இருபது வருடங்களுக்கு முன்பு உலகத் திரைப்பட விழாக்களில் திரையிடப்பட்டு பலரின் பாராட்டுகளைக் குவித்த தமிழ்ப்படம் ‘மல்லி’. ஒளிப்பதிவாளர் சந்தோஷ் சிவன்தான் இதன் இயக்குநர்.

தேசிய விருதைத் தட்டிய இப்படத்தின் கதை மல்லி என்னும் பத்து வயதுச் சிறுமியையும், அவளது காது கேளாத தோழியையும் சுற்றி நிகழ்கிறது. காது கேளாத சிறுமியின் கதாபாத்திரத்தில் நடித்த வனிதாவுக்கே இந்தப் படம் அர்ப்பணிக்கப்பட்டது சிறப்பு. நிஜ வாழ்க்கையிலும் கேட்கும் திறனற்ற குழந்தை வனிதா. தமிழ்நாடு மறந்துபோன ஒரு குழந்தை நட்சத்திரம் இவர். ஆனால், இன்று பல சாதனைகளுக்குச் சொந்தக்காரர்!