ஆளும் மத்திய பாஜக அரசு நாளொரு சட்டத் திருத்தமும், பொழுதொரு நடைமுறையுமாக எல்லா துறைகளிலும் அதிரடி மாற்றங்களை நிகழ்த்திக் கொண்டிருக்கிறது.

இதில் பல சட்டங்கள் மற்றும் சட்டத் திருத்தங்கள் அவ்வப்போது கடும் விமர்சனத்துக்கும் கண்டத்துக்கும் உள்ளாவது வழக்கமாகிவிட்டது. அப்படித்தான், மத்திய அரசு சமீபத்தில் கொண்டுவந்துள்ள ‘வங்கி நடைமுறைகள் ஒழுங்கமைப்புத் திருத்தச் சட்டம் 2020’ என்ற புதிய சட்டத் திருத்தமும் விமர்சனங்களை எதிர்கொண்டுள்ளது.

இதற்கு உதாரணமாக, பஞ்சாப் மற்றும் மஹாராஷ்ட்ரா கூட்டுறவு வங்கிகளில் ஆயிரக்கணக்கான மக்கள் தங்கள் சேமிப்பை இழந்ததால்தான் இந்த நடவடிக்கை என்றும் சொல்கிறார்கள்.

அது உண்மைதான். ஆனால், உரிய விசாரணை நடத்தி, குற்றவாளிகளுக்கு தண்டனைகள் வழங்கி, பணத்தை இழந்தவர்களுக்கு உரிய இழப்பீடு வழங்குவதுதான் சரியான நடவடிக்கையாக இருக்க முடியுமே தவிர கூட்டுறவுச் சங்கங்களை அப்படியே மத்திய ரிசர்வ் வங்கியின் கட்டுப்பாட்டில் எடுப்பது பெரிய தீர்வாக இருக்காது.