எழுச்சியுறும் மாணவர் போராட்டங்கள் மாறுமா அரசியல் களம்?

மாணவர் போராட்டங்கள் தமிழக வரலாற்றோடு நெருக்கமான தொடர்புடையவை. இந்தி எதிர்ப்புப் போராட்டத்தில் ஊக்கமுடன் கலந்துகொண்ட கல்லூரி மாணவர்கள் பலர் பின்னாட்களில் அரசியல் தலைவர்களானது வரலாறு. திராவிட இயக்கம் என்ற மாபெரும் இயக்கமே மாணவர்கள், இளைஞர்கள் எழுச்சியின் விளைவால் உருவான ஒன்று.

இவ்வளவு ஏன்? இந்தியத் துணைக் கண்டத்தின் அரசியல் விடுதலையைச் சாத்தியமாக்கியதும் இந்த இளையோர் எழுச்சிதான் என்பதை வரலாறு அறிந்தோர் ஒப்புக்கொள்வர். இப்படியான பின்புலத்தில் வைத்து நோக்கும்போது இன்றைய தினம் நாடு முழுதும் உருவாகிவரும் மாணவர் எழுச்சி முக்கியமானதாகிறது.2020 ஜனவரி 5 அன்று, முகமூடி அணிந்த குண்டர் கும்பல் ஒன்று, ஜவஹர்லால் நேரு பல்கலைக்கழக(ஜேஎன்யு)த்தின் வளாகத்திற்குள் ஓர் அமைதிப் பேரணி நடத்திக் கொண்டிருந்த மாணவர்களையும், ஆசிரியர்களையும் கொடூரமான முறையில் தாக்கியது.

இந்தத் தாக்குதல் மூலமாக மாணவர்களுக்கும், ஆசிரியர்களுக்கும் நேரடியாகவே காயங்களை ஏற்படுத்த வேண்டும் என்பதோடு, அவர்களிடையே என்றென்றும் அச்ச உணர்வையும் உருவாக்க வேண்டும் என்பதும் குண்டர் கும்பலின் வெளிப்படையான நோக்கமாக இருந்தது.

ஜேஎன்யு-விலிருந்து ஊடகங்களில் காட்டப்பட்ட சித்திரங்கள் அனைத்தும் பயங்கரமாக இருந்தன. புத்தகங்கள் நிரம்பி வழிந்த பழைய மர அலமாரிகளுடனும், மிகச்சிறிய அளவிலான ஹீட்டர் - ஸ்டவ் போன்ற அடிப்படைத் தேவைகள் இருந்த அலமாரி மற்றும் மிதிபட்ட மெத்தைகள் மற்றும் போர்வைகள் தரைகளில் சிதறிக்கிடக்கும் நிலையில் இருந்த சூறையாடப்பட்ட அறைகளைக் காட்டின.

ஊடகங்களில் வெளியாகியுள்ள அறிக்கைகளிலிருந்து, கதவுகளில் அண்ணல் அம்பேத்கர் படங்கள் இருந்த அறைகள் அல்லது அந்த அறையிலிருந்தவர்கள் ஒரு குறிப்பிட்ட சமூக அடையாளத்துடன் இருந்தவர்கள் என்று கண்டறிந்து, அதை தேர்வு செய்து தாக்கியிருக்கின்றனர் என்பதையும் அவை சுட்டிக்காட்டுகின்றன.