புத்தகங்கள் படிக்கும் பழக்கம் சிறிது சிறிதாக நம்மிடையே குறையத் தொடங்கி விட்டது. நம் உற்ற நண்பனாகக் கருதப்பட்ட புத்தகங்களை பின்தள்ளியுள்ளது கைபேசிகள். இன்றைய விஞ்ஞான முன்னேற்றங்கள் நம் கைக்கு வரும் முன், புத்தகங்கள் மூலம்தான் அறிவை பெருக்கிக் கொண்டோம்.

இன்று அனைத்தையும் ‘கூகுள்’ சொல்லித் தருகிறது. இவையெல்லாம் நிறைந்து காணப்பட்டாலும், மேலை நாடுகளில் குறிப்பாக அமெரிக்கா, சியாட்டலில் புத்தகம் படிக்கும் பழக்கம் இன்றும் நிலையாக உள்ளது. ஒரு வயது நிரம்பாத குழந்தைகளுக்குக் கூட அங்கு புத்தகம் பார்த்து கதை சொல்கிறார்கள். அதற்கு காரணம் அங்குள்ள நடைபாதை புத்தகாலயங்கள்.

வீட்டு வாசலில் அழகான தோட்டம் தான் பெரும்பாலானவர்களின் விருப்பமாக இருக்கும். ஆனால் இங்கு ஒவ்வொரு வீட்டு வாசலில் தோட்டம் இருக்கிறதோ இல்லையோ அங்கு அழகான சிறிய அளவில் புத்தக அலமாரிகளை பார்க்கலாம். தோட்டத்திற்குள் ஒரு புத்தக அலமாரி இருந்தால் பார்க்கும் போதே கண்களுக்குப் பசுமையாகவும், மனதிற்குக் குளிர்ச்சியாகவும் இருக்கும்.

கண்ணாடி பேழைக்குள் விதவிதமான புத்தகங்கள். யார் வேண்டுமானாலும் திறந்து எடுத்துப் படிக்கலாம். அதே சமயம் நம்மிடம் பயன்படுத்திய புத்தகங்கள் இருப்பின், அதையும் கொண்டு வைக்கலாம். அங்கு யாரும் அநாவசியமாக எந்த பொருளையும் தொடுவது கிடையாது. புத்தகம் படிக்க எடுத்துச் சென்றாலும், அதை திருப்பி கொண்டு வந்து வைத்துவிடுகிறார்கள்.

குழந்தைகள் இதை ஒரு பழக்கமாகக் கொண்டு, ஒவ்வொரு வாரமும் புதிய புத்தகங்களை எடுத்துப் படிக்கிறார்கள். படங்களை மையமாகக் கொண்டு, வண்ணத்தால் அச்சடிக்கப்பட்ட புத்தகங்கள் குழந்தைகளால் மிகவும் விரும்பப்படுகிறது. படிக்கத் தெரியாத பருவத்தில் படங்களால் ஈர்க்கப்படும் பிள்ளைகள் வளர வளர புத்தகம் படிக்க வேண்டும் என்ற ஆர்வத்தினை வளர்த்துக் கொள்கிறார்கள்.

 மேலும் எழுத்துக்களை வண்ணமயமாக்கி  புத்தக வடிவில் பார்க்கும் போது, அதில் உள்ள படங்கள் குழந்தைகளின் மனதில் எளிதாக பதிந்துவிடுகிறது. இது எழுத்துக்கான வார்த்தைகளையும் பிள்ளைகள் மனதில் பதிய செய்ய உதவுகிறது. இதன் மூலம் புத்தகம் படிப்பதன் முக்கியத்துவம் நமக்கு நன்றாகவே புரிகிறது.

இங்கு நடைபாதையில் மட்டுமில்லாமல் பயணம் செய்யும் வண்டிகளிலும், புத்தகங்கள் காணப்படுகின்றன. நம் ஊரில் எப்படி அங்கங்கே “பஸ் ஸ்டாப்”கள் இருக்கிறதோ,  அதேபோல் நடைபாதையிலும் புத்தகாலயங்களைப் பார்க்கலாம். இங்கு புத்தகங்களுக்காக செலவு செய்ய வேண்டும் என்ற அவசியம் இல்லை.

கிடைக்கும் புத்தகங்களை எடுத்துப் படித்தாலே போதும். வயதிற்கேற்ற, தொழிலுக்கேற்ற, பதவிக்கேற்ற, பொது அறிவு சம்பந்தப்பட்ட அனைத்து புத்தகங்களும் இங்குள்ளது. இங்குள்ள குழந்தைகள் புத்தகங்களை பொக்கிஷமாக பாதுகாக்கிறார்கள். அவர்கள் வளர்ந்தவுடன் சிறுவயதில் படித்த புத்தகங்களை நன்கொடையாக அளித்து விடுகிறார்கள். வசதி கொண்டவர்கள்  வீட்டிற்கு அருகே அழகான அலமாரியில் புத்தகங்களை வைக்கிறார்கள். பொதுவாக நாம் வீட்டில் சேரும் பழைய பொருட்களை இரண்டாவது விற்பனைக்குத் தருவது வழக்கம்.