* மைல்கள் பல கடந்த களைப்பில்
அமர்ந்த பறவை
சிறகுகளை அலகால் கோதியது,
நன்றிக்கடனாய் இருக்கும்

* இறந்த மீனின்
வெறித்த விழிகளில் தெரிவது,
அதன் கருணை மனு
நிராகரிக்கப்பட்டதன் வலி

* கேரம் விளையாட்டில்
வெள்ளைக்கு இரண்டு புள்ளி,
இளக்காரக் கறுப்பு

* சுகப் பிரசவமென்பது
இரண்டாவதாயும்
பெண் குழந்தை பிறந்தும்
குடும்பம் குதூகலமாயிருப்பது

* கீழே விழுந்த பொம்மையை
தடவிக் கொடுக்கும் குழந்தை
அந்தக் கணத்தில் தாயாகிறாள்

* நடை
ஓட்டமானது,
தூரத்து இடி முழக்கம்