மண்ணில் தோன்றிய ஓரறிவு உயிர் முதல் ஆறறிவு மனிதன் வரை அனைத்திற்குமான அடிப்படை ஆரோக்கியம்... அதற்கு முக்கிய தேவை உணவு. சத்தான உணவுகள் மட்டுமே நம் உடலையும் அறிவையும் வலுப்படுத்தும். 

இயற்கையாகவே நம் உடலுக்கு தேவையான சத்தான உணவுகள் அனைத்தும் இங்கு கிடைக்கின்றன. ஆனால், இன்றளவில் உடை தொடங்கி உணவிலும் மேற்கத்திய நாகரிகம் கலந்துவிட்ட காரணத்தால் ஊட்டச்சத்து மிக்க உணவுகளை நாம் உண்கிறோமா என்பது கேள்விக்குறியே!  

சென்னைப் போன்ற நகரங்களில் பீட்சா, பர்கர் போன்ற உணவுகளைதான் குழந்தைகள் அதிகம் விரும்புகிறார்கள். அதே சமயம் இந்த உணவினால் ஏற்படும் பிரச்னைகள் குறித்த விழிப்புணர்வு பெற்றோர் மத்தியில் இருப்பதால், அவர்கள் குழந்தைகளின் ஆரோக்கியத்தில் மிகுந்த கவனம் செலுத்தி அதற்கான தேடலில் நேரம் செலவிடுகின்றனர். 

பள்ளிகளிலும் ஜங்க் ஃபுட்ஸ் குறித்த அறிவுரைகள், செயல்முறை விளக்கங்கள், ஃபுட் பெஸ்டிவல் போன்ற நிகழ்ச்சிகளால் குழந்தைகள் மத்தியிலும் சத்தான உணவுகள் குறித்த விழிப்புணர்வு உயர்ந்தே காணப்படுகிறது.

விவசாயிகளும் தங்களை நம்பும் மக்களுக்காக மண்ணிலே புதுப்புது முயற்சிகளை செய்து பாடுபடுகின்றனர். ஆனால், மண்ணில்லா விவசாயத்திலும் மகத்தான ஆரோக்கியத்தை பெறலாம் என்கிறார் கடலூர் மாவட்டத்தைச் சேர்ந்த ‘சாமு மைக்ரோ கிரீன்ஸ்’ நிறுவனர் திருமதி சாமுண்டீஸ்வரி. 

‘‘எனக்கு சொந்த ஊர் பண்ருட்டி பக்கத்தில திருவதிகை. என் கணவர் ஸ்தபதி. கோயில், மியூசியத்திற்கு சிலைகள் செய்பவர். எனக்கு ஒரு மகள். நான் எம்.ஏ., எம் எட். எஜூகேஷன்ல எம்ஃபில் முடிச்சேன். டீச்சராகணும்னு படிச்சேன். என்  மகள் பிறக்கும் போது அவளின் எடை ஒன்னே கால் கிலோதான் இருந்தது. 

அவளுக்காக வேலைக்கு போகல. குழந்தைக்கு ஆறு மாதங்களான பிறகு இணை உணவா சத்தான கீரை சூப்கள் கொடுக்க சொல்லி டாக்டர் பரிந்துரை செய்தாங்க. 

அதன் மூலம் எடை கூடும் என்று சொன்னாங்க. கடைகளில் கீரை இருந்தாலும் ரசாயனம் மூலம் பயிர் செய்ததாகத்தான் இருந்தது. அதனால் எங்க வீட்டு பின்புறம் கீரைத் தோட்டம் அமைத்து அந்தக் கீரையை தான் என் மகளுக்கு கொடுத்தேன். அவளுக்கு ஒரு வயதான போது, அந்த வயதிற்கான எடையில் இருந்தாள். 

அதன் பிறகு என் மகளுக்கு எந்தக் கீரை கொடுத்தால் அவளுக்கு சத்துள்ளதாக இருக்கும்னு தேட ஆரம்பிச்சேன். கீரைகளைப் பற்றி நிறைய படிச்சேன். அப்போதுதான் ‘மைக்ரோ கிரீன்ஸ்’ பற்றி தெரிய வந்தது. 

