக்கிய இணையப் பத்திரிகையின் ஆசிரியருமான கோகுல் பிரசாத், மானுடவியல் வரலாறு சார்ந்த தன் கருத்துகளை முன்வைக்கிறார்.