‘‘தலைவர் சைனீஸ் பொண்ணை லவ் பண்றாருன்னு எப்படிச் சொல்றே..?’’
‘‘இந்தியாவில் சீனாவின் முதலீட்டை ஆதரிக்கிறேன்ங்கறாரு...’’

‘‘ஆனாலும் தலைவருக்கு ஞாபக சக்தி இவ்வளவு ஸ்ட்ராங்கா இருக்கக் கூடாது...’’
‘‘ஏன்... என்ன சொன்னார்?’’
‘‘அவர் முதல்வர் ஆகற மாதிரி கனவு வந்து 1817 நாள் ஆகுதுன்னு சொல்றாரே!’’

‘‘தலைவரே... 2014 தேர்தல் நெருங்குது. என்னை கவனிச்சுடுங்க... மறந்துடாதீங்க!’’
‘‘ஓ... சீட்டுதானே!’’
‘‘சீட்டு எவன் கேட்டான்... எங்கிட்டே கைமாத்தா வாங்கின நூறு ரூபாயை ஞாபகப்படுத்துறேன்!’’

‘‘தலைவருக்கு வார இதழுக்கும், அரசிதழுக்கும் வித்தியாசமே தெரியல...’’
‘‘எப்படிச் சொல்றே?’’
‘‘தொடர்ந்து பல சிறுகதைகள் அனுப்பியும் ஒன்றுகூட அரசிதழ்ல பிரசுரமாகலையேங்கிறாரு!’’

‘‘மன்னர் ஏன் கடுப்பா இருக்கார்..?’’
‘‘அவர் புறமுதுகிட்டு ஓடி வர்ற வழியில டோல்கேட் போட்டு கட்டணம் வசூல் பண்றாங்களாம்...’’

என்னதான் கிராமத்துல நாட்டாமை தலைமையில கிரிக்கெட் போட்டி நடத்துனாலும், ‘பிட்ச்’ல ‘ஸ்டெம்ப்’தான் வச்சிருப்பாங்க. ‘செம்பு’ வச்சிருக்க மாட்டாங்க...

பொறுமை கடலினும் பெரிது தான்... அதற்காக அதில் படகோ, கப்பலோ விட முடியாது!
- பொறுமையாகக் காத்துக் கிடப்போர் சங்கம்