வெளிச்சமும் காற்றோட்டமும்!

ஹோம் அக்ரி -  14

தோட்டப் பராமரிப்பில் சரியான முறையில் நீரிடுவது, உரமிடுவது எவ்வளவு முக்கியமோ அவ்வளவு முக்கியமானது, காற்றோட்டமும் வெளிச்சமும். அகத்தி, மருதாணி, பப்பாளி, தவசிக்கீரை, செம்பருத்தி போன்ற சற்று உயரமாக வளரக்கூடிய செடிகளை வீட்டுத் தோட்டத்தில் வைக்கும்போது, அவற்றின் நிழல் மற்ற செடிகளைப் பாதிக்காமல் இருக்குமாறு வைக்க வேண்டும். இப்படி உயரமாக வளரும் செடிகளையும், மரங்களையும் கிழக்கு மேற்காக சரியான இடைவெளி யில் வைப்பதால், மற்ற செடிகளுக்கு வெளிச்சம் இல்லாமல் இருக்கும் சூழ்நிலையைத் தவிர்க்கலாம்.

வீட்டின் எந்தத் திசையில் தோட்டம் இருக்கிறது என்பதைப் பொறுத்து அடுக்குகளை அமைக்க வேண்டும். தோட்டம் கிழக்குப்பக்கம் அமைந்தால் உயரம் குறைவானவற்றை கிழக்கேயும், பிறகு உயரத்தின் அளவுக்கேற்ப மேற்கிலும் அமைக்கவேண்டும். அதுபோலவே மற்ற திசைகளிலும் வெளிச்சம் கிடைக்கும்படி உயரமானவற்றை பின் பக்கமும், உயரம் குறைந்தவைகளை முன்னரும் வைக்க வேண்டும்.

குறைந்த அளவு வெளிச்சம் தேவையான செடிகளை தெற்கு, மேற்கு பார்த்த இடங்களில் வைக்கும் போது, முழு நேரமும் அதற்கு வெளிச்சம் கிடைக்கும். அதனால் மதிய நேரங்களில் நேரடி சூரிய வெப்பத்தின் தாக்கம் அதன் மீது இருக்கும். இந்தச் சூழலில் வெயிலைத் தாங்கும் சில உயரமான செடிகளின் நிழல் படும் இடங்களில் குறைந்த அளவு வெளிச்சம் தேவைப்படும் செடிகளை வைக்கலாம். அல்லது குறைந்த அளவில் வெயில் படும்படியான ‘shade net’ துணிகளின் மூலமாக பந்தல் அமைக்கலாம்.

சில செடிகள் முழு நேரம் வெயிலிலும், அதிக வெப்பத்தையும் தாங்கி வளரக்கூடியவையாக இருக்கும். சில செடிகளுக்கு குறைந்த வெளிச்சமும், சிலவற்றுக்கு நிழலே பொருத்தமானதாகவும் இருக்கும். உதாரணமாக மிளகாய், தக்காளி, வெங்காயம், மல்லிகை போன்றவை முழுநேர வெயிலில் வளரக் கூடியவை. முள்ளங்கி, கேரட், கீரைகள், மக்காச் சோளம், கனகாம்பரம், முல்லை போன்றவை மிதமான வெளிச்சத்தில் வளரக்கூடியவை.

எனவே, தரம் பிரித்து தேவைக்கேற்ற வெளிச்சம் கிடைக்கும் படியான இடத்தில் அவற்றை வைக்க வேண்டும். இந்த இடத்தில் வெளிச்சத்தின் தேவைக்கேற்ப தரம் பிரிக்கும் போது, பருவத்தையும் கணக்கில் கொள்ள வேண்டும். கோடைக்கால மத்தியில், வெயில் தாங்கும் தாவரமாக இருந்தாலும், மொட்டை வெயிலில் வாடத்தான் செய்யும். மிதமான வெயில் தேவைப்படும் தாவரமாக இருந்தாலும் குளிர் காலங்களில் வெயிலில்லாத போது வாடத்தான் செய்யும்.

அடுத்து, செடிகளை அடர்த்தியாக வைக்கக்கூடாது. இதனால் காற்றோட்டம் பாதிக்கப்படும். நம்மாலும் ஒவ்வொரு செடியையும் தனியாக கவனிக்க முடியாமல் போகும். காற்று புக இடைவெளி விட்டு செடிகளை வைக்கும்போது ஒரு விஷயத்தை கவனத்தில் கொள்ள வேண்டும். நேரடியாக வேகமான காற்று அவற்றைத் தாக்காதபடி உயிர் வேலியோ மற்ற தடுப்பான்களையோ அமைக்க வேண்டும். வீட்டுச் சூழலில் நிரந்தர காற்றுத் தடுப்பான்களுக்கான தேவை குறைவாகத்தான் இருக்கும். இருந்தாலும் இதற்கான தேவையை உணர்ந்து தோட்டம் அமைக்க வேண்டும்.

(வளரும்)