பெண்களின் பிரச்னைகளைத் தீர்க்கும் முள்முருங்கை கீரை

ஹோம் அக்ரி-5

வீட்டில் வளர்க்கும் செடிகளுக்கு இரண்டு பங்கு செம்மண் அல்லது கரம்பை மற்றும் ஒரு பங்கு மக்கிய குப்பை (Compost), ஒரு பங்கு ஆற்று /  ஓடை மணல் சிறந்தது. இதனுடன் கூடவே ஒரு தொட்டிக்கு ஒரு கிலோ சுத்தமான மண்புழு உரம் சேர்த்துக் கொள்ளவும். வாய்ப்பு இருப்பவர்கள் 25  கிராம் அசோஸ்பைரிம், 25 கிராம் ஃபாஸ்போபாக்டீரியா சேர்த்துக் கொள்ளலாம். வடிகால் வசதியும், கலவை பொலபொலவென்று இருக்கிறதா என்பதை  உறுதிப்படுத்திக் கொள்வதும் அவசியம்.

தொட்டியில் மண் நிரப்பும் முன், அடிப்பாகத்தில் காய்ந்த சருகுகள் அல்லது தென்னை நார் கழிவுகள் அல்லது தேங்காய் நார் அல்லது சிறிய  குச்சிகளை இடலாம். இது நீர் எளிதாக வெளியில் செல்ல வழிவகுக்கும். Humic acid, Rock phosphate, Crusher dust, கரித்தூள், கடலை  புண்ணாக்கு, வேப்பம் புண்ணாக்கு / இடித்த வேப்பங்கொட்டை, சிறிதளவு சாம்பல் இவைகளை சேர்த்துக் கொள்வது இன்னும் சிறப்பு.

முருங்கை:

முருங்கையின் மருத்துவ பலன்கள் குறித்து அனைவருக்கும் தெரியும். உண்மையில் இதை அமிர்தம் என்றே சொல்லலாம். வீட்டில் பால்கனி அல்லது  மாடித் தோட்டத்தில் வளர்க்கும் போது விதை மூலம் வளர்ப்பதே நல்லது. இதுவே எளிதும் கூட. ஒரு குழி / தொட்டிக்கு 4 விதை இட்டு நீர் ஊற்றி  வரவும். வளரும் கன்றில் இரண்டை நீக்கி தொட்டியிலோ அல்லது வெளிப்புறத்திலோ வைக்கலாம். பெரிய தொட்டியிலோ அல்லது தரையிலோ  வளர்க்கும் போது முருங்கை போத்தை (சிறிய கிளை) பயன்படுத்துவது நல்லது. இதற்கு நன்கு வளர்ந்த மரத்திலிருந்து 2 - 3 அங்குலம் அகலமுள்ள  ஒரு கிளையை 2 - 3 அடி நீளத்தில் வெட்டி, குறைந்தது ஒரு கணு மண்ணின் உள்ளே இருக்குமாறு ஊன்றி வைக்க வேண்டும்.

போத்தின் மறுமுனை காய்ந்து விடாமல் இருக்க சாணி கொண்டு மூடவேண்டும். விதை நட்டு இரண்டு மாதத்திலிருந்தே கீரை பறிக்கலாம். கூடவே  முருங்கைப் பூவையும் பறித்து கீரையோடு சேர்த்து சமைப்பது நல்லது. ஏனெனில் பூ விசேஷமான மருத்துவ பலன்கள் கொண்டது. ஒரு மரத்தில்  காய்க்கும் காய்கள் 10 - 15 குடும்பங்களுக்கு வரும். எனவே பூவை பறிப்பதன் மூலம் காய் எண்ணிக்கையை கட்டுப்பாட்டில் வைக்கலாம். சத்தம்  கேட்டால் முருங்கை நன்றாக வளரும்! எனவே வீட்டுக்கு வெளியே வாகனங்கள் செல்லும் இடங்களில் வளர்ப்பது கூடுதல் பலன் தரும்.

லச்சக்கொட்டை கீரை:

நஞ்சு கொண்டான் கீரை, நச்சுக் கொட்டை கீரை, நஞ்சுண்டான் கீரை, லச்ச கெட்ட கீரை எனப் பல பெயர்களால் அழைக்கப்படும் இந்த கீரையை  அழகுக்காகவே பலரும் வீடுகளில் வளர்க்கிறார்கள்! உண்மையில் இது உண்ணக் கூடியது. மிகக்குறைந்த பராமரிப்பில், எந்த தட்பவெப்ப நிலையையும்  தாங்கி இது வளரும். முருங்கை போன்றே இதையும் ஒரு சிறிய கிளை (போத்து) கொண்டோ கொட்டை மூலமாக கன்றாக வளர்ந்த பின்போ நடலாம்.

இது மூட்டு வலிக்கு சிறந்த மருந்து. உடலிலுள்ள விஷங்களை வெளிக்கொண்டு வரும் என்பதாலேயே இதை நஞ்சுண்டான் கீரை என்கிறார்கள். மற்ற கீரைகளைப் போல் இதையும் பாசிப் பருப்பு சேர்த்து பொரியலாகவோ, கூட்டாகவோ, துவையலாகவோ, சூப்பாகவோ பயன்படுத்தலாம். பெரிய  இலையாக இருப்பதால் நரம்புகளை நீக்கிய பிறகே பயன்படுத்த வேண்டும்.

முள் முருங்கைக் கீரை:

இதுவும் மரமாக வளரக் கூடியதுதான். இதையும் போத்து கொண்டு வளர்க்கலாம். மரத்தில் நிறைய முட்கள் இருப்பதால் முள் முருங்கை என்கிறார்கள்.  கல்யாண முருங்கை என்ற இன்னொரு பெயரும் இதற்குண்டு. கிராமங்களில் இதை வேலிப் பயிராக வளர்ப்பார்கள். மற்ற கீரைகளைப் போல  பொரியல், மசியல் செய்யாமல் இதை அடையாக சுட்டே சாப்பிடுவார்கள்.  

தோசை, இட்லி, பூரி மாவிலும் சேர்த்துக் கொள்ளலாம். பெண்களின் பிரச்னைகளை தீர்க்கும் அருமருந்து இதுவே. மாதவிடாய் வலிக்கு இதன் சாறை  தேனோடு கலந்து குடிக்கலாம். இடுப்பு கொழுப்பை (visceral fat) குறைத்து இடையின் அளவை இது கட்டுப்படுத்தும். குழந்தை இல்லாதவர்கள்  பலவிதமாக இந்தக் கீரையைப் பயன்படுத்தலாம். மாடு, ஆடுகளுக்கும் இதை தீவனமாகக் கொடுக்கலாம்.

அகத்தி:

இதையும் விதை மூலமாக மேற்கண்ட முறையில் வளர்க்கலாம். தவசி போல இதுவும் மரமாக வளரும். எனவே 4 - 5 அடி வளர்ந்ததும் வெட்டி விட  வேண்டும். வறட்சியைத் தாங்கி வளரும். ஒரு செடி (4 - 5 அடி வளர்ந்தது) 15 குடும்பங்களுக்கு உணவளிக்கும். இதுவும் ஆடு, மாடுகளுக்கு சிறந்த  தீவனமே. என்றாலும் அகத்தியை அடிக்கடி உண்ணக் கூடாது.