மைக்ரோ கிரீன்ஸ் முறையில் வளர்க்கப்படும் கீரைகளில் 40 மடங்கு அதிகம் சத்து இருக்கும்னு தெரிஞ்சது. எந்த வகை கீரைகளாக இருந்தாலும் அவை புதிதாக முளைவிடும் போது, இரண்டு இலைகள் முழுசா வளர்ந்திருக்கும். அந்த நிலையைதான் மைக்ரோ கிரீன் என்று குறிப்பிடுவார்கள். 

‘‘மைக்ரோ கிரீன்களை நான் பயிரிட்டு என் மகளுக்கு கொடுத்திருந்தாலும், எனக்கும் அது குறித்து முறையான பயிற்சி தேவைப்பட்டது. EDII பெரியகுளத்தில் வசந்தன் செல்வமிடம் கற்றுக் கொண்டேன். 

தமிழ்நாடு முழுவதும் EDII தொழில்முனைவோர் பயிற்சி மையத்துடன் இணைந்து எல்லா ஊர்களிலும் பயிற்சிகள் தர துவங்கினோம். மாணவர்கள், இல்லத்தரசிகள், முதியவர்கள் என பலர் ஆர்வமாக இதனை கற்றுக்கொள்ள முன் வருகிறார்கள். குறைந்த முதலீட்டில் நிறைந்த வருமானம் என்பதால் பலரும் இந்தப் பயிற்சியினை எடுத்துக் கொள்கிறார்கள். 

மைக்ரோ கிரீன்களை, சீனா முதல் எல்லா நாடுகளிலும் 30 வருடங்களாக வளர்க்கிறாங்க. சாலட், சான்வெட்ஜஸ், சூப் போன்றவற்றில் அதிகம் பயன்படுத்துகின்றனர். 

இந்தியாவில்தான் இன்னும் பிரபலமாகவில்லை. குறிப்பாக தமிழ்நாட்டில் நாங்கள்தான் முதன் முதலில் பிசினசாக ஆரம்பித்தோம். 120 வகையான மைக்ரோ கிரீன்ஸ் வளர்த்து சர்வதேச வேளாண் விருது பெற்றிருக்கிறேன்’’ என்று பெருமையாக கூறுகிறார் சாமுண்டீஸ்வரி.

‘‘காய்கறிகள், பழங்கள், மரங்கள், பூக்கள், விதைகள் என 200 வகையான விதைகளை பயன்படுத்தி மைக்ரோ கிரீன்ஸ் உற்பத்தி செய்யலாம். ஐந்து முதல் முப்பது வகையான மைக்ரோ கிரீன்ஸ் வீட்டிலேயே வளர்க்கலாம். பழங்களில் கொய்யா விதைகளின் கிரீன்ஸ் மிகவும் நல்லது. 

பூக்களில் சாமந்தியின் மைக்ரோ கிரீன்ஸ் மஞ்சள் காமாலையை குணப்படுத்த உதவுகிறது. எலுமிச்சை மைக்ரோ கிரீன்சில் உள்ள விறுவிறுப்பு தன்மைக்காக நட்சத்திர ஓட்டல்களில் உணவில் சேர்க்கிறார்கள். பல பயன்கள் இருக்கும் சூரியகாந்தியின் மைக்ரோ கிரீன்சுக்கு தான் இப்போது மார்க்கெட்டில் அதிக டிமான்ட் இருக்கு. 

நான்கு வருடங்களுக்கு முன் 100 ரூபாய் முதலீட்டில் என் சொந்த உபயோகத்திற்காக ஆரம்பித்தேன். இன்று அதுவே பிசினசாக தொடங்கி மாதம் பல ஆயிரங்கள் சம்பாதிக்கிறேன். நாங்கள் மதிப்புக் கூட்டுப் பொருட்களும் இதன் மூலம் தயாரிக்கிறோம். 

சாலட் மிக்ஸ், சூப் மிக்ஸ், அடை, தோசா மிக்ஸ், ஸ்மூத்தி, ஜூஸ் மிக்ஸ் போன்றவற்றிற்கு நல்ல வரவேற்பு உள்ளது. ஆனால், பெரும்பாலானவர்கள் பச்சையாக சாப்பிட விரும்புவதில்லை. கீரைகள் சாப்பிடாத குழந்தைகளும் மிக்ஸாக கொடுக்கும் போது விரும்பி சாப்பிடுறாங்க.