28 ஆண்டுகளுக்குப் பிறகு இணைகிறார்கள் ராஜ்கிரண் - மீனா!

தமிழ், மலையாளம் என இரண்டு மொழிகளில் ஒரே சமயத்தில் தயாராகி வரும் படம் ‘குபேரன்’. இதில் மம்முட்டி, ராஜ்கிரண், மீனா,  அர்த்தனா பினு நடிக்கிறார்கள். ‘2.O’ படத்தில் வில்லன்களில் ஒருவராக நடித்திருந்த பிரபல காமெடி நடிகர் கலாபவன் ஷாஜன் இந்தப்படத்தில் வில்லனாக நடிக்கிறார். முக்கிய வேடத்தில் சித்திக் நடித்துள்ளார்.

ராஜ்கிரண் இந்தப் படத்தில் நடிப்பதன் மூலம் மலையாளத் திரையுலகில் முதன் முதலாக அடியெடுத்து வைத்துள்ளார். ‘என் ராசாவின் மனசிலே’, ‘பாசமுள்ள பாண்டியரே’ படங்களைத் தொடர்ந்து சுமார் 28 வருடங்களுக்குப் பிறகு ராஜ்கிரணும் மீனாவும் இந்தப்படத்தில் இணைந்து நடிக்கிறார்கள் என்பது குறிப்பிடத்தக்க அம்சம்.

பிரபல மலையாள இயக்குனர் அஜய் வாசுதேவ் இந்தப் படத்தை இயக்கியுள்ளார். இவர் ஏற்கனவே மம்முட்டியை வைத்து மலையாளத்தில் ‘ராஜாதிராஜா’, ‘மாஸ்டர்பீஸ்’ போன்ற படங்களை இயக்கி ஹிட் கொடுத்தவர். மம்முட்டியுடன் மூன்றாவதாக இணையும் முதல் இயக்குனர் இவரே. இந்தப் படத்துக்கு மலையாளத்தில் ‘ஷைலாக்’ என டைட்டில் வைக்கப்பட்டுள்ளது.