அரசியல் மார்க்கெட்டிங் பிதாமகன் மோடி!

FaceB(JPook - மினி தொடர் 7

மோடி யைப் போல் தொழில்நுட்ப வளர்ச்சியை, இணையதளங்களின் சாத்தியத்தை அதன் வழியே புதிய சமூகங்களின் உருவாக்கத்தை மிக முன்னதாகவே புரிந்துகொண்ட ஓர் அரசியல் தலைவர் இந்திய அரங்கில் இல்லை என்றுதான் சொல்ல வேண்டும். ஆனால், துரதிர்ஷ்டம் என்னவென்றால் அதை அவர் நேர் வழியில் அல்லாது குறுக்கு வழியில் செல்வதற்கான வாகனமாகக் கண்டதுதான்.

ஆயிரம் முறை திரும்பத் திரும்பச் சொன்னால் ஒரு பொய் உண்மையின் வரலாற்று அந்தஸ்தை அடைந்துவிடும் மோசமான காலத்தில் இருக்கிறோம்.
இதை கோயபல்ஸ் பாணி என்பார்கள். ஹிட்லரின் அபிமான பத்திரிகையாளரான கோயபல்ஸ், அவரின் நாஜி சிந்தனைகள் மக்களின் மனதில் இடம்பெற பல்வேறு பிரசார உத்திகளைக் கையாண்டார். அதில் ஒன்று பொய்களைப் பரப்பும் கலையைக் கண்டறிந்தது.

‘எளிய பொய்களை அல்ல; மகத்தான பொய்களைச் சொல்லுங்கள். அப்போதுதான் மக்கள் நம்புவார்கள்’ என்றார் கோயபல்ஸ். ஏனெனில் எளிய பொய்கள் மக்களுக்கானவை. மக்கள் தங்கள் அன்றாட வாழ்வில் பல எளிய பொய்களைச் சொல்கிறார்கள். அரசியல்வாதிகளும் எளிய பொய்கள் சொல்லும்போது அவர்கள் அதை எளிதாகக் கண்டுபிடித்து நிராகரித்து விடுவார்கள்.

ஆனால், மகத்தான பொய்களைச் சொல்ல எளிய மக்கள் துணிய மாட்டார்கள். சிக்கிக் கொள்வோம் என்ற அச்சம் இருக்கும். எனவே, யாரும் மகத்தான பொய்கள் சொன்னால் அதுவும் அச்சு இதழ்கள் சொன்னால் மக்கள் அதை பொய் என நம்பத் தயங்குவார்கள் என்று கோயபல்ஸ் கருதினார். இந்தக் கருத்து ஒரு முழு வெற்றி பெற்ற சிந்தனை என்றுதான் சொல்ல வேண்டும். ஹிட்லரின் யூத இன வெறுப்பு உட்பட பல விவகாரங்களில் இந்த மகத்தான பொய்கள் பெரிய அளவில் அவருக்கு உதவின.

ஹிட்லர் மற்றும் கோயபல்ஸ் செயல்படுத்திய ராஜதந்திரத்தைத்தான் மோடியும் அமித்ஷா வும் செயல்படுத்தினார்கள்; செயல்படுத்துகிறார்கள்.
ஆனால், அதற்கு அவர்கள் பயன்படுத்திய வாகனங்கள் ஹிட்லர் காலம் போல், பழையவை அல்ல. நவீன ஹைடெக் தொலைத்தொடர்பு சாதனங்கள். இணையதளம், சமூகவலைத்தளம், ஃபேஸ்புக், வாட்ஸ்அப் போன்றவைதான் அவர்களின் மகத்தான பொய்களின் வேட்டை நிலமாக இருந்தன; இருக்கின்றன. கோயபல்ஸின் ஃபார்முலா இப்போதும் தோற்கவில்லை என்பதுதான் பெரும் சோகம்.

மோடி குறித்து ஒவ்வொரு தகவலுமே மிகத் துல்லியமான திட்டமிடலுடன் தயாரிக்கப்பட்டன. அவை, பொய் என்றும் உண்மை என்றும் வடிவமைக்கப்பட்டன. பொய்யையும் உண்மையையும் ஒன்றாகவே பரப்பினார்கள். ஒருவர் பொய்யை நம்பினாலும் உண்மையை நம்பினாலும் எதைப்பேசினாலும் மோடியைத்தான் பேசவேண்டும் என்பதுதான் அந்தத் திட்டத்தின் உள்ளார்ந்த நோக்கமே. அதில் அவர்கள் வெற்றியும் பெற்றார்கள்.

இன்றல்ல நேற்றல்ல... மோடியின் பொய்கள், மோடி குறித்த பொய்கள் அவர் பிரதமராவதற்குப் பத்து வருடங்களுக்கு முன்பே தொடங்கிவிட்டது.
அப்போது குஜராத்தின் முதலமைச்சராக இருந்தார் மோடி. அந்நாளைய குஜராத் அரசின் முதலமைச்சர் இணையதளம் ஒன்றில் மோடி தன் இளம் வயதில் 1974ம் ஆண்டு நடந்த ‘நவ நிர்மான் அந்தோலான்’ என்ற போராட்டத்தின் ஒரு பகுதியை தலைமை ஏற்று நடத்தினார் என்று குறிப்பிடப்பட்டிருந்தது.