சினிமாவே வாழ்க்கை என வாழ்ந்தவர்!ஷீலா

செல்லுலாய்ட் பெண்கள்-103

‘நம்மடெ சொந்தம்... நம்மடெ கருத்தம்மே... நம்மடெ ஷீலம்மே....’ என்று கேரள மக்களால் கொண்டாடப்படும் ஒருவராக, மக்களால் நேசிக்கப்படுபவராக நடிகை ஷீலா இருக்கிறார். மலையாளத் திரைப்படங்களில் வெளிப்பட்ட அவரது  அற்புதமான நடிப்பு மட்டுமே அதற்குக் காரணம். 60 ஆண்டு கால (1962 - 2022) திரை வாழ்க்கை; மலையாளம், தமிழ், தெலுங்கு என 3 மொழிகளிலும் 573 படங்கள். அது மட்டுமல்லாமல் இயக்கம், தயாரிப்பு என தன் திரையுலக வாழ்க்கையை ஒரு ஆண் கடப்பது என்பதற்குப் பல உதாரணங்களைக் கூற முடியும். ஆனால் ஒரு பெண் ஆளுமை இத்தகைய சாதனைகளைச் செய்தார் என்றால் அது உண்மையில் மதிப்பிடற்கரிய மாபெரும் சாதனை என்பதில் எந்தச் சந்தேகமும் இல்லைதான்.

நடிகர் பிரேம் நசீருடன் மட்டும் இணைந்து 107 படங்கள், சத்யனுடன் ஏராளப் படங்கள், மதுவுடன் 55 படங்கள், தன்னிலும் வயதில் குறைந்த ஜெயன், கமல ஹாஸன் என அனைவருடனும் இணைந்து நடித்தார். இயக்குநர் சேது மாதவன் இயக்கத்தில் மட்டுமே பல பல படங்கள் என புகழின் உச்சத்தில் இருந்த ஆளுமைகளுடன் இணைந்து பணியாற்ற வேண்டுமானால் அவர் உறங்குவதற்கும் கூட நேரம் இருந்திருக்குமா என சிந்திக்க வைக்கிறது.

தினசரி நான்கு ஷிப்ட்கள், அதிகாலை 6 மணி துவங்கி அடுத்த நாளிலும் தொடரும் படப்பிடிப்புகள், ஒவ்வொரு ஸ்டுடியோவாக மாறி அங்கேயே நடித்து, அங்கேயே ஓய்வெடுத்து ஸ்டுடியோவே உலகம், வாழ்க்கை என  ஒரு மனித இயந்திரம் போல் இயங்கியதால்தான் ஓராண்டில் மட்டும் அதிகபட்சமாக 28 படங்கள் என்ற உச்சத்தை அவரால் எட்ட முடிந்துள்ளது. இந்தக் காலக் கணக்கில் 18 ஆண்டுகள் நீண்ட இடைவெளி வேறு.

இவற்றில் வெகுமக்கள் ரசனைக்கேற்ற படங்கள், குடும்பக் கதையைப் பிரதானமாகக் கொண்டவை, பொழுதுபோக்குப் படங்கள் மட்டுமல்லாமல் சிறந்த கதையமைப்பு கொண்டவை, கலையம்சம் நிரம்பியவை என பலவும் உண்டு. சில படங்களில் குணச்சித்திர வேடங்கள். மாஸ் காட்டிய பிளாக்பஸ்டர் படங்களும் உண்டு.தமிழில் அதிகம் அறியப்படாத எழுத்தாளர் மேதாவி தொடங்கி ஞானபீட விருது பெற்ற தகழி சிவசிங்கரன் பிள்ளை வரை அவர்களின் கதைகளில் உருவாக்கப்பட்ட கதாபாத்திரங்களுக்கு உயிரோட்டம் நல்கிய நாயகி.

ரயில்வே அமெச்சூர் ஆர்ட்டிஸ்டாக அறிமுகம் திருச்சூர், கணிமங்கலம் ஆண்டனி - கிரேஸி தம்பதியரின் 10 குழந்தைகளில் 2வது மகளாக சிரியன் கிறித்தவக் குடும்பத்தில் பிறந்தவர் செலின். அவர்களில் நால்வர் உயிருடன் இல்லை. தந்தையாருக்கு ரயில்வேயில் பணி என்பதால் அடிக்கடி இட மாறுதலும் நிகழ்ந்தது. ஆரம்பக் கல்வியும் திருவனந்தபுரம், திருச்சூர், எடப்பள்ளி, தமிழகத்தின் ஊட்டி, திருச்சி, சேலம், கோவையின் செயின்ட் பிரான்சிஸ் ஆங்கிலோ - இந்தியப் பெண்கள் பள்ளி என மாறிக்கொண்டிருந்தது.

ரயில்வே காலனியில் ரயில்வே ஊழியர்களால் நடத்தப்படும் அமெச்சூர் நாடகம். அதற்கான ஒத்திகையை ஜன்னல் வழி வேடிக்கை பார்த்து, வசனங்களைக் கூடவே பேசிப் பேசி மனப்பாடம் ஆகியிருந்தது. நாடகத்தில் நடிக்கவிருந்த நடிகை வராமல் போக, திடீர் நாயகியாக செலின் மேடையேற்றப்பட்டார். இப்படி13 வயதில் விளையாட்டாக ஆரம்பித்தது நடிப்பு,நாடகத்திலிருந்து திரைப்படங்களை நோக்கி….

தந்தையார் மாரடைப்பில் காலமாக, குடும்பம் வறுமையின் பிடியில் சிக்கியது. மகளின் நடிப்பார்வத்தை மனதில் கொண்டும், குழந்தைகளின் எதிர்காலத்தை முன்னிறுத்தியும் குழந்தைகளுடன் சென்னைக்கு ரயிலேறினார். நடிகர் எஸ்.எஸ். ராஜேந்திரனின் முதல் மனைவி பங்கஜம் ஒரு மலையாளி மற்றும் முன்னாள் நாடக நடிகை. அவருடைய சிபாரிசின் பேரில் எஸ்.எஸ்.ஆர். நாடக மன்றத்தில் இணைந்து  ‘தென்பாண்டி வீரன்’ நாடகத்தில் சிற்பியின் மகளாக நடிக்க ஆரம்பித்தார். இந்த நாடகத்தைப் பார்க்க வந்திருந்த இயக்குநர் ராமண்ணாவும் எம்.ஜி.ஆரும் செலின் நடிப்பைப் பார்த்து தங்கள் அடுத்த தயாரிப்பான ‘பாசம்’ படத்தில் நடிக்க அழைத்தனர். உடனடியாக அதனை ஏற்று படத்தில் நடிக்க ஆரம்பித்தார்.